موناكودا شاحماتتان الەمدىك گران-پري دوداسىنىڭ ءۇشىنشى كەزەڭى مارەگە جەتتى. وكىنىشكە قاراي, بۇل جارىستا ەلىمىزدىڭ ەڭ ۇزدىك ويىنشىسى ءبيبىسارا اساۋباەۆاعا ساتتىلىك سەرىك بولمادى.
بليتستەن ەكى دۇركىن الەم چەمپيونى, راپيدتەن الەم بىرىنشىلىگىنىڭ كۇمىس جۇلدەگەرى, ازيا چەمپيونى دەگەن اتاعى بار قازاق قىزى تۋرنير بارىسىندا بىردە-ءبىر رەت جەڭىسكە جەتە المادى. موناكودا ءبيبىسارا توعىز كەزدەسۋدىڭ ۇشەۋىندە ۇتىلىپ, التى رەت تەڭ ءتۇستى. ناتيجەسىندە, نەبارى 3 ۇپاي جيعان ول ەڭ سوڭعى 10-ورىندا قالىپ قويدى. بۇل جارىستا الەكساندرا گورياچكينانىڭ باعى جاندى. فيدە-ءنىڭ تۋى استىندا ونەر كورسەتكەن 26 جاستاعى رەسەيدىڭ وكىلى 5,5 ۇپاي جيىپ, باس جۇلدەنى ولجالادى. ءدال سونداي ناتيجە كورسەتكەن ۇندىستاندىق حامپۋ كونەرۋ مەن موڭعوليالىق باتحۋياگ مۋنگۋنتۋل ەكىنشى, ءۇشىنشى ورىندى ءوزارا ءبولىستى.
وسىعان دەيىنگى ەكى كەزەڭنىڭ قورىتىندىسى بويىنشا ب.اساۋباەۆا جارىس كەستەسىندە كوش باستاپ تۇرعان ەدى. قورجىنىندا 197,5 ۇپايى بار ول ەكىنشى ورىنعا سىرعىپ ءتۇستى. كوش باسىنا ا.گورياچكينا شىقتى. ورىنبور وبلىسىنىڭ تۋماسى 236,67 ۇپايدى ەنشىلەدى. ۇزدىك ۇشتىكتى قىتايلىق تان چجۋني (170 ۇپاي) تۇيىندەپ تۇر. الەمدىك گران-پري دوداسىنىڭ ءتورتىنشى كەزەڭى 14–25 ناۋرىز ارالىعىندا كيپردە وتەدى.