ءۇندىستاننىڭ باس شاھارى – نيۋ-دەليدەگى «تياگارادج» ۇلتتىق ستاديونىندا قازاق كۇرەسىنەن الەم چەمپيوناتى اياقتالدى. ەكى كۇنگە سوزىلعان سايىستا جەر جاھاننىڭ 20-دان اسا مەملەكەتىنەن كەلگەن 200-گە جۋىق بالۋان باق سىنادى. ولار 16 سالماق دارەجەسى بويىنشا مەدالدار جيىنتىعىن ساراپقا سالدى.
جارىستىڭ اشىلۋ سالتاناتىندا Qazaq kuresi قاۋىمداستىعىنىڭ باس ديرەكتورى دامير بەكبوسىنوۆ: ء«ۇندىستاندا قازاق كۇرەسى بەلسەندى تۇردە دامىپ كەلەدى. بۇگىنگە دەيىن اتالعان مەملەكەتتە سپورتتىڭ وسى تۇرىنەن ءتورت رەت ەل چەمپيوناتى ۇيىمداستىرىلدى. سىزدەردىڭ ءتول ونەرىمىزگە قىزىعۋشىلىق تانىتىپ جۇرگەندەرىڭىز – ءبىز ءۇشىن ۇلكەن ماقتانىش. ەكىجىلدىقتىڭ باستى دوداسىندا باق سىنايتىن بالۋاندارعا ساتتىلىك تىلەيمىن, دەدى.
ەرلەر اراسىنداعى باسەكە سەگىز سالماقتا ءوتىپ, سونىڭ جەتەۋىندە ءبىزدىڭ جىگىتتەر قارسىلاس شاق كەلتىرمەدى. اتاپ ايتساق, بەكجان تولەپوۆ (55 كگ), مەيىرجان بەرەكەتوۆ (60 كگ), نۇر امانشۇكىروۆ (66 كگ), جۇماجان قوجامبەكوۆ (74 كگ), ەرسىن سەيىتقازىنوۆ (82 كگ), ايدوس عالىموۆ (90 كگ), ەرسۇلتان مۇزافاروۆ (100 كگ) باس جۇلدەنى قانجىعالارىنا بايلادى. تەك اسا اۋىر سالماقتا قازاق بالۋاندارى توپ جارا المادى. فينالدا نۇرداۋلەت جارىلقاپوۆ جەڭىلىستىڭ كەرمەك ءدامىن تاتتى. وزبەكستاننىڭ الىبى مۇقسىن حۋسسيمۋدينوۆقا ەسە جىبەردى. جۇلدەلى ورىندى يەلەنگەندەر قاتارىندا ءۇندىستان, گرۋزيا, ازەربايجان, پولشا, تاجىكستان, ەستونيانىڭ اپايتوستەرى بار.
ايەلدەر سايىسىندا ايجان جىلقىباەۆا (48 كگ), راۋزا نۇرمۇحامبەتوۆا (56 كگ), زارينا ءزارىپوۆا (65 كگ), ءالبينا باقيەۆا (+77 كگ) التىننان القا تاقتى. روزا نىسانتايقىزى (70 كگ) فينالدا نيدەرلاندتىق سەم ۆان دۋننان ۇتىلىپ, كۇمىس مەدالدى ەنشىلەدى. ارۋجان اداسقان (52 كگ) مەن گ ۇلىم ەلۋباي (60 كگ) قولا مەدالدى يەلەندى. وزگە سالماق دارەجەلەرىندە سيتورا ەلمۇرودوۆا (52 كگ), ۇندىستاندىق اننۋ اننۋ (60 كگ), گرۋزيالىق نينو ودزەلاشۆيلي (77 كگ) وزدى.
سپورتتىق ءىس-شارا بارىسىندا UWW تەحنيكالىق دەلەگاتى ونۋر شيمشەك Qazaq kuresi قاۋىمداستىعىنىڭ باس ديرەكتورى دامير بەكبوسىنوۆتىڭ بىرىككەن كۇرەس الەمىنىڭ (UWW) ۇلتتىق كۇرەس تۇرلەرى كوميتەتى اتقارۋشى كەڭەسىنىڭ مۇشەلىگىنە قابىلدانعانىن جاريالادى.
تاعى ءبىر ايتا كەتەرلىك جايت, تورتكۇل دۇنيەنىڭ 40-تان استام مەملەكەتىندە قازاق كۇرەسى فەدەراتسيالارى جۇمىس ىستەيدى. بۇگىنگە دەيىن سپورتتىڭ وسى تۇرىنەن 10 الەم چەمپيوناتى, 12 ازيا بىرىنشىلىگى, 6 الەم كۋبوگى مەن 6 ەۋروپا چەمپيوناتى ءوتتى. 2023 جىلى قازاق كۇرەسى ەر-رياد قالاسىندا وتكەن دۇنيەجۇزىلىك جەكپە-جەك ويىندارىنىڭ باعدارلاماسىنا تۇڭعىش رەت ەندى. 2024 جىلعى V دۇنيەجۇزىلىك كوشپەلىلەر ويىندارى اياسىنداعى قازاق كۇرەسى جارىسىنا 46 مەملەكەتتەن 300-دەن استام سپورتشى قاتىستى. قازاق كۇرەسى ويىندارداعى ەڭ كوپ سپورتشى قاتىسقان سپورت ءتۇرى بولىپ تانىلدى.