تايلاندتىڭ استاناسى بانگكوكتە ازيانىڭ ەڭ ۇزدىك ايماقتىق سپورتشىلارى باس قوساتىن «Aiga asian championship 2025» ءتۋرنيرى ءوتتى. ازيانىڭ ءتۇرلى ەلدەرىنەن كەلگەن مىقتى سپورتشىلار كۇش سىناسقان تارتىستى جارىستان بەينەۋلىك قوس سپورتشى, اكەلى-بالالى جەڭىس قايرانوۆ پەن ەركەبۇلان يسلامعالي جەڭىسپەن ورالدى.
ماڭعىستاۋدا اعايىندى سپورتشى جىگىتتەر جەڭىس پەن شىڭعىستىڭ ەسىمى كوپكە ءمالىم. جاستار اراسىندا اعالى-ءىنىلى قوس جىگىتتىڭ جاتتىعۋىنا قاتىسىپ, سولارعا ەلىكتەپ, سپورتپەن اينالىسىپ جۇرگەندەر از ەمەس. جەڭىس بۇگىندە سپورتتاعى جەڭىستى جولىن ۇلىمەن بىرگە جالعاپ كەلەدى. ءبىر اۋداننىڭ عانا ەمەس, ەلىمىزدىڭ اتىن اسقاقتاتىپ, جەڭىس جالاۋىن جەلبىرەتىپ جۇرگەن اكەلى-بالالى سپورتشىلار قاجىرلى ەڭبەگىنىڭ ارقاسىندا بانگكوكتە توپ جاردى. ەركەبۇلان يسلامعالي 15-17 جاس ارالىعىنداعى جاسوسپىرىمدەر اراسىندا 55 كيلو سالماقتا 1-ورىنعا يە بولدى. جەڭىس قايرانوۆ 20 جاستان اسقان ەرەسەكتەر اراسىندا, 60 كيلو سالماقتا ءبىرىنشى ورىندى جەڭىپ الدى.
اكەلى-بالالىلاردىڭ جەڭىسى بەينەۋ اۋدانىنىڭ سپورتتىق الەۋەتىن تاعى ءبىر مارتە كورسەتكەن, بارشاعا ۇلگى بولارلىق جەتىستىك بولدى.
قوس سپورتشىنىڭ جەڭىسى تۋرالى وڭىرلىك كوممۋنيكاتسيالار قىزمەتىنىڭ حابارلاماسىندا: «جەڭىس قايرانوۆ پەن ەركەبۇلان يسلامعالي – گرەپپلينگ تاريحىندا ايرىقشا ءىز قالدىراتىن سپورتشىلار, ولاردىڭ جەڭىسى وتباسىلىق قۇندىلىقتارعا نەگىزدەلگەن, قاجىرلى ەڭبەك پەن ءداستۇر ساباقتاستىعىنىڭ جەمىسى», دەپ جازىلعان.
ماڭعىستاۋ وبلىسى