بۇگىن الماتىداعى وڭىرلىك كوممۋنيكاتسيالار قىزمەتىنىڭ ءباسپاسوز ماجىلىسىندە «ەكومەد» ەمحاناسىنىڭ رەپرودۋكتيۆتى مامانى ايگەريم احمەتوۆا 2025 جىلى الماتىداعى «ەكومەد» ادام رەپرودۋكتيۆتى ەمحاناسى ەكستراكورپورالدى ۇرىقتاندىرۋ (ەكۇ) مەن قوسالقى رەپرودۋكتيۆتى تەحنولوگيالاردىڭ (قرت) تيىمدىلىگىن ارتتىرا الاتىن بەدەۋلىكتى ەمدەۋدىڭ جاڭا ادىستەرىن ەنگىزەتىنى تۋرالى باياندادى, دەپ حابارلايدى Egemen.kz.
ء«بىز ۇرىقتاندىرۋدىڭ تابيعيلىققا بارىنشا جاقىنداتۋعا مۇمكىندىك بەرەتىن Piezo ICSI ءادىسىن بەلسەندى تۇردە ەنگىزىپ جاتىرمىز, سونىمەن قاتار ەمبريونداردى تالداۋدا جاساندى ينتەللەكت قولدانامىز», دەيدى مامان.
ماماننىڭ ايتۋىنشا, ەمحانا انالىق جاسۋشالار مەن ەمبريونداردى كريوكونسەرۆاتسيالاۋدى قولدانۋدى كەڭەيتىپ وتىرسا, بۇل ايەلدەرگە ۇرپاقتى بولۋ جاسۋشالارىنىڭ ساپاسىن جوعالتپاي بوسانۋدى كەيىنگە قالدىرۋعا مۇمكىندىك بەرەدى.
سونداي-اق الماتىدا تۇقىم قۋالايتىن اۋرۋلاردى جوققا شىعارۋعا مۇمكىندىك بەرەتىن سوڭعى زەرتحانالىق دياگنوستيكالىق ادىستەر, يمپلانتاتسياعا دەيىنگى گەنەتيكالىق تەستىلەۋ باعدارلامالارى, جىنىس جاسۋشالارىن كريوكونسەرۆاتسيالاۋ ادىستەرى ەنگىزىلىپ جاتقانىن دا ايتا كەتكەن ءجون.
«تەحنولوگيالاردىڭ دامۋى مەن قالانىڭ عىلىمي الەۋەتىنىڭ ارقاسىندا ءبىز تالاي وتباسىنا ءسابيلى بولۋعا كومەكتەسىپ قانا قويماي, گەنەتيكالىق پاتولوگياعا بايلانىستى قاۋىپتەردىڭ الدىن الامىز», دەپ اتاپ ءوتتى مامان.