بۇگىن مەملەكەت باسشىسى بيزنەس-قوعامداستىق وكىلدەرىمەن كەزدەسۋدە ۇكىمەتكە ققس مولشەرلەمەسى بويىنشا ۇسىنىسى جوعارى ەكەندىگىن ناقتى ايتقانى ءمالىم. وسى ورايدا ءماجىلىس دەپۋتاتى مارحابات جايىمبەتوۆتەن پىكىر ءبىلدىرۋىن سۇراعان ەدىك, دەپ جازادى Egemen.kz.
«قوعامدا قوسىلعان قۇنعا سالىناتىن سالىققا قاتىستى (ققس) ماسەلە تۋىنداپ, ءبىراز تالقىعا ءتۇسىپ جاتىر. وسى ورايدا ايتپاعىم «جەتى رەت ولشەپ, ءبىر رەت كەس» دەگەن دانا حالقىمىزدىڭ قاعيداسىن ۇستانعان ءجون», دەدى دەپۋتات.
ەسكە سالايىق, اتالعان كەزدەسۋدە پرەزيدەنت مەملەكەت ءۇشىن جانە ءاربىر ازامات ءۇشىن ماڭىزدى كەز كەلگەن شەشىمدەر بيزنەسپەن, ساراپشىلارمەن جانە دەپۋتاتتارمەن تالقىلانعاننان كەيىن عانا قابىلدانۋى ءتيىس ەكەنىن تۇسىندىرگەنى ءمالىم.
«ەكونوميكانى, بيزنەستى جانە ازاماتتاردى قولداۋ ءۇشىن ءوز ۇسىنىستارىن ۇسىنعان ساراپشىلار دا مەملەكەت باسشىسىنىڭ كوزقاراسىمەن تولىقتاي كەلىسەدى», دەدى ماجىلىسمەن.
دەپۋتات بۇنداي كۇردەلى كەزەڭدە رەفورمانى قالاي جۇرگىزۋ كەرەكتىگىنە دە توقتالدى.
«ارينە, وسىنداي قىم-قۋىت, الماعايىپ كەزەڭدە جايباراقاتتىق بولمايدى. بىراق, اپتىقپاعان دۇرىس. كەز كەلگەن رەفورمانى جان-جاقتى ساراپتاپ, ەگجەي-تەگجەيلى ەلەكتەن وتكىزىپ, سارالاپ, بايىپپەن جۇرگىزگەن ءجون», دەدى ءماجىلىس دەپۋتاتى.
م.جايىمبەتوۆتىڭ پىكىرىنشە بۇل تۇستا مەملەكەت باسشىسى اتاعانداي, بارىنشا وڭتايلى شەشىم قاجەت.
«ياعني ءبىر جاعىنان بيزنەس جۇرگىزۋگە كەدەرگى كەلتىرمەي, قولايلى جاعداي جاسايتىن, ال ەكىنشى جاعىنان, سالىققا قاتىستى ءتارتىپتى كۇشەيتىپ, بيۋدجەت كىرىسىن ارتتىراتىن ءتيىمدى جولدى تابۋىمىز قاجەت», دەپ تۇيىندەدى دەپۋتات.