تاڭبالاۋ ۇدەرىسىنىڭ تىنىسى اشىلدى

ۇكىمەتتە دارىلىك زاتتاردى تاڭبالاۋ ءارى قوزعالىسىن باقىلاۋ جۇيەسى جۇمىسىنىڭ ارالىق ناتيجەلەرى قاراستىرىلدى. پرەمەر-ءمينيستردىڭ ورىنباسارى تامارا دۇي­سەنوۆانىڭ توراعالىعىمەن وتكەن كەڭەس­كە دەنساۋلىق ساقتاۋ مينيسترلىگى, «سق فار­ماتسيا», «قازاقتەلەكوم» كومپانيا­لارىنىڭ وكىلدەرى قاتىستى.

دەنساۋلىق ساقتاۋ ۆيتسە-ءمينيسترى ەربول وسپانوۆتىڭ كەلتىرگەن دەرەگىنشە, جۇيە ەنگىزىلگەلى بەرى ەلدەگى ەمدەۋ مەكەمەلەرى 16,5 ملن, ال ءدارىحانالار 21,5 ملن-نان اسا تاڭبالانعان دارىلىك زاتتاردى قابىلداعان. سونىمەن قاتار شامامەن 12 ملن ءدارى قاپتاماسىن ساتقان.

ايتا كەتۋ كەرەك, دارىلىك زاتتاردى تاڭبالاۋ جانە باقىلاۋ جۇيەسى ەلىمىزدە وندىرىلگەن نەمەسە سىرتتان اكەلىنگەن ءاربىر ءدارى-دارمەكتىڭ اينالىمنان تولىق الىپ تاستاعانعا دەيىنگى قوزعالىسىن ونلاين رەجىمىندە قاشىقتان باقىلاۋعا مۇمكىندىك بەرەدى.

– باستى ماقسات – ازاماتتاردى قاۋىپسىز ءارى ساپالى ءدارى-دارمەكپەن قامتاماسىز ەتۋ. اشىق باقىلاۋ كونترافاكتىلى دارىلەردىڭ اينالىمعا تۇسۋىنە جول بەرمەيدى جانە دەنساۋلىق ساقتاۋ مينيسترلىگى مەن جەرگىلىكتى اكىمدىكتەرگە ەمدەۋ مەكەمەلەرىنىڭ دارىلىك زاتتارمەن قامتىلۋ دەڭگەيىن باقىلاۋعا جاعداي جاسايدى. سونداي-اق ءدارى-دارمەك­تىڭ ماقساتتى قولدانىلۋىن قاداعالاۋ­عا مۇمكىندىك بەرەتىنىن اتاپ وتكىم كەلەدى. سوندىقتان بۇل تەتىكتى مەيلىنشە پايدالانا وتىرىپ, قاجەت بولعان جاعدايدا ءتيىستى شارالاردى قابىلداۋ قاجەت, – دەپ تاپسىردى ت.دۇيسەنوۆا.