«اۋىرلىعى تابىتتاي, جەڭىلدىگى كوبىكتەي» تەرەڭ جىر تەمىرەنى جۇمەكەن تۇڭعيىعىنىڭ كىلتى ارىدە. جاڭا ۋاقىت الماسقان سايىن جۇمباق اقىنعا دەگەن وقىرمان ىقىلاسى دا ارتىپ كەلەدى.
مەملەكەت باسشىسىنىڭ ۇلتتىق قۇرىلتايدا «جاپپاي كىتاپ وقيتىن ۇلتقا اينالۋىمىز كەرەك» دەگەن باستاماسىن نەگىزگە الا وتىرىپ, ء«بىر ەل – ءبىر كىتاپ» رەسپۋبليكالىق اكتسياسى اياسىندا كورنەكتى اقىن جۇمەكەن ناجىمەدەنوۆتىڭ شىعارمالارى جونىندە ورتالىق كىتاپحانادا ادەبي ءدارىس ءوتتى. حالىقارالىق «الاش» ادەبي سىيلىعىنىڭ لاۋرەاتى, جۇمەكەنتانۋشى امانگەلدى كەڭشىلىك ۇلى «جۇمەكەننىڭ جۇمباعى» اتتى تاقىرىپتا ءسوز ءوربىتىپ, كەلەلى ويدىڭ كورىگىن قىزدىردى.
– ءبىر كۇنى اكەم جۇمەكەن ناجىمەدەنوۆتى ۇيگە ەرتىپ الىپ كەلدى. سول شاقتا اقىندى العاش رەت كورگەن ەدىم. وتە سىپايى, اسا كوپ سويلەمەيتىن كىسى ەكەن, ولەڭدەرىن دە وقىپ بەردى. مۇنىڭ ءبارىن ءوزىمنىڭ «قوڭىر كۇزدەگى كەزدەسۋ» دەگەن ەسسەمدە جازعانمىن. جالپى, جۇمەكەن شىعارماشىلىعى تۋرالى ايتقاندا, كوپ ىركىلىپ قالا بەرەمىز. ونىڭ سەبەبى, اقىننىڭ تەرەڭدىگى, ينتەللەكتۋالدىق قۋاتىنىڭ جوعارىلىعىنان دەپ تۇسىنەمىن. ماسەلەن, اقىننىڭ ولەڭىنە جازىلعان اندەر ءۇش-تورتەۋ عانا بولار. ال كوبى جۇمەكەن ناجىمەدەنوۆتى ءانۇراننىڭ اۆتورى دەپ قانا تانىپ جاتادى. بۇل دۇرىس ەمەس, اقىننىڭ عاجايىپ ولەڭدەرى وتە كوپ, – دەدى سىنشى امانگەلدى كەڭشىلىك ۇلى.
لەكتسيادا جۇمباق اقىننىڭ الەم ادەبيەتىندەگى ۇستازدارى, اۋدارمالارى مەن ەڭبەكقورلىعى حاقىندا جان-جاقتى ايتىلدى. كەلگەن قوناقتار كوكەيدەگى ساۋالدارىن قويىپ, تۇشىمدى جاۋاپ الدى. «رۋح جىرى» اتتى جيناعىن الا كەلگەن سىنشى امانگەلدى كەڭشىلىك ۇلى, بولاشاقتا جىر جۇلدىزى تۋرالى كىتاپتى تولىقتىرىپ شىعارۋ ويىندا بار ەكەنىن جەتكىزدى.