ەكىنشى دۇنيەجۇزىلىك سوعىستا بوراعان بومبا مەن جاۋعان وقتىڭ استىندا ءجۇرىپ, جارالى جاۋىنگەرلەرگە جاردەم قولىن سوزعان قازاق قىزدارى از بولماعان. سولاردىڭ ءبىرى – «سوتسياليستىك قازاقستان» (قازىرگى «Egemen Qazaqstan») گازەتىنىڭ 1943 جىلدىڭ 6 ماۋسىمىنداعى №118 سانىندا سۇلتان قوجانياز ۇلىنىڭ «مايدانداعى قازاق قىزى» اتتى ماقالاسى.
سۇراپىل سوعىس قىزىپ, انتالاعان اجال القىمنان العان ءسات. جاڭبىرداي جاۋعان وق, بۇرشاقتاي بوراعان سناريادتاردىڭ اراسىندا ارپالىسىپ ءجۇرىپ, اتى-ءجونى بەلگىسىز ءبىر قازاق قىزى تاماشا ەرلىك كورسەتەدى. جۇزدەگەن جاۋىنگەردى اجالدان امان الىپ قالادى.
«قازاق قىزى بوراعان بومبانىڭ, جاۋعان وقتىڭ استىندا جۇگىرىپ ءجۇرىپ جاردەم بەردى: جاراسىن تاڭدى, اۋىر جارالىلاردى ارقالاپ, تىلعا تاسىدى. «مىنا قازاق قىزى قورقۋدى بىلمەيدى. نەتكەن جۇرەكتى جان دەسەڭشى», دەپ تاڭداندى جۇرت» دەپ جازادى ماقالا اۆتورى.
ۇرىس سوزىلىپ, جاۋ كۇش الىپ, قىزىل اسكەردەن نەبارى 60 اۆتوماتشى مەن ەكى پۋلەمەتشى عانا قالادى. كەنەت پۋلەمەتشىنىڭ ءبىرى وققا ۇشىپ, يەسىز قارۋدى قازاق قىزى الادى دا, ءتونىپ كەلگەن جاۋعا وق جاۋدىرا باستايدى. جاۋ اسكەرى كوپ قىرعىنعا ۇشىراپ, كەرى شەگىنەدى.
شەگىنگەن جاۋدى قۋىپ كەلە جاتىپ, اۆتوردىڭ ءوزى قالپاقتاي ۇشقان. بىرەر مينۋت ەس-ءتۇسسىز جاتىپ ەسىن جيعاندا الگى قازاق قىزى جىگەرلەندىرە سويلەپ, باسىن سۇيەپ وتىرعانىن ايتادى.
ماقالا اۆتورى باتىر قىزدىڭ اتى-ءجونىن سۇراماعانىنا وكىنىپ, وعان ويىنشا «قازاق قىزى» دەگەن ات قويىپ الادى. اۋرۋحانادا ەكى اي ەمدەلىپ, باسقا قالاعا كەلگەندە باياعى قىزبەن قايتا جولى تۇيىسەدى.
ء«جون سۇراستىق. – تەرەڭوزەكتە تۋىپ, قىزىلوردا, الماتى قالالارىندا ءوستىم, – دەپ باستادى قىز ءسوزىن. – 1936 جىلى قىزىلورداداعى مەديتسينالىق تەحنيكۋمدى ءبىتىردىم. سول جىلى الماتىداعى مەديتسينا ينستيتۋتىنا ءتۇسىپ, 1940 جىلى ءبىتىرىپ شىققانمىن. ءبىر جىلدان كەيىن ارميا قاتارىنا الىندىم. سودان بەرى الداعى لينياداعى اۋرۋحانادا بولىپ, مۇندا جاقىندا عانا كەلدىم. بىرنەشە قاندى قىرعىننىڭ ىشىندە بولدىم», دەپ قىز ءسوزىن تۇيىقتاپ بەردى», دەيدى سۇلتان قوجانياز ۇلى.
قىزىعى, «سوتسياليستىك قازاقستان» گازەتىندە جاريالانعان ماتەريالدا مايدانداعى قازاق قىزىنىڭ اتى سول كۇيى اتالماعان. قىزىلوردا وبلىسى تەرەڭوزەك اۋدانىنا قاراستى «قىزىل ديحان» ۇجىمشارىنداعى قايرالاپ قارتتىڭ جالعىزى ەكەنى عانا تىلگە تيەك بولىپتى.
قازاق قىزى قايرالاپوۆانىڭ بۇدان كەيىنگى تاعدىرى مۇلدەم بەلگىسىز. بەلگىلىسى, جەر الەمدى سۇم سوعىستىڭ وتى وراعاندا شىبىن جانىن شۇبەرەككە ءتۇيىپ, قاناتىمەن سۋ سەپكەن قارلىعاشتارىمىز بولعان.
ول قارلىعاشتىڭ رۋحى قازاقپەن بىرگە ماڭگىلىككە جاساي بەرمەك.