جەلتوقسان كوتەرىلىسىن باسىپ-جانىشتاۋ كەزىندە «ەرلىك پەن قۇرمەتكە بولەنگەندەر» جەتىپ ارتىلادى. «ەرلىكتىڭ» ەڭ ۇلكەنى قىزىل جۇلدىز وردەنىنە يە بولىپتى.
ونداي ماراپاتقا يە بولعاندار سانى – بەسەۋ. ولار وتان الدىنداعى «پارىزدارىن» ويداعىداي اتقارىپتى. سونداي-اق «ەرەن ەڭبەگى ءۇشىن» مەدالىمەن – 6, «ۇزدىك ەڭبەگى ءۇشىن» مەدالىمەن – 5, «قوعامدىق ءتارتىپتى قورعاۋداعى ۇزدىك قىزمەتى ءۇشىن» مەدالىمەن – 160 قىزمەتكەر جانە 28 حالىق جاساقشىسى, قازاق كسر جوعارعى كەڭەسىنىن قۇرمەت گراموتاسىمەن — 30 قىزمەتكەر جانە 15 جاساقشى, ء«ىىم-دەگى ۇزدىك قىزمەتى ءۇشىن» بەلگىشەسىمەن – 217 قىزمەتكەر, قازاق كسر جوعارعى كەڭەسىنىڭ گراموتاسىمەن 113 قىزمەتكەر جانە 30 حالىق جاساقشىسى, كەزەكتەن تىس شەنگە (كسرو ءىىم بۇيرىعى) 24 قىزمەتكەر يە بولىپ, كسرو ءىىم بۇيرىعىمەن اقشالاي سىيلىقپەن – 53 قىزمەتكەر, قازاق سسر ءىىم بۇيرىعىمەن اقشالاي سىيلىقپەن 561 قىزمەتكەر ماراپاتتالعان. بىراق وسى مىڭداعان ادامنىڭ بىردە-بىرەۋى «وسى ماراپاتقا لايىق ەمەسپىن» دەپ جار سالعان ەمەس-ءتى. بالكىم, ءدال سول مەزگىلدە توتاليتارلىق جۇيەگە قارسى شىعۋ اۋىر بولعان شىعار. بىراق ۋاقىت وتە ايتۋعا بولاتىن جايت ەدى عوي بۇل...
ارىلۋعا شاقىرعان العاشقى ءۇن 1990 جىلى قازاندا ەستىلدى. ونى دا باسقا ەمەس, قىرعىز باۋىرىمىز تالايبەك ىلاەۆ وزىنە بەرىلگەن قازاق كسر جوعارعى كەڭەسىنىڭ ماقتاۋ قاعازىنا «مەن مىنا بۇيىمدى وزدەرىڭە قايتارامىن. سەبەبى ول مەنىڭ ۇيىمدە ساقتايتىنداي قۇندى ەمەس. مەن ءوزىمدى فاشيست, ماڭگۇرت سەزىنگىم كەلمەيدى» دەپ قايتارىپتى. ارىلۋدى باستاپ بەرگەن تالايبەك باۋىرىمىزعا راحمەت. ايتەۋىر وسىدان كەيىن سەڭ قوزعالعانداي بولدى. ءسويتىپ 1 قىزىل جۇلدىز وردەنى كەرى قايتارىلدى. سونداي-اق «ەرەن ەڭبەگى ءۇشىن» مەدالىنەن – 1, «قوعامدىق ءتارتىپتى قورعاۋداعى ۇزدىك قىزمەتى ءۇشىن» مەدالىنەن – 23, قازاق سسر جوعارعى كەڭەسىنىڭ قۇرمەت گراموتاسىنان – 2, قازاق سسر جوعارعى كەڭەسىنىڭ گراموتاسىنان 10-ى ءتيىستى جەرىنە قايتارىلىپ بەرىلدى. الايدا, مىڭداعان ادامنىڭ ساناۋلىسى بولسا دا وزدەرىنىڭ «ەرلىگىنىڭ» شىنايى ەمەستىگىن كەش تە بولسا سەزىنگەن ءتارىزدى. ال قالعاندارى كۇنى بۇگىنگە دەيىن وزدەرىنىڭ ادىلەتتىلىكتى, قوعامدىق ءتارتىپتى ساقتاعانداردىڭ ساردارلارى ساناتىندا سانايتىن ءتارىزدى...
جەلتوقسان كوتەرىلىسىنە قاتىسۋشىلاردى سوققىعا جىققاندار, قۋعىن-سۇرگىنگە ۇشىراتقاندار, جازىقسىز سوتتاعاندار حالىقتان كەشىرىم سۇراپ, كۇناسىنەن قاشان ارىلادى ەكەن؟
عابيزات جادىگەر