مەملەكەت باسشىسى قاسىم-جومارت توقاەۆ پرەزيدەنت قىزمەتىنە كىرىسكەلى ەلدە حالىقتىڭ ءال-اۋقاتىن ارتتىرۋ باعىتىندا اۋقىمدى جۇمىستار اتقارىلدى. بىرقاتار ساياسي-ەكونوميكالىق رەفورما ىسكە اسىرىلدى. مەملەكەتتىك باسقارۋ, ازاماتتىق باقىلاۋدى كۇشەيتۋ, سوت جۇمىسىندا اشىقتىقتى قامتاماسىز ەتۋ سەكىلدى باستامالار كوپتىڭ كوكەيىندەگىسىن ءدوپ باستى دەۋگە بولادى.
الايدا كەيىنگى جاڭا جاعدايداعى قازاقستاننىڭ ساياسي رەفورمالارىنىڭ دامۋ ديناميكاسىندا تەجەۋ بار. ويتكەنى كەز كەلگەن رەفورمانى ءبىر جارلىقتىڭ نە زاڭنىڭ كۇشىمەن قوعام ساناسىنا ءسىڭىرۋ مۇمكىن ەمەس. ەڭ الدىمەن, سانادا رەفورما بولۋ قاجەت. ال ءبىزدىڭ سانامىز 30 جىل بويى ستاگناتسيادا بولدى. ەندى كەلىپ جاڭا رەفورمالىق شەشىمدەر قابىلدانىپ, بىردەن وزگەرىس بولا قالاتىن, قوعامدىق سانا ول – ماشينا ەمەس. كەي وزگەرىستەرگە راسىمەن حالىق دايىن بولمادى. فورماتسيادان وتپەدىك. بىزدە بيلىك پەن قوعامنىڭ اراسىنداعى قارىم-قاتىناستاردىڭ وزىندىك ءبىر زاڭدى ەرەجەلەرى قالىپتاسپادى. سوندىقتان رەفورمالاردى, وزگەرىستەر ەنگىزگەن كەزدە بيلىكتىڭ تاراپىنان دا, قوعام تاراپىنان دا قارىم-قاتىناستاردىڭ, بىلايشا ايتقاندا بالانس بەرۋ ارەكەتتەرىندە دايىندىق بولماي شىقتى. قازىر بۇل بىرتىندەپ قالىپتاسىپ كەلە جاتىر.
ەلدەگى وزگەرىستەرگە, نەشە ءتۇرلى ساياسي رەفورمالارعا, ءتىپتى دەموكراتياعا سىرتقى فاكتورلار دا ءوز اسەرىن تيگىزەدى. ماسەلەن, رەسپۋبليكا كولەمىندەگى كەي سالاداعى كىدىرىس الەمدە بۇرىن-سوڭدى بولماعان اسا كۇردەلى گەوساياسي احۋالدىڭ ىقپالىنان بولىپ وتىر. وسىنداي تەتىكتەردى تىزبەكتەسەك, بىزدە جاھان جۇرتىمەن ساناساتىن جاعدايلار كوپ ەكەنىن ەسكەرۋىمىز قاجەت.
ودان كەيىن رەفورمالاردىڭ دامۋ ديناميكاسىنداعى تەجەۋ حالىقتىڭ ءال-اۋقاتىنا تىكەلەي بايلانىستى. قانداي دا ءبىر زاڭدى ەنگىزىپ, قۇجات ەل تۇرعىندارىنىڭ تۇرمىستىق الەۋەتىنە كەرى اسەرىن تيگىزىپ وتىرسا, بۇل ءتيىمدى رەفورما دەپ ايتا المايمىز. سوندىقتان پرەزيدەنتتىك باستامالاردىڭ ۋاقتىلى ناتيجە كورسەتپەۋى, وزگەرىستەر بولماۋى ەكونوميكالىق تەتىكتەرگە دە بايلانىستى.
سايىپ كەلگەندە, ساياسي جۇيەدەگى سەڭنىڭ قوزعالۋى حالىقتىڭ الەۋمەتتىك جاعدايىنىڭ جاقسارىپ, وزىندىك قوعامدىق-ساياسي كوزقاراسىنىڭ قالىپتاسۋىنا دا بايلانىستى.
ەرمۇرات باپي,
ءماجىلىس دەپۋتاتى