جىل باسىندا «وتباسى بانك» اق مەن «قازپوشتا» اق بىرلەسكەن ورتاق جوبانى قولعا العان ەدى. «پوشتاشى» دەپ اتالاتىن بۇل جوبا اۋىلداعى اعايىنعا اۋدان نەمەسە وبلىس ورتالىعىنا بارماي-اق, جەرگىلىكتى پوشتا قىزمەتكەرلەرىنىڭ كومەگىمەن دەپوزيت اشۋعا كومەكتەسەدى. بۇگىندە اتالعان باستامانىڭ يگىلىگىن كورىپ وتىرعان ادامدار از ەمەس.
ماسەلەن, قىزىلوردا وبلىسى جالاعاش اۋدانى مادەنيەت اۋىلىنىڭ تۇرعىندارى – بايماحانوۆتار وتباسى تاياۋدا جەرگىلىكتى پوشتاشى اقنۇر ابلايقىزىنىڭ كومەگىمەن ءتورت بالاسىنا دا «وتباسى بانكتە» دەپوزيت اشتى. ەندى ءار بالانىڭ جيناق قارجىسى بار. وتاعاسى باحىتبەك قۋاندىق ۇلى سول ارقىلى بالالارىنىڭ بولاشاعىن ويلاستىرىپ, ولاردىڭ الاڭسىز ءبىلىم الۋىنا جاعداي جاساۋدى كوزدەيدى.
«بۇگىنگى جاھاندانۋ زامانىندا ءارى نارىق بيلەگەن ۋاقىتتا ءار اتا-انا بالاسىنىڭ ەرتەڭىن ويلاپ, ولاردىڭ كەلەشەگىنىڭ قامىن قازىردەن-اق قولعا السا, ارتىق بولماس. سوندىقتان اقنۇر ابلايقىزىنىڭ كومەگىمەن ءتورت بالاما ارنايى شوت اشتىم. ارقايسىسىنا اي سايىن شاما-شارقىمىزعا قاراي قارجى اۋدارۋدى ادەتكە اينالدىرا باستادىق. «ەڭ قۇندى ينۆەستيتسيا – بالاعا قۇيىلعان قارجى» دەپ تەگىن ايتىلماسا كەرەك. بۇگىندە مەكتەپتە وقىپ جۇرگەن ۇل-قىزدارىمىز كوزدى اشىپ-جۇمعانشا وقۋ ورنىمەن قوشتاسىپ, ۇلكەن ومىرگە قادام باسادى. سول تۇستا اتا-اناسىنىڭ بۇگىننەن باستاپ تىرنەكتەپ جيناپ جۇرگەن قارجىسى تىرەك بولسا ەكەن دەيمىن», دەيدى باحىتبەك قۋاندىق ۇلى.
ءسويتىپ, بايماحانوۆتار وتباسى 12, 10, 8 جانە 6 جاستاعى بالالارى – ايحانىم, نۇرجۇما, زەرە مەن جاۋحارعا دەپوزيتتىك شوت اشىپ قويدى. سالىمدى دا ۋاقتىلى, تۇراقتى تۇردە جاساپ وتىر. سول ارقىلى ولاردىڭ ەرتەڭگى ءومىرىنىڭ كىرپىشىن قالاپ كەلەدى.
«بالالارعا دەپوزيت اشپاس بۇرىن نارىقتاعى جاعدايدى ءبىراز زەردەلەدىك. ناتيجەسىندە, تاڭداۋىمىز «وتباسى بانك» اق ۇسىنعان ونىمدەرگە ءتۇستى. بۇل بانكتىڭ دەپوزيتكە اۋدارىلاتىن پايىزدىق مولشەرلەمەسى وزگەلەرگە قاراعاندا اناعۇرلىم جوعارى. جىل سوڭىندا بەرىلەتىن 20 پايىزدىق مەملەكەتتىك سىيلىقاقى تاعى بار. دەپوزيتتى اۋىلىمىزدان شىقپاي-اق, جەرگىلىكتى پوشتا بولىمشەسىنە بارىپ اشتىق. بۇل دا ىڭعايلى. ەندى ءموبيلدى قوسىمشا ارقىلى كەز كەلگەن ۋاقىتتا قالاعان سومامىزدى اۋدارا الامىز. ءتيىمدى تۇسىنىڭ تاعى ءبىرى – وسى. قىسقاسى, بارلىق تالاپ-شارت كوڭىلىمىزدەن شىقتى. بولاشاقتا بالالارىم جيناق قارجىسىن ءوز يگىلىكتەرىنە قالاۋىنا قاراي جۇمساي الادى», دەيدى باحىتبەك قۋاندىق ۇلى.
بايماحانوۆتار اۋلەتىنىڭ جوسپارىن جۇزەگە اسىرۋعا ىقپال ەتىپ, وتباسىلىق پاكەت اشۋعا كومەكتەسكەن وپەراتور-كەڭەسشى اقنۇر ابلاەۆنا – ءوز ءىسىنىڭ مامانى. ۇزاق جىل بويى مادەنيەت اۋىلىندا پوشتا بولىمشەسىنىڭ مەڭگەرۋشىسى بولىپ ەڭبەك ەتىپ جۇرگەن ول جىل باسىندا «وتباسى بانك» اق وپەراتور-كەڭەسشى رەتىندە دە جۇمىسىن جالعاستىردى. وسىلايشا, «پوشتاشى» جوباسىنىڭ اياسىندا قوس قىزمەتتى قاتارىنان ءساتتى اتقارىپ كەلەدى.
«اۋىلداستارىم مەنى پوشتاشى رەتىندە بىلەدى. جىل باسىندا «وتباسى بانك» پەن «قازپوشتانىڭ» بىرلەسكەن جوباسى – «پوشتاشى» باستالعان سوڭ جەرگىلىكتى جۇرتشىلىققا قارجىلاي كەڭەس قىزمەتىن كورسەتۋگە دە كوشتىم. ياعني ەندى مەن اۋىلداعى اعايىنعا تەك حات-حابار جەتكىزۋدە ەمەس, قارجىلىق ماسەلەلەردى شەشۋدە دە كومەكتەسە الامىن. بۇل رەتتە ءبىزدىڭ باستى ميسسيامىز – دەپوزيتتەر اشىپ, ونى تولىقتىرۋعا كومەكتەسۋ, كەڭەس بەرۋ, يپوتەكالىق نەسيە راسىمدەۋدە باعىت-باعدار كورسەتۋ», دەيدى بىلىكتى مامان.
بۇگىندە مادەنيەت اۋىلىندا 2 مىڭعا جۋىق ادام تۇرادى. ولاردىڭ باسىم بولىگى وسى ۋاقىتقا دەيىن «وتباسى بانكتە» دەپوزيتتىك شوت اشىپ, كەيبىرى باسپانالى بولىپ تا ۇلگەرگەن ەكەن. «پوشتاشى» جوباسى اياسىندا اقنۇر ابلايقىزى تاعى 30-عا جۋىق ادامعا دەپوزيتتىڭ جاي-جاپسارىن ءتۇسىندىرىپ, باسىم تۇستارىن ايتىپ, شوت اشۋىنا قولۇشىن سوزدى.
«مەن پوشتاشى رەتىندە قىزمەت كورسەتۋمەن قاتار, وپەراتور-كەڭەسشى رەتىندە تۇرعىنداردىڭ قارجىلىق ساۋاتتىلىعىنىڭ ارتۋىنا, قاراجات جيناۋ مادەنيەتىن قالىپتاستىرۋىنا ىقپال ەتە الاتىنىم ءۇشىن قۋانىشتىمىن. بۇل ءوز كەزەگىندە اۋىلداستارىمنىڭ بولاشاققا دەگەن سەنىمىن نىعايتىپ, ولاردىڭ ارمان-ماقساتتارىنىڭ جۇزەگە اسۋىنا وڭ اسەر بەرەدى دەپ ويلايمىن. ءبىزدىڭ بۇل باعىتتاعى ەڭبەگىمىز ەش كەتىپ جاتقان جوق. باسپانالى بولۋدىڭ العاشقى قازىعى قاعىلىپ جاتىر. سونىمەن قاتار وسى باعىتتاعى جۇمىسىمىز «وتباسى بانك» تاراپىنان باعالانادى. ءار اشىلعان, تولىقتىرىلعان دەپوزيت, راسىمدەلگەن نەسيە ءۇشىن بونۋستار مەن سىياقىلار قاراستىرىلعان. مۇنداي ىنتالاندىرۋ ءبىزدىڭ كليەنتتەرمەن جۇمىس ىستەۋگە دەگەن نيەتىمىزدى ارتتىرىپ, جىگەرلەندىرە تۇسەدى. ءوزىمىزدى وزگەشە باعىتتا سىناپ كورۋگە, جاڭا باعىتتى تانۋعا كومەكتەسەدى. بانكتىك قىزمەت كورسەتۋ بويىنشا ءبىلىمىمىزدى تولىقتىرىپ, بىلىكتىلىگىمىزدى جەتىلدىرۋگە دە مۇمكىندىك بار. بۇل رەتتە «وتباسى بانكتىڭ» نەگىزگى قىزمەتكەرلەرى تاجىريبەسىمەن ءبولىسىپ, بىلمەگەنىمىزدى ۇيرەتىپ وتىرادى», دەيدى اقنۇر ابلايقىزى.
بايقاعانىمىزداي, «پوشتاشى» جوباسىنىڭ بەرەرى مول. ول ەلىمىزدىڭ شالعايداعى اۋىلدارىنىڭ تۇرعىندارىنا دەپوزيتتىك شوتتىڭ ماڭىزدىلىعىن كورسەتىپ, بانكتىك قىزمەتتەر الۋداعى ۋاقىتتى ايتارلىقتاي ۇنەمدەيدى. اقنۇر ابلايقىزى اتاپ وتكەندەي, بۇل باعىتتاعى جۇمىس جۇرتشىلىقتىڭ قارجىلىق ساۋاتتىلىعىن ارتتىرىپ, تابىسىن تىرنەكتەپ جيناپ, باسپانالى بولۋىنا كومەكتەسەدى. سوندىقتان اتالعان جوبانى وسى جىلدىڭ ماڭىزدى ءارى ناتيجەلى باستاماسى دەپ ايتۋعا تولىق نەگىز بار. وعان پوشتا بولىمشەسىنە اي سايىن كەلىپ نەمەسە ءموبيلدى قوسىمشانى پايدالانىپ, دەپوزيتتىك شوتتى بەلگىلى ءبىر سوماعا تولتىرۋدى يگى داستۇرگە اينالدىرعان ازاماتتار دا ايعاق بولا الادى.