ەلوردادا بەلگىلى قوعام قايراتكەرى ورازكۇل اسانعازىنىڭ «وتباسى بەرەكەسى» اتتى جاڭا كىتابىنىڭ تۇساۋكەسەر ءراسىمى بولىپ ءوتتى. سالتاناتتى ءىس-شاراعا سەنات دەپۋتاتى نۇرتورە ءجۇسىپ, قوعام قايراتكەرلەرى ءادىل احمەتوۆ, سۆەتلانا جالماعامبەتوۆا, سايلاۋ باتىرشا ۇلى, اكادەميك كارىمبەك قۇرماناليەۆ, بىرقاتار زيالى قاۋىم وكىلدەرى قاتىستى.
«بۇل كىتاپتى جازۋدا ءار قازاق وتباسىنىڭ بوساعاسى كەڭ, شاڭىراعى بيىك بولسىن دەگەن نيەتتى ماقسات تۇتتىم. كەزىندە ءبىر جاس كەلىنشەك مەنىڭ جاس وتباسىعا ايتقان اقىل-كەڭەسىمدى تىڭداپ اجىراسۋ رايىنان قايتقانىن ايتتى. وسىنداي شىنايى وقيعالار دا «وتباسى بەرەكەسى» كىتابىن جازۋىما تۇرتكى بولدى. وتباسىندا ەر مەن ايەلدىڭ ورنى بالا ءۇشىن ماڭىزدى. ۇلتتىق قۇندىلىق ناسيحاتتالاتىن, وتباسىلىق ورتاداعى رۋحاني بىرلىكتى ارتتىرۋعا ىقپال ەتەتىن تۋىندى وقىرمانعا ۇنايدى دەپ ۇمىتتەنەمىن», دەدى ورازكۇل اسانعازى. قوعام قايراتكەرى بۇل جيناعىندا ءومىر تاجىريبەسىنە سۇيەنىپ, وتباسىنداعى تاربيەنىڭ ماڭىزىنا, اتا-انا مەن ۇرپاق اراسىنداعى ساباقتاستىق پەن وتباسىلىق بەرەكەنى ساقتاۋ ماسەلەلەرىنە جان-جاقتى توقتالادى. تاعىلىمدى جيناق ءۇش تاراۋعا بولىنگەن, ءار تاراۋدا وتباسى قۇندىلىقتارىنا, ۇرپاق تاربيەسىنىڭ وزەكتىلىگىنە باسا ءمان بەرىلەدى.
جيىندا بەلگىلى عالىم, ديپلومات ءادىل احمەتوۆ «وتباسى بەرەكەسى» كىتابى بولاشاققا جاڭادان قادام باسقان جاس وتباسىلار ءۇشىن تاپتىرماس دۇنيە ەكەنىن ايتتى.
«بۇل كىتاپتى اۋەلى جاستار وقۋى كەرەك. جاقسى ماقساتقا ۇمتىلىپ جۇرگەن جاستارعا كوبىرەك قاجەت. اۆتوردىڭ ءوزى – جاستارعا ۇلگى. جاستارعا ارنالعان كىتاپ بولعاندىقتان, ەنە مەن كەلىننىڭ ورنى, بالاعا قانداي انا بولۋى كەرەك دەگەندەي ءتۇرلى كەڭەس ايتىلادى. ءبىر دەممەن وقىلاتىن كىتاپ. كىتاپتى جازۋ كەزىندە اۆتوردىڭ ىزدەنىسى بايقالادى, وتاندىق عالىمداردىڭ ەڭبەگىنە ۇڭىلگەن. تەبىرەنبەي وقىماۋ مۇمكىن ەمەس», دەدى ءا.احمەتوۆ.
القالى جيىنعا كەلگەن زيالى قاۋىم وكىلدەرى كىتاپتىڭ قوعامداعى ماڭىزىنا ءۇڭىلىپ, ويلارىن ورتاعا سالدى. ءىس-شارا سوڭىندا ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ قازاق وركەسترى ۇجىمىنىڭ ديريجەرى نۇرلان بەكەنوۆتىڭ ورىنداۋىندا كۇي وينالىپ, ونەردەن شاشۋ شاشىلدى.