مۇگەدەك بالالاردىڭ اتا-انالارىن زەينەتكە ەرتە شىعارۋ ۇسىنىلدى

ء«ومىر مەن ءولىمنىڭ اراسىنان جەڭىلمەي شىققان جاس انا ءۇشىن دۇنيەگە كەلگەن سابيىنە «مۇگەدەك» دەگەن دياگنوزدىڭ قويىلعانى قانداي سوققى ەكەنىن سول انالاردىڭ وزدەرى عانا بىلەدى. وسىنداي ءزىل باتقان اۋىرتپاشىلىقتى قابىلداپ, كەلەشەك ءومىرىن تەك قانا سول بالاسىنىڭ جولىنا ارناۋعا تاۋەكەل ەتەتىن ارينە – انا. سوندىقتان دا ولاردى ناعىز ەرجۇرەك تۇلعالار دەپ ايتۋعا ابدەن بولادى. جانعا باتاتىنى, وسىنداي ەرلىك كورسەتكەن جاندارعا ءبىزدىڭ ءتيىستى جاناشىرلىق تانىتا الماي جۇرگەنىمىز», دەدى دەپۋتات ساۋالىندا.

دەپۋتاتتىڭ سوزىنشە ءاربىر انا بالا دەنساۋلىعى ءۇشىن جۇمىسىن دا, باسقا شارۋاسىن دا تاستاپ تاۋ اسىپ, شوق باسۋعا دايىن. ەرەكشە قاجەتتىلىگى بار بالانىڭ كۇندەلىكتى تەراپياسى, ەم-شاراسى, گيمناستيكالىق جاتتىعۋلارى, مەديتسينالىق وڭالتۋلارى, باسسەين نەمەسە تاعى دا باسقا قاجەتتى ەم-دومدارى بار. قالادا تۇراتىندار ءۇشىن بۇنىڭ ءوزى اۋىر. ال اۋىلدىق جەردە تۇراتىن اتا انالار ءۇشىن بۇل ۇلكەن قيىندىق.

«بالا كەزىنەن مۇگەدەكتىگى بار, ءتىپتى وزدىگىنەن تاماق تا ىشپەيتىن, سويلەي دە المايتىندارى قانشاما. ءتۋابىتتى سال اۋرۋىنا شالدىققان بالانى اياقتان تۇرعىزامىن دەپ تەك انالار عانا ماقسات قويادى. بالانىڭ تۇنىمەن بەبەۋ قاعىپ جىلاعانى – قيىندىقتىڭ بەر جاعى عانا. تاۋلىگىنە بىرنەشە رەت ەس-تۇسىنان ايرىلىپ, تالىپ قالاتىندار بار. بۇل اتا-اناعا فيزيكالىق تۇرعىدان عانا ەمەس, سونىمەن قاتار پسيحولوگيالىق تۇرعىدان دا اۋىر ەكەنى بەلگىلى», دەدى دەپۋتات.  

ت.سەرىكوۆ ساندىق دەرەكتى دە ۇسىندى. ايتۋىنشا, ەلىمىزدە 113 مىڭعا جۋىق مۇگەدەك بالا بار بولسا, ونىڭ 40 پايىزى اۋىلداردا تۇرادى.

ء«يا, قالالىق جەرلەردە ەرەكشە بالالاردى اپاراتىن ارنايى ورتالىقتار بار. وندا ەرەكشە بالانىڭ اناسى ۋاقىتشا دەمالۋ ءۇشىن الەۋمەتتىك قىزمەتكەر مۇگەدەك بالانى ءبىر مەزگىل وزدەرى الىپ كەتىپ, ورتالىق ماماندارى سول بالامەن اينالىسادى. ونىڭ ىشىندە ەم دومى, جاتتىعۋلارى بار. ال اۋىلدىق جەرلەردەگى اتا انالاردى نە ىستەيمىز؟ ولاردىڭ دا وتباسى, باسقا دا تىرلىگى بار ەمەس پە؟ سول سەبەپتى اۋىلدارداعى فاپ جانىنان وسىنداي ارنايى ورتالىقتار اشۋ كەرەك. سوندا اۋىلداعى مۇگەدەك بالالاردىڭ انالارى دا ۋاقىتشا دەمالىپ وتباسىنا قاراي الار ەدى», دەدى ول.

وسى ورايدا دەپۋتات ءوز ويلارى مەن ۇسىنىستارىن ورتاعا سالدى.

«انالاردىڭ تاجىريبەلەرى بولعاندىقتان باسقا بالاعا دا دۇرىس قاراپ كۇتىم جاساي الادى. سوندىقتان پەداگوگ-اسسيستەنت, الەۋمەتتىك قىزمەتكەر سياقتى ماماندىقتارعا اتا-انانىڭ بىرەۋىن قىسقا 2 جىلدىق مەرزىمدە باكالاۆرياتتا وقىتۋ قاجەت. مۇگەدەك بالاعا ءوز اتا-اناسىنان ارتىق قارايتىن ادام جوق. سول سەبەپتى بالانىڭ اتا-اناسىن وقىتىپ, ارنايى دايىندىقتان وتكىزۋ قاجەت, سول ارقىلى اتا-انانىڭ كۇتۋشى رەتىندە جۇمىسى دا بولادى, ەڭبەك ءوتىلى دە جوعالمايدى, دۇرىس كۇتىم بولعاندىقتان بالانىڭ دامۋى دا ارتا تۇسەدى. دامۋ ەرەكشەلىكتەرى بار بالاعا ءجيى كۇتىم جاساۋ اتا-انالارعا وڭاي ەمەس. قيىندىققا شىداماي وتباسىن تاستاعان اكەلەر دە قانشاما. سونداي ساتتەردە بالاسىنىڭ بار اۋىرتپاشىلىعىن ارقالاعان انالار فيزيكالىق عانا ەمەس, پسيحولوگيالىق تۇرعىدان دا قيىندىق كورىپ جاتىر. ء­ومىر بويى سىرقاتتانعان بالاسىن قاراعان اناعا زەينەتكە شىعۋ جەڭىلدىگى دە قاراستىرىلماعان. مۇگەدەك بالانىڭ جاعدايىمەن جۇمىسسىز جۇرگەن انانىڭ زەينەتاقىسى قانداي بولماق؟ سوندىقتان ەرەكشە بالانى تاربيەلەپ وتىرعان اتا-انانىڭ بىرەۋىنىڭ زەينەتاقى قورىنا مەملەكەت تاراپىنان تۇراقتى تۇردە قارجى سالىنۋ قاجەت دەپ ەسەپتەيمىن», دەگەن دەپۋتات وسىنداي انالاردى مۇمكىندىگىنشە زەينەت جاسىنا ەرتە شىعارۋ ماسەلەسىن قاراستىرۋ كەرەكتىگىن دە ايتتى.

تۇيىندەي كەلە, «اۋىل» پارتياسىنىڭ مۇشەسى تاڭساۋلە سەرىكوۆتىڭ ۇسىنىستارى كەلەسىدەي بولدى:

ەرەكشە بالانىڭ اتا-اناسىن زەينەتكە ەرتە شىعارۋ; اتا-انانىڭ بىرەۋىن پەداگوگ-اسسيستەنت, الەۋمەتتىك قىزمەتكەر مامانىدىعىنا قىسقا مەرزىمدە وقىتۋ; ەرەكشە بالا اتا-اناسىنىڭ بىرەۋىنىڭ زەينەت قورىنا مەملەكەت تاراپىنان تۇراقتى تۇردە قارجى سالۋ; بالاعا كۇتىم جاساعان جىلدارىن ەڭبەك ءوتىلى دەپ ەسەپتەۋ.