ميكروقارجى ومبۋدسمانى قۇرىلدى

بىزدە جىلدام نەسيە بەرەتىن 220-عا جۋىق ۇيىم بار. سولار بيىلعى 9 ايدا 72 ملرد تەڭگە تازا پايدا تاپقان. باس بانك­تىڭ حابارلاۋىنشا, تابىستىڭ باسىم بولىگى ءىرى 20 ميكروقارجى ۇيى­مى­نا تيەسىلى.

سونىڭ ىشىندە بىلتىر وتان­داستا­رى­مىزدىڭ جەكە دەرەكتەرىن تارا­تىپ جىبەرگەن «روبوكەش.كز» ميكرو­قار­جى ۇيىمى 10 ملرد تەڭگە پايدا تۇسىرگەن. ودان كەيىنگى ورىندا بانك­كە اينالعىسى كەلىپ جۇرگەن «KMF» ميكروقارجى ۇيىمى تۇر. ۇيىم قاڭتار-قىركۇيەك ايلارىندا 7,96 ملرد تەڭگە تابىس تاپقان. ۇزدىك ۇشتىكتى دۋلات تاستەكەيدىڭ «TAS Finance Group» كومپانياسى اياق­تاي­دى. بۇل قارجى ۇيىمى 9 ايدا 6,28 ملرد تەڭگە تاپقان.

باي­قا­عانىمىزداي, وتان­­­داستارى­مىز جىلدام ونلاين نەسيە­گە تىم قۇمار. جالپى قا­رىزى 1,2 ترلن تەڭ­گە­دەن اسقان. العان شاعىن نەسيەسىن قاي­تارماي جۇر­­گەن­دەردىڭ قاتارى دا ارتىپ بارادى. جىل باسىندا تولەن­بە­گەنىنە 3 ايدان اسقان شاعىن نەسيە ۇلەسى 6,1% بولسا, قازىر 10 بو­رىش­­كەر­دىڭ بىرەۋى العان قارىزىن ۋاقتىلى تولە­­مەيدى. بۇل تاقىرىپقا قاتىس­تى داۋ دا كوپ.

سوندىقتان دا ميكروقارجى ومبۋد­­سمانى وسى جىلدىڭ 21 جەلتوق­سا­نىنان باستاپ ىسكە كىرى­سە­دى. ومبۋد­سمان ميكرو­قارجى ۇيىم­دا­رى­نىڭ كليەنت­تەرىنە كومەك بەرۋ ءۇشىن قۇرىلدى.

– ميكروقارجى ومبۋدسمانى وتان­­داستارىمىزدىڭ ميكرو­كرەديتكە بايلانىستى داۋلارىن, سونىڭ ىشىندە مەرزىمى وتكەن قارىزداردى رەتتەپ, كوللەكتورلىق اگەنتتىكتەرگە قاتىستى ماسەلەلەردى قارايدى. ومبۋدسمان تاۋەلسىز تورەشى رەتىندە ارە­كەت ەتىپ, داۋلاردى سوتقا جۇگىنبەي شەشۋ­­گە ىقپال ەتەدى, – دەپ مالىمدەيدى قار­جى نا­رىعىن رەتتەۋ جانە دامىتۋ اگەنت­تىگى.

ماڭىزدىسى, ومبۋدسمان قابىل­دا­عان شەشىمدى ميكروقارجى ۇيىمى نەمەسە قارىز الۋشى 30 كۇن ىشىندە ورىنداۋى كەرەك. بىراق ميكروقارجى ومبۋدسمانى سوتقا جولدانعان ىستەر نەمەسە زاڭدى كۇشىنە ەنگەن سوت اكتىلەرىن قارامايدى.

ميكروقارجى ومبۋدسمانىنىڭ قىزمەتى ميكروكرەديت بەرۋ نارىعىن قۇقىقتىق الاڭدا دامىتۋعا ىقپال ەتەدى. بۇل ينستيتۋت ميكروقارجىلىق ۇيىمداردى زاڭنامانى ساقتاۋعا ءارى قىزمەت كورسەتۋدىڭ وزىق تاجىري­بە­لەرىن ەنگىزۋگە ىنتالاندىرا تۇس­پەك. قازىر ەلىمىزدە تەك بانك پەن ساقتان­دى­رۋ ومبۋدسماندارى جۇمىس ىستەيدى.