پرەزيدەنتتىڭ «كەلەشەك» ەرىكتى جيناقتاۋ جۇيەسىن ەنگىزۋ جونىندەگى باستاماسىن ىسكە اسىرۋ ماقساتىندا مەملەكەتتىك ءبىلىم بەرۋ جيناقتاۋ جۇيەسى سالاسىنىڭ وپەراتورى – «قارجى ورتالىعى» مەن ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى مەموراندۋمعا قول قويدى.
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك ءبىلىم بەرۋ جيناقتاۋ جۇيەسى, اقپارات, قوعامدىق دامۋ, مادەنيەت جانە ارحيۆ ءىسى سالالارىندا ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنا سايكەس بيىلدان باستاپ 5 جاسقا تولعان بالالارعا بىرجولعى باستاپقى ءبىلىم بەرۋ كاپيتالى تولەنە باستايدى.
«كەلەشەك» ەرىكتى جيناقتاۋ جۇيەسى – بالالار 18 جاسقا تولعانعا دەيىن قارجىلىق رەسۋرستاردى تۇراقتى تۇردە جيناقتاۋدى قولداۋعا ارنالعان مەملەكەتتىڭ قوسىمشا تەتىگى. جاستاردىڭ ەلدە جانە شەتەلدە ءبىلىم الۋ قىزمەتتەرى ءۇشىن, ونىڭ ىشىندە جوعارى ءبىلىم, سونداي-اق تەحنيكالىق جانە كاسىپتىك ءبىلىم الۋدا جيناقتاۋ جۇيەسىنە قاتىسۋعا اتا-انالار بانكتەن دەپوزيت اشادى. سونىمەن بىرگە مەملەكەتتىك ءبىلىم بەرۋ جيناقتاۋ جۇيەسىنىڭ مۇشەسى سانالاتىن ءومىردى ساقتاندىرۋ كومپانيالارىمەن كەلىسىمشارت جاساۋعا ءتيىس. بالا 5 جاسقا تولعان كەزدە مەملەكەت 60 ايلىق ەسەپتىك كورسەتكىش مولشەرىندە باستاپقى ءبىلىم بەرۋ كاپيتالى بولىنەدى (بيىل بۇل كورسەتكىش 235 920 تەڭگە), ال جەتىم بالالار ءۇشىن 120 اەك (471 840 تەڭگە), سونداي-اق جىل سايىن 5-7 پايىز كولەمىندە مەملەكەتتىك سىياقى جانە دە قاتىسۋشى بانكتىڭ سىياقىسى نەمەسە ءومىردى ساقتاندىرۋ كومپانياسى شارتىنان بولىنەتىن ينۆەستيتسيالىق كىرىس تولەنەدى. «كەلەشەك» جۇيەسىنىڭ شارتى – اتا-انالاردىڭ 12 نەمەسە 24 اەك-تەن كەم ەمەس مولشەردە ەنگىزەتىن جىل سايىنعى مىندەتتى جارناسى. ال اسىرۋشىسى جوق بالالار ءۇشىن جىل سايىنعى جارنا تالاپ ەتىلمەيدى.
«مەملەكەت باسشىسىنىڭ تاپسىرماسىن ىسكە اسىرۋ ماقساتىندا قولعا الىنعان «كەلەشەك» بىرىڭعاي ەرىكتى جيناقتاۋ جۇيەسى بالالاردى 18 جاسقا تولعانعا دەيىن قارجىلىق رەسۋرستاردى تۇراقتى تۇردە جيناقتاۋدى قولداۋعا ارنالعان مەملەكەتتىڭ قوسىمشا تەتىگى. ونىڭ ماقساتى – جاستاردىڭ ەلىمىزدە جانە شەتەلدە ءبىلىم الۋىن قامتاماسىز ەتۋ. مەموراندۋمعا قول قويۋ ارقىلى ءبىز جاستاردىڭ ءبىلىم الۋى مەن دامۋىنا قولايلى ورتا قالىپتاستىرۋعا قادام جاساپ وتىرمىز. جوعارى ءبىلىم الۋ – كەلەشەك ماماندىققا باستاعان جول عانا ەمەس, سونداي-اق جاستاردىڭ بويىنداعى الەۋەتى مەن قابىلەتىن ىسكە اسىرۋىنا, ەلىمىز دامۋىنا ءوز ۇلەسىن قوسۋعا بەرىلگەن مۇمكىندىك. ەگەر دە بولاشاق تۇلەك گرانتپەن وقۋعا ءتۇسىپ كەتەتىن بولسا, وندا جيناقتاۋ قورىنداعى جيناقتارىنا باسپانا الا الادى. بۇل بالالاردىڭ بولاشاقتا الەۋمەتتىك جاعدايىنىڭ جاقسارۋىنا دا ۇلكەن قولداۋ بولماق», دەدى «قارجى ورتالىعى» اق باسقارما توراعاسى اسقار يبرايموۆ.
باعدارلاماعا قاتىساتىن بولاشاق تۇلەكتەرگە ەلەۋلى جەڭىلدىكتەر قاراستىرىپ وتىرعان جوعارى وقۋ ورنى ساتباەۆ ۋنيۆەرسيتەتى «كەلەشەك» ەرىكتى جيناقتاۋ جۇيەسىنە قاتىسۋشىلارعا 20-50 پايىزعا دەيىن جەڭىلدىكتەر رەتىن جاريالادى. ناقتى ايتقاندا, اتا-اناسىنىڭ قامقورلىعىنسىز قالعان تالاپكەرلەرگە وقۋ اقىسىنىڭ جالپى سوماسىنان – 50, كوپبالالى وتباسىنان شىققان تالاپكەرلەرگە – 30, تۇرمىس جاعدايى تولىق قامتىلماعان وتباسىنان شىققان تالاپكەرلەرگە – 25, باسقا ساناتتاعى تالاپكەرلەرگە 20 پايىزعا دەيىن جەڭىلدىكتەر بەرىلەدى.
رەكتور مەيرام بەگەنتاەۆ: «كەلەشەك» باعدارلاماسىن ىسكە اسىرۋ – مەملەكەت باسشىسىنىڭ باستاماسىن قولداۋ عانا ەمەس, بۇل ەڭ الدىمەن, جاستاردىڭ بىلىمگە قولجەتىمدىلىگىن قامتاماسىز ەتۋ باعىتىنداعى نەگىزگى ماقسات-مۇددەمىزدى ىسكە اسىرۋ بولىپ تابىلادى. ءبىز تەحنيكالىق ءبىلىم بەرۋدى ساپالى ءارى قولجەتىمدى ەتىپ, جاستار ءومىرىن جاقسارتاتىن جاڭا يننوۆاتسيالار جاساۋعا تىرىسىپ جاتىرمىز. سوندىقتان دا باعدارلاماعا قاتىسۋشىلارعا قارجىلىق جەڭىلدىكتەر ۇسىنا وتىرىپ, ساپالى, زاماناۋي ءبىلىم الىپ, عىلىمي قاۋىمداستىقتان ءوز ورنىن الۋىنا قولايلى مۇمكىندىكتەر ۇسىنامىز», دەدى ول.
اكادەميالىق ماسەلەلەر جونىندەگى پرورەكتور, تەحنيكا عىلىمدارىنىڭ دوكتورى, پروفەسسور رايسا وسكەنباەۆانىڭ ايتۋىنشا, قازىرگى كەزدە ۋنيۆەرسيەتتە ءبىلىم الىپ جاتقان 14 مىڭ ستۋدەنتتىڭ 70 پايىزى گرانتتا وقيدى. دەسەك تە, گرانت قاراستىرىلماعان ماماندىقتار بار. بولاشاق تۇلەكتەر ءوز تاڭداعان باعىتىندا ءبىلىم الۋىنا ۋنيۆەرسيتەت ۇلكەن جەڭىلدىكتەر بەرە وتىرىپ, ولاردىڭ جاڭا زامان مامانى بولۋىنا قولايلى جاعداي تۋعىزىپ وتىر. «كەلەشەك» باعدارلاماسى ارقىلى تەحنيكا سالاسىنداعى وزىق ماماندىقتاردى يگەرۋگە مۇمكىندىك الۋىمەن قاتار, جيناقتاۋ قورىنداعى قارجىسىن باسپانا جاعدايىن جاقسارتۋعا, شەتەل وقۋ ورىندارىنا تۇسۋگە دە پايدالانا الادى. ال مەملەكەتتىك ءبىلىم بەرۋ گرانتىنا يە بولا الماعان جاعدايدا «كەلەشەك» باعدارلاماسى بويىنشا جالپى وقۋ قۇنىنىڭ جارتىسىن جيناقتاي العان تالاپكەرلەر ساتباەۆ ۋنيۆەرسيتەتىنە وقۋعا تۇسكەن كەزدە ارنايى جەڭىلدىكتەرگە يە بولادى.
الماتى