سالىعى مەن سالىمى كوپ بانكتەر

كوش باسىندا – «Kaspi.kz»

ەڭ ءىرى سالىق تولەۋشى – «Kaspi.kz». 2023 جىلدىڭ قورىتىندىسىندا ولار­دىڭ سالىق اۋدا­رىمدارى 230 ملرد تەڭگەدەن اسقان. «Kaspi.kz» قۇرا­مى­نا قىزمەتىن ەل اۋماعىندا جۇزەگە اسىراتىن 11 ەنشىلەس ۇيىم كىرەدى (شەتەلدىك «ەنشىلەستەرى» بەلگىلى سەبەپتەرمەن ەسەپكە الىنبادى). ەكىنشى ورىندا – «Halyk Bank». ولار ەنشىلەس ۇيىمدارىمەن بىرىگىپ بىلتىر 222 ملرد تەڭگە سالىق تولەگەن. «Kaspi.kz» پەن «Halyk» تولەگەن سالىقتىڭ جال­پى سوماسى 450 ملرد تەڭگەنى نەمەسە ەلىمىزدەگى ەڭ ءىرى 12 بانك تولەگەن بارلىق سالىقتىڭ 64%-ىن قۇرادى.

ۇزدىك ۇشتىكتى BCC توبى اياقتاپ تۇر. «تسەنتركرەديت بانكى» جانە ءتورت «ەنشىلەسى» 64,6 ملرد تەڭگە بەرگەن. العاشقى بەستىككە «وتباسى بانك» (38,4 ملرد تەڭگە) جانە «ەۋرازيالىق بانك» توبى (37,8 ملرد تەڭگە) كىردى.

قازانداعى جاعداي بويىنشا ەكىن­شى دەڭگەيدەگى بانك اكتيۆتەرىنىڭ سوما­سى ءبىر جىلدا 21,4%-عا, 58,1 ترلن تەڭ­گە­گە دەيىن ءوستى. بەس جىلدىق كەزەڭدە اك­تيۆ­تەر بىردەن 2,2 ەسە ءوستى. سونىمەن قاتار ەدب اكتيۆتەرىنىڭ ەلدىڭ ىشكى جالپى ونىمىنە اراقاتىناسى ءبىر جىلدا 43,1%-دان 46,5%-عا دەيىن ارتتى.

سالىمدار 16%-عا ۇلعايدى

«Ranking.kz» سايتىنىڭ مالىم­دە­ۋىن­شە, بۇل تۇرعىدا ەلىمىز­دەگى تەك 14 بانك وڭ ديناميكا كورسەتكەن. قالعان 7 ەدب مۇنداي ناتيجەگە جەتە المادى. بيىلعى قاراشادا بيزنەستىڭ سالىمى 16,6 ترلن تەڭگەنى قۇرادى, بۇل 2023 جىلدىڭ ءدال وسىن­داي كەزەڭىمەن سالىستىرعاندا 15,7%-عا كوپ. بۇل تۇرعىدا ەدب-نىڭ بارلىعى ءوسىم كورسەتە المادى: ەلى­مىز­دەگى تەك 14 بانك وڭ ديناميكا كور­سەتسە, 7 قارجى ينستيتۋتى تەرىس كورسەت­­كىشتەرگە يە.

زاڭدى تۇلعالار سالىمىنىڭ ءوسىمى بويىنشا «Bereke Bank» كوش­باسشى اتاندى, ءبىر جىلدا قارجى 50,4%-عا, 770,8 ملرد تەڭگەگە دەيىن ءوستى. ەكىنشى ورىنعا «شينحان بانك قازاقستان» ورنالاستى: ءبىر جىلدا سالىم مولشەرى 46,8%-عا, 685,2 ملرد تەڭگەگە دەيىن وسكەن. ۇزدىك ۇشتىكتى «ForteBank» تۇيىندەدى, سالىمدار 38,1%-عا, 1,9 ترلن تەڭگەگە دەيىن كوبەي­دى. بيزنەس سالىمدارىنىڭ ءوسىمى بويىنشا العاشقى بەستىككە «تسەنتر­كرەديت بانكى» (+31,3%-عا) جانە «Kaspi Bank» (+29,1%) تە ەندى.

اكتيۆ العا جىلجىدى

بيىل قاراشا ايىنا قاراي وتاندىق بانكتەردىڭ اكتيۆتەرى 58,5 ترلن تەڭگەگە جەتتى. بۇل ءبىر اي بۇرىنعى كورسەتكىشكە قاراعاندا 0,6%-عا كوپ. كورسەتكىشتىڭ جىلدىق ءوسىمى – 20,8%. اكتيۆتەردى ۇستاۋشى بانكتەردىڭ ۇزدىك وندىعى اراسىندا ايلىق ديناميكا بويىنشا 5 ەدب عانا وڭ كورسەتكىش كورسەتتى, ال جالپى سەكتور بويىنشا تەك 9 بانك بار. ءبىر ايلىق وسىمدە «Bank RBK» كوش باستاپ تۇر. ءوسىم 3,8%-عا, 2,3 ترلن تەڭگەگە دەيىن ارتتى. ءبىر جىل ىشىندە بانك اكتيۆتەرى بىردەن 28,1%-عا ءوستى. قارجى ينستيتۋتىنىڭ نەسيە پورتفەلى 1,3 ترلن تەڭگەگە جەتتى, ءبىر ايدا 0,9%-عا, ءبىر جىلدا 38%-عا ۇلعايدى. بانك كرەديتتەرىنىڭ جالپى كولەمىندەگى NPL 90+ ۇلەسى بار بولعانى 3,1%-دى قۇرادى ء(بىر جىل بۇرىن – 3,3%).

ۇزدىك ەدب اراسىندا اكتيۆتەردىڭ اي سايىنعى ءوسىمى بويىنشا ەكىنشى ورىندى «Kaspi Bank» يەلەندى ءوسىم 3,3%-عا, 7,7 ترلن تەڭگەگە دەيىن ارتتى. وسى كەزەڭدە بانكتىڭ نەسيە پورتفەلى 3,8%-عا كوبەيدى. NPL 90+ ۇلەسى – 4,9%. ۇزدىك ۇشتىكتى «تسەنتركرەديت بانكى» تۇيىندەدى, اكتيۆ قورجىنى 2,7%-عا, 6,2 ترلن تەڭگەگە دەيىن تولىقتى. كرەديتتىك پورتفەلى ءبىر ايدا 1,7%-عا ءوستى, ال ونداعى NPL 90+ ۇلەس سالماعى 1,5%-دى قۇرادى. سونداي-اق «Halyk Bank» (1,4% وسىممەن) جانە «Freedom Bank» (1% وسىممەن) ءبىر ايدا وڭ ناتيجەگە قول جەتكىزدى. اكتيۆتەر بويىنشا ۇزدىك وندىققا ەنبەيتىن ەدب اراسىندا «بانك ۆتب قازاقستان», قىتاي ساۋدا ونەركاسىپ بانكى, «نۇربانك» جانە «Home Credit Bank» اي سايىنعى كورسەتكىشتەر بو­يىنشا وڭ ديناميكاعا شىقتى.

ەدب-نىڭ جيىنتىق نەسيە پورت­فە­لى قاراشا ايىنا قاراي 33,8 ترلن تەڭگەگە جەتتى, بۇل ءبىر اي بۇرىن­عى كور­سەتكىشكە قاراعاندا 1,2%-عا جانە ءبىر جىل بۇرىنعى كورسەتكىشكە قاراعاندا, 20,4%-عا كوپ.