پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ەكونوميكانىڭ ناقتى سەكتورىن دامىتۋ ماسەلەلەرى بويىنشا كەڭەس وتكىزدى. كەڭەستە قىزىلوردا وبلىسىنىڭ ينۆەستيتسيالىق دامۋى قارالدى.
بىلتىر جالپى قۇنى 1,9 ترلن تەڭگەنى قۇرايتىن 86 ينۆەستيتسيالىق جوبانى ىسكە اسىرۋ جونىندەگى بەس جىلدىق باعدارلاما شەڭبەرىندە وڭىردە 411 جاڭا جۇمىس ورنى اشىلعان. جالپى, 37 ملرد تەڭگەگە 21 جوبا ىسكە اسىرىلعان. ونىڭ ىشىندە 6 جوبا قۇرىلىس ماتەريالدارىن ءوندىرۋ بويىنشا, 10 جوبا اگروونەركاسىپتىك سالادا, 1 جوبا كولىك لوگيستيكاسى سالاسىندا, قالعاندارى ساۋدا جانە ءبىلىم بەرۋ سالاسىنا قاتىستى. ءىرى جوبالاردىڭ قاتارىندا قورقىت اتا اۋەجايىنىڭ جاڭا تەرمينالى دا بار.
2025 جىلى قىزىلوردا وبلىسىندا مىڭعا جۋىق جۇمىس ورنىن قۇرىپ, 30,8 ملرد تەڭگە ءونىم شىعارۋعا مۇمكىندىك بەرەتىن 275,3 ملرد تەڭگەنى قۇرايتىن 24 جوبانى ىسكە قوسۋ جوسپارلانىپ وتىر. ءىرى زاۋىتتاردىڭ قاتارىندا جىلىنا 90 ملن دانا كىرپىش شىعاراتىن, تۇيە سۇتىنەن جىلىنا 392 توننا ۇنتاق وندىرەتىن, جولاۋشىلار ۆاگوندارىن جوندەيتىن جوبالار بار. قۋاتى 240 مۆت بولاتىن جاڭا جەو قۇرىلىسى دا – وسى قاتاردا.
«الداعى ۋاقىتتا جالپى قۋاتى 141 مۆت بولاتىن 4 كۇن جانە 1 جەل ەلەكتر ستانساسىنىڭ قۇرىلىسىن جۇزەگە اسىرۋدى جوسپارلاپ وتىرمىز. وبلىستىڭ ەلەكتر ەنەرگياسىنا دەگەن سۇرانىسى تاۋلىگىنە 200 مۆت-تى قۇرايدى, وڭىردە جالپى قۋاتى 89 مۆت بولاتىن 9 كۇن ەلەكتر ستانساسى جۇمىس ىستەيدى. 5 جوبا ىسكە قوسىلعاندا ءوڭىرىمىز تولىعىمەن جاسىل ەنەرگەتيكاعا كوشەدى», دەپ اتاپ ءوتتى وبلىس اكىمىنىڭ ورىنباسارى ارداق زەبەشەۆ.
سىرتقى ىستەر مينيسترلىگى ينۆەستيتسيالار كوميتەتى قاتىسۋشىلارعا ۇلتتىق تسيفرلىق ينۆەستيتسيالىق پلاتفورمانى ياعني ينۆەستورلاردىڭ, مەملەكەتتىك ورگانداردىڭ جانە كۆازيمەملەكەتتىك سەكتوردىڭ ءوزارا ءىس-قيمىلى ءۇشىن بىرىڭعاي تەرەزە مۇمكىندىكتەرىن تانىستىردى. بۇگىندە پلاتفورما پۋلىندا 836 جوبا بار, ونىڭ 246-سىن وسى جىلى جۇزەگە اسىرۋ جوسپارلانعان.
كەڭەستە وبلىستاعى ەكى ءىرى ينۆەستيتسيالىق جوبانى جۇزەگە اسىرۋعا قاتىستى تۇيتكىلدى ماسەلەلەر تالقىلاندى. بۇل – «شالقيا» پوليمەتالل كەن ورنىنىڭ تيىمدىلىگىن ارتتىرۋ جانە كالتسيلەندىرىلگەن سودا وندىرەتىن زاۋىت سالۋ. اتاپ ايتقاندا, تاعامدىق جانە ونەركاسىپتىك اس تۇزىن, پوليپروپيلەندى قاپشىقتار شىعاراتىن «ارالتۇز» اق قازىر ەلىمىزدەگى كالتسيلەنگەن سودا شىعاراتىن العاشقى زاۋىت قۇرىلىسىنىڭ جوباسىن قولعا العان. شىنى بوتەلكەلەردى وندىرۋگە قاجەتتى بۇل شيكىزات كومپونەنتى ەلىمىزدە تولىعىمەن يمپورتتالادى. جوبا ايتارلىقتاي ينۆەستيتسيالاردى قاجەت ەتەدى, نەسيەلىك قارجىلاندىرۋ مەرزىمدەرى مەن شارتتارىن ۇزارتۋ بويىنشا ماسەلەلەر بار. ۆيتسە-پرەمەر ءتيىستى قارجى ينستيتۋتتارىنا جوبانى قولداۋ ءۇشىن بارلىق مۇمكىندىكتى قاراستىرۋدى تاپسىردى.
«مەملەكەتتىك ورگاندار ينۆەستيتسيالىق جوبالاردى جۇزەگە اسىرۋداعى كەدەرگىلەردى جويۋدا بيزنەسكە بارىنشا كومەك كورسەتۋى كەرەك. 2025 جىلعا ارنالعان 246 جوبانىڭ ماقساتى – جاقسى كورسەتكىش, وعان جەتۋ ءۇشىن مۇمكىندىگىنشە بارلىق كەدەرگىنى جويىپ, ۋاقتىلى قارجىلاندىرۋدى قامتاماسىز ەتۋ كەرەك. ول ءۇشىن قىسقا مەرزىم ىشىندە ينۆەستيتسيالار كوميتەتى ونەركاسىپ مينيسترلىگىمەن جانە اكىمدىكتەرمەن بىرگە باسىم سالا ءارى جوعارى قوسىلعان قۇن قاعيداتى بويىنشا جوبالاردى گراداتسيالاۋدى جۇرگىزۋى قاجەت. سونىمەن قاتار ناتيجەلەرگە سۇيەنە وتىرىپ, ولاردى جۇزەگە اسىرۋعا قولداۋ ءبىلدىرۋى كەرەك», دەپ قورىتىندىلادى جيىندى سەرىك جۇمانعارين.