كۇندەلىكتى كۇيبەڭ تىرلىكتىڭ جەتەگىندە ءجۇرىپ, اينالامىزدا ءومىردىڭ اۋىر سىناعىنا ۇشىراعان جانداردىڭ تاعدىرىنا كوڭىل بولە بەرمەيمىز. شىن مانىندە, قوعامدا قاتال سىنعا مويىماي, قيىندىقتى ەڭسەرگەن قايسار جاندار از ەمەس.
ارداق سارسەنباەۆانىڭ ءومىرى – ەرىك-جىگەر مەن ەڭبەكقورلىقتىڭ جارقىن ۇلگىسى. جىگەرلى جاس 1990 جىلى قوستاناي وبلىسى ناۋىرزىم اۋدانى قارامەڭدى اۋىلىندا دۇنيەگە كەلگەن. وتباسىنداعى ءۇش بالانىڭ ورتانشىسى. بالا كەزدە ءجاي عانا سۋىق ءتيىپ اۋىرعان ول سالعىرت ەمنىڭ اسەرىنەن تۇتاستاي ەستۋ قابىلەتىنەن ايىرىلعان.
تاعدىر تاۋقىمەتىنە قاراماستان اتا-اناسى ارداقتى قالاداعى ەستۋ قابىلەتى بۇزىلعان بالالارعا ارنالعان ينتەرناتقا وقۋعا بەرەدى. ءسويتىپ, ول ءوزى سەكىلدى قاتارلاستارىمەن بىرگە ىم-يشارا ءتىلىن مەڭگەرەدى. بۇل ورتا وعان سەنىمدىلىك پەن ومىرلىك داعدىلاردى قالىپتاستىرۋعا سەپتەسەدى.
– مەكتەپتى اياقتاعان سوڭ قىزمەت كورسەتۋ سالاسى ماماندىعى بويىنشا قوستانايداعى كوللەدجگە وقۋعا ءتۇستىم. كەيىن ونى بىتىرگەن سوڭ, قاراپايىم جۇمىسشى مامان رەتىندە ەڭبەككە ارالاستىم. ءبىز سەكىلدى ازاماتتارعا ەكى قولعا ءبىر كۇرەك تابۋ, قوعامعا بەيىمدەلۋ وڭاي ەمەس. دەسە دە ءومىر جولىمدا كەزدەسكەن ءتۇرلى قيىنشىلىققا مويىنسۇنبادىم, مەنى تەك العا قاراي سەنىم جەتەلەدى. سودان 2014 جىلى تاعدىرلاس ازاماتقا تۇرمىسقا شىقتىم. ءبىزدىڭ ماحابباتىمىزدان كىشكەنتاي ياسمينا جارىق دۇنيە ەسىگىن اشتى. دەكرەتتىك دەمالىسىمدى دا تەككە وتكىزبەدىم. قولونەرمەن اينالىسىپ, ءتۇرلى تاپسىرىس قابىلدادىم. اراعا ۋاقىت سالىپ, 2017 جىلى قىزىمدى بالاباقشاعا ورنالاستىرىپ, ءوزىم تىگىنشى بولىپ جۇمىسقا تۇردىم. ماعان قولىنان ءىس كەلەتىن, قيمىلى شيراق, قانشا اۋىرتپالىق بولسا دا جۇزىنەن كۇلكى كەتپەيتىن جاندار ۇنايدى, – دەدى كەيىپكەرىمىز.
ءۇشىنشى توپ مۇگەدەگى ارداقتىڭ قولعاناتى بۇگىندە 10 جاستا. وسىدان ەكى جىل بۇرىن ەكەۋى ەلورداعا قونىس اۋداردى. مۇندا دا ۇكىمەتتىڭ بەرگەن جاردەماقىسىنا الاقان جايعان جوق. باستاپقىدا جالدامالى جۇمىستا تىگىنشى بولىپ ەڭبەك ەتتى. كەيىن ارمانى جەتەلەپ, ءوز كاسىبىن اشۋعا نيەتتەندى. ءسويتىپ, استاناداعى جۇمىسپەن قامتۋ ورتالىعىنداعى مامانداردىڭ اقىل-كەڭەسىنە جۇگىنىپ, «enbek.kz» پلاتفورماسى ارقىلى وقۋعا دەن قويدى. جەكە بيزنەس جوسپارىن جاساقتاپ, قايتارىمسىز نەگىزدەگى مەملەكەتتىك گرانتقا ءوتىنىش تاپسىردى. ىزىنشە جوبا ماقۇلدانىپ, ارداق ازىن-اۋلاق قاراجاتپەن ءوزىنىڭ تىگىن شەبەرحاناسىن اشتى.
– مەملەكەت بەرگەن قارجىعا ارنايى ورىندى جالعا الدىم. تىگىن ماشيناسى, كەرەكتى قۇرال سايماندارى تاعى بار. كاسىپتى جۇرگىزۋ مەن ونى ىلگەرىلەتۋدىڭ ءوز قيىندىعى بولادى. سونىڭ وزىندە تابىسىم تۇراقتى. كوبىنە ايەلدەرگە ارنالعان نەشە ءتۇرلى كيىمدەر تىگەمىن. كۇندەلىكتى ءپىشىپ, قىسقارتۋ جۇمىستارى دا كەزدەسەدى. بايقاعانىم, كوپ جەردە سۋردواۋدارمالار بولمايدى. بيزنەستە بويلاۋعا كەدەرگى كەلتىرەتىن دە – وسى نارسە. ەلىمىزدە تولىق ينكليۋزيۆتى قوعام قۇرىلدى دەۋ قيىن. دەگەنمەن اتەلەنىڭ اۋقىمىن كەڭەيتىپ, بارىنشا كوپ تاپسىرىس الۋعا تالاپتانىپ ءجۇرمىن, – دەيدى ول.
جاقسى كۇندەردەن ءۇمىتى ۇزىلمەگەن تاعى ءبىر قايسار جان – التىنشاش مۇقاتاەۆا. جاس ءانشى – «پاريج تالانتتاردى تانىستىرادى» (پاريج, فرانتسيا), «Planet of arts» (ماسكەۋ, رەسەي), «Art line» (پاريج, فرانتسيا), «ەلىم, ءان شىرقا» (ماسكەۋ, رەسەي), «التىن ايداھار» (پەكين, قىتاي), «Magic voice», «Icon music fest» (سوچي, رەسەي), «جاسSTAR» سىندى حالىقارالىق دەڭگەيدەگى بەدەلدى كونكۋرستاردىڭ جەڭىمپازى.
شىعىس قازاقستان وبلىسى اياگوز اۋدانىنىڭ تۋماسى بالا كەزدە دارىگەرلەر قويعان سىرقاتقا مويىعان جوق. قولاربامەن جۇرسە دە, جان-جاقتى ءبىلىم الىپ, ءوزىن تۇبەگەيلى شىعارماشىلىققا ارنايدى.
– 2011 جىلى استاناداعى قازاق تەحنولوگيا جانە بيزنەس ۋنيۆەرسيتەتىنىڭ كوللەدجىندە ديزاين ماماندىعىن مەڭگەردىم. سونىڭ اراسىندا قاراقات ءابىلدينانىڭ مەكتەپ-ستۋدياسىنا بارىپ, ءتورت جىلداي ۆوكالدان ءبىلىم الدىم. 2014 جىلى قازاق گۋمانيتارلىق زاڭ ۋنيۆەرسيتەتىنە پسيحولوگ ماماندىعىنا تاپسىرىپ, بۇل وقۋدى دا ابىرويمەن اياقتادىم. ءومىر ءبىر رەت بەرىلەدى. ونى وكىنىشسىز ءسۇرۋ, بارعا قاناعات ەتىپ, مۇمكىندىگىڭدى جان-جاقتى اشۋعا تالپىنۋ قاجەت. مەنىڭ ونەر جولىم بالا كەزدەن باستاۋ الدى. سول كەزدەن-اق ءان ايتۋ مەن ساحنانى ءسۇيدىم, بۇل ماحاببات مەنى ونەرگە جەتەلەدى. قازىرگى تاڭدا ەلىمىزدىڭ مادەنيەتىن دامىتۋعا, ونەرگە ۇلەس قوسۋعا كۇش سالىپ كەلەمىن, – دەيدى روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمىنىڭ ءسوليسى.
بىلتىر عانا كەيىپكەرىمىز «عاشىقپىن» اتتى موتيۆاتسيالىق شىعارماشىلىق كەشىن وتكىزىپتى. وندا التىنشاش اۋەزدى اندەرىن شىرقاپ, ءومىرى مەن ونەرى, قۋانىشى مەن قيىندىعى, جەتىستىگى مەن جەڭىلىسى تۋرالى سىر شەرتتى.
تاعدىردىڭ تەزىنە سىنباعان ول «ەرەن ەڭبەگى ءۇشىن» مەدالى مەن ءتۇرلى العىسحاتتار يەلەنگەن. مادەنيەت سالاسىنىڭ ۇزدىگى, تۇڭعىش پرەزيدەنت قورىنىڭ گرانت يەگەرى دە اتانعان. وسىدان-اق ونىڭ ومىرگە دەگەن قۇشتارلىعىن, جىگەرىن كورۋگە بولادى. بۇل قازىرگى ءوز-ءوزىن تاپپاي سەندەلىپ جۇرگەندەرگە ۇلگى بولارى انىق.
– ومىردە ەڭ سوراقىسى اياقتىڭ جۇرمەي, كوزدىڭ كورمەي قالۋى ەمەس, ادامگەرشىلىك تۇرعىدان كەۋدەسى قۋىس, ويلارى ارام ادامداردىڭ رۋحاني مۇگەدەكتىگى. كەز كەلگەن ءىستى ادال, مەيلىنشە, ىقىلاسپەن اتقاراتىن بولسا, شىن مۇگەدەكتىك دالادا قالادى. جۇمىسسىزدىق – قازىرگى قوعامنىڭ ماڭىزدى ماسەلەلەرىنىڭ ءبىرى. بىراق جاستاردى ەڭبەككە باۋلۋ ءۇشىن مەنىڭشە, ساپالى ءبىلىم مەن تاجىريبە قاجەت. ودان قالدى باعىت-باعدار بەرىپ, ءوز مۇمكىندىگىن اشۋعا جاعداي جاساۋ ماڭىزدى. ەل جاستارىنىڭ شىعارماشىلىق جانە كاسىپكەرلىك باستامالارىن ءجىتى قاراستىرىپ, ولارعا قاجەتتى رەسۋرستاردى ۇسىنۋ كەرەك. اسىرەسە اۋىل جاستارىنىڭ دامۋىنا قولايلى ورتا قالىپتاستىرۋ قاجەت, – دەيدى تاعدىرىمەن تالاي تىڭدارمانعا شابىت سىيلاعان قايسار ءانشى.