اسكەري بولىمدەگى ۆاگون-مۋزەي

ۆاگون ءىشى قۇقىقتىق ءتارتىپ اسكەرى اتقاراتىن جاۋىنگەرلىك قىزمەت جايىنداعى اقپاراتتار مەن ەستەلىكتەرگە تولى. سونداي-اق وسى قىزمەتكە قاتىستى جادىگەرلەر مەن ماكەتتەر قويىلعان.

– اسكەري ءبولىمنىڭ قۇرىلعان كۇنى­نە وراي كونتسەرتتىك باعدارلاما ۇيىمداستىردىق. وعان اسكەري ءبولىمنىڭ جەكە قۇرامى جانە قۇرمەتتى قوناقتار مەن ارداگەرلەر ارنايى شاقىرىلدى. ءبىز ساربازدار مەن ساردارلارعا اسكەري ءبولىمنىڭ تەرەڭ تاريحىنان سىر شەر­تىپ, مەرەكەلىك كوڭىل كۇي سىيلايمىز. سونداي-اق ءىس-شاراعا ايداۋىلداۋ ۆاگون مۇراجايىنىڭ اشىلۋىن دا قوستىق, – دەدى 6636 اسكەري ءبولىمنىڭ كومانديرى, پولكوۆنيك ەرلان بورانباەۆ.

ءداستۇرلى قىزىل تاسپانى اسكەري ءبولىمنىڭ كومانديرى ەرلان بورانباەۆ پەن 13 جىل بويى اۋداۋىلداۋ باتالونىندا قىزمەت اتقارعان زاپاستاعى پولكوۆنيك امانجول ەلەۋقۇلوۆ كەستى. وسىدان كەيىن اسكەري ءبولىم كۇنىنە ارنايى كەلگەن قوناقتار مەن ارداگەرلەر مۋزەي ءىشىن ارالاپ كوردى.

– مەن 22 جىل عۇمىرىمدى وسى اسكە­ري بولىمدە وتكىزىپپىن. بۇگىن مۋزەيگە اينالعان ۆاگونعا كىرگەندە ءوزىم قىزمەت اتقارعان شاقتار ەرىكسىز ويىما ورالدى. ماسەلەن, قابىرعادا ىلىنگەن كونە سۋرەتتەر ايداۋىلداۋ قىزمەتىنىڭ قالىپتاسۋ كەزەڭدەرى جايىندا قۇندى اقپارات بەرىپ تۇر, – دەپ ەسكە الدى ا.ەلەۋقۇلوۆ.

ۆاگون-مۋزەيدىڭ 6636 اسكەري بولىمىندە اشىلۋىنىڭ وزىڭدىك ءبىر ءمانى بار. Cەبەبى 1961 جىلى 20 قاڭتاردا تىڭ ولكەسىنىڭ قۇرىلۋىنا بايلانىستى قازاق كسر ىشكى ىستەر ءمينيسترىنىڭ №016 بۇيرىعىمەن قازاق كسر ءىىم ىشكى كۇزەتىنىڭ 246 جاساعى قۇرىلىپ, وعان №6636 اتاۋى بەرىلگەن ەدى. ونىڭ قۇرامىنا پەتروپاۆل, قوستا­ناي, پاۆلودار, اتباسار قالالارىندا, جولىمبەت, ۆيشنەۆكا, قۇسمۇرىن, الەكسەەۆكا كەنتتەرىندە ورنالاسقان 10 كوماندا جانە 2 جەكە توپ ەندى. جاساق شتابى تسەلينوگراد قالاسىندا ورنالاس­تى. ءبولىمنىڭ جەكە قۇرامى قۇرىلعان ساتتەن باستاپ ەڭبەكپەن تۇزەۋ كولونيا­لارىن كۇزەتۋ جونىندەگى ماڭىزدى مىن­دەتتەردى ورىندادى. سوتتالعانداردى جانە سوت پروتسەستەرى بارىسىندا قاماۋعا الىنعان ادامداردى, سونداي-اق اۆتوكولىك جانە تەمىرجول باعىتتارى بويىنشا اقمولا گارنيزونىنىڭ اسكەري سوتىندا ايداۋىلداۋدى جۇزەگە اسىردى.

ءىس-شارا بارىسىندا ۇلتتىق ۇلان ءان-بي ءانسامبلىنىڭ سوليستەرى مەن بيشىلەرى اسكەري ءبولىمنىڭ ساحناسىندا ونەر كورسەتىپ, قاراوتكەل اۋىلدىق وكرۋگىنىڭ وقۋشىلارىنان قۇرالعان «سەرپەر» توبى اسكەري قىزمەتشىلەرگە كۇيدەن شاشۋ شاشتى. سونداي-اق وتان الدىنداعى قىزمەتىن ابىرويمەن اتقارىپ جۇرگەن ءبىر توپ اسكەري قىزمەتشى مەن ساربازدار ماراپاتتالدى.

ايتا كەتسەك, قازىرگى ۋاقىتتا ءبولىم­نىڭ جەكە قۇرامى اقمولا گارنيزونى سوتتارىنىڭ قاراۋىلدارىن قامتاما­سىز ەتۋ بويىنشا قىزمەت اتقارادى, سونداي-اق ءىىم ۇلتتىق ۇلانىنىڭ باس قولباسشىلىعىن ماتەريالدىق جانە قىزمەتتىك قامتاماسىز ەتۋمەن اينالىسادى. مۇندا ءار جارتى جىل سايىن ازاماتتار ەلىمىزدىڭ تۇكپىر-تۇكپىرىنەن اسكەرگە شاقىرىلىپ, انت قابىلداپ, ساپقا قوسىلادى.