الماتىدا – الاپات ايقاس

جارىستىڭ باستى باسەكەسىن­دە ەركىن كۇرەس شەبەرلەرى – امەريكالىق كايل سنايدەر مەن قازاق ريزابەك ايتمۇحان ايقاسادى. ريزابەكتىڭ ەسىمى ەلىمىزدىڭ ەركىن كۇرەس شەبەرلەرى اراسىنان شىققان تۇڭعىش الەم چەمپيونى رەتىندە تاريحتا قالدى. بۇل اتاققا 2023 جىلى بەلگرادتا قول جەتكىزدى. اكەسى قانات جولداسباەۆتىڭ قول استىندا جاتتىعاتىن 20 جاستاعى اسا دارىندى سپورتشىنىڭ باسقا دا اتاقتارى بار. ريزابەك اينال­دىرعان ءبىر جىل ارالىعىندا جاستار اراسىنداعى الەم بىرىن­شىلىكتەرىندە (U-20, U-23) ەكى مارتە توپ جاردى. 2023 جىلى استانادا, 2024 جىلى بىشكەكتە ۇيىمداستىرىلعان ازيا چەمپيوناتىندا كۇمىسپەن كۇپتەلدى.

ريزابەكتىڭ قارسىلاسى, 97 كگ سالماق دارەجەسىندە بەلدەسىپ جۇرگەن 29 جاستاعى اقش-تىڭ مەريليند شتاتىنىڭ تۋما­­سى اۋەلى جاستار بۋىنى ارا­سىن­داعى جارىستاردا ءوزىن تۇبە­گەي­لى مويىنداتتى. ەرە­سەك­تەر دۋى­نا قوسىلعاننان كەيىن كايل سنايدەر ريو وليم­پيا­دا­سى­نىڭ جەڭىمپازى, تو­كيو وليم­پياداسىنىڭ كۇمىس جۇل­دەگەرى اتا­نىپ, الەم چەمپيوناتتارىندا جەتى مارتە (3 التىن, 2 كۇمىس, 2 قولا) جەڭىس تۇعىرىنا كوتەرىلدى. الەم كۋبوگىن 2, پانامەريكا ويىن­دارىن 3, پانامەريكا چەمپيوناتىن 7 رەتتەن ۇتتى.

ەركىن كۇرەستەن وتەتىن جارىستا ازامات داۋلەتبەكوۆ تە (86 كگ) ونەر كورسەتەدى. سەمەي ءوڭىرىنىڭ تۋماسى ماگومەدحا­بيب كاديماگومەدوۆپەن كۇش سىناسادى. ازامات – الەم چەم­پيو­ناتى­نىڭ ەكى دۇركىن قولا جۇل­­دەگەرى, ازيا­نىڭ ءۇش دۇركىن چەم­پيونى. داعىستاندا دۇنيەگە كەلگەنىمەن بەلارۋستىڭ اتىنان سىنعا ءتۇسىپ جۇرگەن قار­سىلاسى 2020 جىلى توكيو وليم­­پياداسىندا كۇمىس, الەم كۋبو­گىندە قولا, ەۋروپا چەمپيو­نا­تىندا التىن الدى. سونداي-اق­ رەسەيلىك زاۋر ۋگۋەۆ (توكيو وليم­پياداسىنىڭ جەڭىم­پازى, الەم­نىڭ ەكى دۇركىن چەمپيونى, الەم كۋبوگىنىڭ يەگەرى), ءاليحان جاب­رايلوۆ (الەم چەمپيو­ناتى­نىڭ قولا جۇلدەگەرى, ەۋروپا چەمپيونى, الەم كۋبوگىنىڭ ەكى دۇركىن يەگەرى), احمەد ۋسمانوۆ (الەم مەن ەۋروپا چەمپيونى, الەم كۋبوگىنىڭ يەگەرى), گرۋزيالىق اۆتا­نديل كەنچادزەنىڭ دە (الەم چەم­­پيونى, الەم چەمپيوناتى­نىڭ كۇمىس جۇلدەگەرى, ەۋروپا ويىندارى مەن قۇرلىق بىرىنشىلىگى­نىڭ ءتورت دۇركىن قولا جۇلدەگەرى) ونەرى جان­كۇيەرلەردى بەيجاي قالدىر­مايدى دەگەن ويدامىز.

گرەك-ريم كۇرەسىنەن قىرعىز اقجول ماحمۇدوۆ پەن فرانتسۋز يبراگيم گانەم سايىسقا تۇسەدى. «اكۋلا» دەگەن بۇركەن­شىك ەسىممەن تانىلعان ايىر قال­پاق­تى اعايىنىمىز توكيو وليم­پياداسىندا كۇمىس, پاريج وليم­پياداسىندا قولا مەدالدى موينىندا جارقىراتتى. ەكى دۇركىن الەم, ءۇش دۇركىن قۇرلىق چەمپيونى اتاندى. ازيا ويىن­دارىندا كۇمىسكە قول سوزدى. اقجولمەن ايقاساتىن تەگى مى­سىرلىق مارقاسقا سوڭعى ەكى دۇنيە­جۇزىلىك دودادا ءبىر التىن مەن ءبىر كۇمىستى قورجىنعا سالدى. الاتاۋ باۋرايىندا بەلدەسۋگە بەل بۋعاندار قاتارىندا كۋبالىق گابريەل روسيلو مەن لۋيس ورتا سانچەز, ارمەنيالىق سلاۆيك گالستيان مەن ايك حلويان, بەلارۋس كيريلل ماسكەۆيچ, رەسەيلىك ارتۋر سارگسيان سىندى ساڭلاقتار بار.

ايەلدەر كۇرەسى دە كوپشىلىك نازارىنا ۇسىنىلادى. بۇل ورايدا جانكۇيەر قاۋىم ءجاميلا باق­بەرگەنوۆا مەن ايپەرى مەدەت­قىزىنىڭ تارتىسىن تاعاتسىزدانا كۇتەدى. قازاق قىزى الەمنىڭ ءتورت (3 كۇمىس, 1 قولا), ازيانىڭ بەس ­(3 التىن, 1 كۇمىس, 1 قولا) چەمپيوناتىندا ولجا سالدى. ازيا ويىندارىندا كۇمىس مەدالدى موينىندا جارقىراتتى. قىرعىز قىزى دا مىقتى بالۋاندار ساناتىندا. ول الەم چەمپيوناتى (1 كۇمىس, 1 قولا) مەن ازيا ويىندارىندا (1 التىن, 1 قولا), قۇرلىق بىرىنشىلىگىندە (2 التىن, 3 كۇمىس) بەس رەت اتوي سالدى. قوس ارۋ ءوزارا بىرنەشە مارتە ايقاستى, ءبىر-ءبىرىنىڭ قىر-سىرىن جاقسى بىلەدى. وسى جايتتىڭ ءوزى الداعى بەلدەسۋدىڭ اسا تارتىستى بولاتىنىن اڭعارتادى.

الماتىداعى جارىستا ەسىم­دەرى جوعارىدا اتالعانداردان بولەك, باسقا دا ءبىر شوعىر اتاقتى ­بالۋاندار ونەر كورسەتەدى.