كۇي قازىناسى – بابا تانىمنىڭ بالاماسىز ۇلگىسى, رۋح مازداعى. «الەمدە ءتورت مۇحيت بار. بەسىنشى مۇحيت – كۇي», دەگەن ءابىش كەكىلباي ۇلى. قازاقتىڭ كىسىلىگى مەن قاسيەتى ساقتالعان اسقاق ونەردىڭ اناسى اتانعان دينا نۇرپەيىسوۆانىڭ ومىردەن وتكەنىنە بيىل – 70 جىل.
ەلوردادا قازاقستاننىڭ حالىق ءارتىسى, داۋلەسكەر كۇيشى-كومپوزيتور دينا نۇرپەيىسوۆانى ۇلىقتاۋ ءىس-شاراسى ءوتىپ, ونەر مەرەكەسى كۇيشىنىڭ ەڭسەلى ەسكەرتكىشىنە گۇل شوقتارىن قويۋ راسىمىنەن باستالدى.
مۇنان سوڭ ە.راحماديەۆ اتىنداعى مەملەكەتتىك فيلارمونيانىڭ كامەرالىق زالىندا «دينا – كۇي اناسى» اتتى كونتسەرت ءوتتى. ونىڭ القيسساسىندا كۇيشى حاقىندا ەسكى كادرلاردان اڭىز تۇلعانىڭ بەت-بەينەسى كورەرمەنگە كورسەتىلدى. قازاق وركەسترىنىڭ باس ديريجەرى ايتقالي جايىموۆتىڭ جەتەكشىلىگىمەن كۇي اناسىنىڭ ىرگەلى مۇرالارى تىڭدارمانعا جەتتى. «تويباستاردان» باستالىپ, «كەربەز» كۇيىمەن قوستالعان ادۋىن كۇيلەر وتكەن عاسىرداعى قازاق جانىنىڭ, ۇلت رۋحىنىڭ وتكەن-كەتكەنىن سازعا قوسقانداي. سونىمەن قاتار قازاقستاننىڭ ەڭبەك سىڭىرگەن قايراتكەرى انار مۇزداحانوۆا «بايجۇما», مۇحيت سالىبەكوۆ «شىنار», ەستاي ايتقۇلوۆ «قارا قاسقا ات», ساعي بايمۇحات «انا», ايىم بەكباەۆا «بۇلبۇل» كۇيىن ورىنداپ, كوپشىلىكتىڭ كوزايىمىنا اينالدى. ال «ون التىنشى جىل» كۇيى قازاقتىڭ قايتپاس مىنەزىن, بەرىك جىگەرىن, ازاتتىقتى كوكسەگەن ارمان-تىلەگىن اڭعارتىپ, جىگەرىمىزدى جانىدى.
«دينا اجەمىزدىڭ ونەرىنە كەزىندە بۇكىل ماسكەۋ قول سوققان. شىنىندا, 76 جاسىندا ۇلكەن ساحناعا العاش رەت شىققان كۇيشى ەرەكشە ادام بولعان. كەزىندە احمەت جۇبانوۆتىڭ ۇيىتقى بولۋىمەن
دينا نۇرپەيىسوۆانى سوناۋ الىس اۋىلدان الماتىعا الدىرىپ, و كىسىنى قازاق ينتەلليگەنتسياسى كۇتىپ العان ەكەن. ساحناعا شىعارىپ كۇي تارتقىزعاندا ەرەكشە تامسانعان اقاڭ بۇرىنعى كۇيشىلەردەن اجەمىزدىڭ تارتىسى ەرەكشە ەكەنىن مويىندايدى. اسىرەسە قۇرمانعازىنىڭ «تورەمۇراتىن» تارتقاندا وڭ قولى ساحناعا سىيماي كەتتى دەپ جازادى. وسى ارقىلى دينا نۇرپەيىسوۆانىڭ اسقان شەبەرلىگىن, ۇستازىن ناسيحاتتاۋداعى ەڭبەگىن, كىسىلىك ۇلگىسىن كورسەتكەن», دەدى كۇيشى, ۇستاز, قازاقستاننىڭ ەڭبەك سىڭىرگەن قايراتكەرى ايتجان توقتاعان.
قالالىق مادەنيەت باسقارماسى, ە.راحماديەۆ اتىنداعى فيلارمونيا جانە رەسپۋبليكالىق «كۇي اناسى» قورى ۇيىمداستىرىپ وتىرعان ءىس-شارادا دينا نۇرپەيىسوۆانىڭ ءومىرى مەن شىعارماشىلىعى كەڭىنەن دارىپتەلىپ, مۋزىكالىق مۇراسىنا قۇرمەت كورسەتىلدى.
2021 جىلدىڭ 3 شىلدەسىندە, كۇيشى-كومپوزيتوردىڭ تۋعانىنا 160 جىل تولۋى قارساڭىندا «دومبىرا كۇنى», «كۇي اناسى» اتاۋىمەن رەسپۋبليكالىق قور قۇرىلىپ, جۇمىس ىستەپ كەلەدى. قوعامدىق قور استانا تورىنەن كۇي اناسىنا ارناپ ءزاۋلىم ەسكەرتكىشتىڭ بوي كوتەرۋىنە باستاماشى بولدى. ال ەسكەرتكىش جانىنان «قازاق ەلىنىڭ كۇيشىلەرى مەن كۇيشى-كومپوزيتورلارى» اتاۋىمەن اللەيا اشىلىپ, ەل رۋحانياتىن كۇيشىلىك ونەرىمەن بايىتقان 101 كۇيشىنىڭ ەسىمى مارمارعا قاشالىپ جازىلعان ەسكەرتكىش تاس بوي كوتەردى. ەلىمىز بويىنشا 800-دەن استام مادەني ءىس-شارا ۇيىمداستىرىلىپ, پروفەسسور ك.ساحاباەۆانىڭ «اسەمقوڭىر», پروفەسسور ت.قۋانىشەۆتىڭ «كۇي اناسى», قازاقستاننىڭ ەڭبەك سىڭىرگەن ءارتىسى ا.ۇلكەنباەۆانىڭ «دينا نۇرپەيىسوۆا» اتتى ەڭبەكتەرى جارىق كوردى.