قاشاندا شارۋاسى شاش ەتەكتەن بولىپ جاتاتىن الماتى قالاسىنىڭ مەملەكەت باسشىسىنىڭ پارمەنىمەن قولعا الىنعان «تازا قازاقستان» اكتسياسىن اتقارۋدا ۇزدىكسىز بەلسەندىلىك تانىتقانىن دايەكتەيتىن تىرلىك كوپ. تازالىقتى ونەگە, ادەتكە اينالدىرۋ باستاماسىنا قالا بيلىگى جاستاردى, تانىمال سپورت ساڭلاقتارىن, ونەر جۇلدىزدارىن دا تارتىپ, تىنىمسىز جۇمىس جاسادى.
قالا اكىمدىگىنىڭ باستاماسىمەن اكتسيا باستالعان كۇننەن «الماتى – ورتاق ءۇيىمىز» ناۋقانى قىزۋ قولعا الىندى. قالالىق ينفراقۇرىلىمعا ۇقىپتى قاراۋ, حالىق اراسىندا ازاماتتىق جاۋاپكەرشىلىكتى ناسيحاتتاۋ, تۇرعىنداردى ەكولوگيالىق مادەنيەتكە تاربيەلەۋ ماقساتىندا ۇيىمداستىرىلعان اكتسيا بارىسىندا قالانىڭ بارلىق اۋدانىندا ءتۇرلى ەكولوگيالىق ءىس-شارالار كەڭىنەن ءورىس الدى. اۋداندىق اكىمدىكتەر مەن كوممۋنالدىق قىزمەتتەر كوشەلەردى, ۇيىشىلىك اۋماقتاردى, بالالار مەن سپورت الاڭدارىن رەتكە كەلتىردى. جاسىل ايماقتاردى – ساياباقتار, وزەن-كولدەر اۋماقتارىن تازالاۋعا ەرەكشە ءمان بەرىلدى. سونداي-اق مادەنيەت نىساندارىن, تاريحي ورىندار مەن عيماراتتاردى جيناۋ, قالپىنا كەلتىرۋ جۇمىستارى ۇيىمداستىرىلدى. كوممۋنالدىق قىزمەت قىزمەتكەرلەرى اراسىندا ءتۇرلى نوميناتسيالار بويىنشا كونكۋرس وتكىزىلدى.
«الماتى – ورتاق ءۇيىمىز» ناۋقانى اياسىنداعى قالالىق سەنبىلىك كوميۋنيتي-ورتالىقتارىن دا قامتىدى. جاستار جىل بويى ەكولوگيالىق احۋالدى جاقسارتۋدى كوزدەيتىن باستامالارعا تۇراقتى تۇردە قاتىستى. قالالىق جاستار ساياساتى باسقارماسىنىڭ مالىمەتىنشە, 2024 جىلدىڭ باسىنان بەرى بۇل ورتالىقتاردا 1500-دەن استام ءىس-شارا, ونىڭ ىشىندە دارىستەر, سەمينارلار, ەكو-اكتسيالار, ينتەللەكتۋالدىق ويىندار, شەبەرلىك ساباقتارى, اكۋستيكالىق كەشتەر, سپورتتىق تۋرنيرلەر وتكەن. شارالارعا 375 مىڭنان استام ادام قاتىسقان, ونىڭ 27 مىڭى – NEET ساناتىنداعى جاستار.
بيىلدان باستاپ ءاربىر كوميۋنيتي-ورتالىقتا ەلىمىزدە جاسالعان فاندوماتتار, پلاستيكالىق بوتەلكەلەر مەن اليۋميني بانكالاردى جيناۋ اپپاراتتارى ورناتىلدى. «Plastic reboot» اكتسياسى اياسىندا كوميۋنيتي-ورتالىقتار 1 توننا پلاستيك قاقپاق جيناعان. ەكولوگيالىق اكتسيالاردى ۇيىمداستىرۋعا مۇرىندىق بولىپ جۇرگەن مەكەمەلەر باۋمان توعايىن دا تازالادى. ءبىر سوزبەن, قالالىق كوممۋنالدىق قىزمەت سالاسى الماتىنى قىسقى ماۋسىمعا دايىنداۋ جۇمىستارىن ءساتتى اياقتادى.
قىستا قالا تازالىعىن قامتاماسىز ەتۋگە 841 ارنايى تەحنيكا مەن 1 400 جۇمىسشى جۇمىلدىرىلادى. جۇمىس تيىمدىلىگىن ارتتىرۋ ماقساتىندا «الماتى تازالىق» كوممۋنالدىق كاسىپورنىنىڭ اۆتوپاركى 32 زاماناۋي تەحنيكامەن تولىقتى. سانيتارلىق تازالىق 2 318 كوشەنى, جالپى اۋدانى 25,1 ملن شارشى مەتر اۋماقتى, ۇزىندىعى 2 777 كم بولاتىن جولداردى قامتيدى. كوشە, جول جەلىسىن تازارتۋ جۇمىستارىنا 10 مەردىگەر ۇيىم جاۋاپتى.
الماتى