الەۋمەتتىك جەلىدە بلوگەر ادىلەتحان مولداحاننىڭ ۇستالعانى جانە ونىڭ قىلمىستىق قۇقىقبۇزۋشىلىققا قاتىسى بولۋى مۇمكىن ەكەنى تۋرالى اقپارات تارالىپ جاتىر. وسىعان بايلانىستى الماتى پروكۋراتۋراسى بۇعان دەيىن قارالعان ءىستىڭ ءمان-جايىن ءتۇسىندىرىپ بەردى, دەپ جازادى Egemen.kz.
الماتى قالاسى تۇركسىب اۋدانى پروكۋراتۋراسى ءبولىمىنىڭ باستىعى ديدار قاباەۆتىڭ ايتۋىنشا, اڭگىمە 2021 جىلى جاسالعان قىلمىس تۋرالى بولىپ وتىر.
«سول كەزدە مەن الماتى قالاسى ناۋرىزباي اۋدانى پروكۋراتۋراسىندا مەملەكەتتىك ايىپتاۋدى قولداۋ ءبولىمىنىڭ باستىعى قىزمەتىن اتقاردىم. اتالعان ءىس بويىنشا مەملەكەتتىك ايىپتاۋشى بولعان جوقپىن. الايدا قىلمىستىق ءىستىڭ ماتەريالدارى مەن سوت ۇكىمىن زەردەلەدىم. ءىستىڭ قىسقاشا سيپاتتاماسى مىناداي: جابىرلەنۋشى الماتى قالاسىنان باسپانا ساتىپ الماق بولىپ, 1,5 ملن تەڭگە كولەمىندە الدىن الا تولەم جاساۋ ءۇشىن تاراز قالاسىنان كەلگەن. بۇل تۋرالى ونىڭ تانىسى ءبىلىپ, ادىلەتحان مولداحانمەن بىرگە قىلمىستىق جوسپار قۇرعان. ولار جابىرلەنۋشىنى جولدا كۇتىپ الىپ, جول-كولىك اپاتىن ۇيىمداستىرعان. سودان كەيىن اشىق تۇردە 1,5 ملن تەڭگەنى تارتىپ العان. كەيىن كۇدىكتىلەر ۇستالدى. ولارعا قاتىستى قاماۋعا الۋ شاراسى قولدانىلدى», دەدى ديدار قاباەۆ.
كۇدىكتىلەر دەر كەزىندە ۇستالىپ, قاماۋعا الىنعان. ديدار قاباەۆتىڭ ايتۋىنشا, ءىس قارالىپ جاتقان كەزدە ايىپتالۋشىلار كىناسىن تولىق مويىنداپ, كەلتىرىلگەن شىعىندى وتەگەن.
«تەرگەۋ بارىسىندا ولار كىنالارىن تولىق مويىنداپ, كەلتىرىلگەن زالالدى وتەدى. قىلمىستىق ءىس قىلمىستىق-پروتسەستىك كودەكستىڭ 382-بابىنا سايكەس, قىسقارتىلعان تارتىپپەن قارالدى. قىسقارتىلعان ءتارتىپ كىنانى تولىق مويىنداۋدى جانە تالاپ-ارىزداردى داۋلاماۋدى كوزدەيدى. مۇنداي جاعدايدا ءىستىڭ بارلىق ماتەريالى جان-جاقتى زەرتتەلمەيدى, تەك سوتتالۋشىلار مەن جابىرلەنۋشىلەر عانا جاۋاپ بەرەدى. وسىدان كەيىن ءجارىسسوز باستالىپ, سوت ۇكىم شىعارۋ ءۇشىن كەڭەسۋ بولمەسىنە كەتەدى. ناتيجەسىندە سوت ارقايسىسىنا ءۇش جىل مەرزىمگە باس بوستاندىعىن شەكتەۋ جازاسىن تاعايىندادى. ۇكىمگە شاعىم تۇسپەدى جانە ول زاڭدى كۇشىنە ەندى», دەدى ديدار قاباەۆ.
وسىلايشا, ادىلەتحان مولداحان توناۋ قىلمىسىن جاساعانى ءۇشىن كىنالى دەپ تانىلدى. سوت قىلمىستىڭ الدىن الا ويلاستىرىلعان جوسپار بويىنشا, جول-كولىك وقيعاسىن قولدان ۇيىمداستىرۋ ارقىلى جاسالعانىن انىقتادى. ايىپتالۋشىلار كىناسىن مويىنداپ, كەلتىرىلگەن شىعىندى وتەگەن, ناتيجەسىندە ولارعا ءۇش جىل مەرزىمگە باس بوستاندىعىن شەكتەۋ جازاسى تاعايىندالدى.
بۇعان دەيىن زاڭگەر ءارى بلوگەر ادىلەتحان مولداحان قاماۋعا الىنىپ, قۇقىق قورعاۋ ورگاندارى زاڭگەرگە قاتىستى جالعان اقپارات تاراتۋ فاكتىسى بويىنشا سوتقا دەيىنگى تەرگەۋ جۇرگىزىپ جاتقانىن حابارلاعانبىز.