جارتىلاي فينالدا جەڭىلگەن نۇرسۇلتان نۇرسەيىتوۆ (64 كگ), داۋرەن قاماش (88 كگ), گۇلدانا المۇحانبەتوۆا (54 كگ), ارۋجان ساتوۆا (65 كگ), ءمادينا ەرجان (80 كگ) قولا مەدال يەلەندى. جاۋىنگەرلىك سامبوشىلاردىڭ سايىسىندا سانجار نۇرسەيىت (79 كگ) پەن رايحان ءمادي (+98 كگ) تەڭدەسسىز دەپ تانىلدى. ارۋجان اسەمكامالقىزى (72 كگ), سەرىك شاديار (64 كگ), جالعاس جۇماعاليەۆ (79 كگ), ەراسىل عابدۋلماناپ (+98 كگ) فينالدا ۇتىلدى. شولپان التىنبەك (50 كگ), مارجان بيزاق (59 كگ), ارۋحان تۇرعىنباەۆا (65 كگ), مەرۋەرت نۇرماحانوۆا (65 كگ), ۇلبوسىن ءادىلوۆا (80 كگ), نۇريلا اسانقىزى (+80 كگ) ۇزدىك ۇشتىكتى تۇيىندەدى.
سانكت-پەتەربۋرگتە ارالاس جەكپە-جەكتەن اسا 202 ءتۋرنيرى ۇيىمداستىرىلدى. جارىستا اسىلجان باقىتجان ۇلى (17-6-1) كەزىندە UFC-تە كۇش سىناسقان رەسەيلىك ماكسيم گريشينمەن (34-11-2) كەزدەستى. جارتىلاي اۋىر سالماقتاعى باسەكە تورەشىلەردىڭ شەشىمىمەن قانداسىمىزدىڭ پايداسىنا شەشىلدى.
ەلىمىزدىڭ تانىمال تەننيسشىسى زارينا دياس ءوز مانسابىن اياقتادى. الماتىنىڭ تۋماسى كەزىندە ەكى مارتە ۋيمبلدوننىڭ ءتورتىنشى كەزەڭىنە جەتتى. ءتورت رەت اۋستراليانىڭ اشىق بىرىنشىلىگى مەن ءبىر رەت US Open دوداسىنىڭ ءۇشىنشى اينالىمىندا وينادى. «رولان گارروستا» دا بىرنەشە رەت بوي كورسەتتى. دياس WTA-نىڭ 1, ITF-ءتىڭ 10 تۋرنيرىندە توپ جاردى. وسىدان ون شاقتى جىل بۇرىن جەرلەسىمىز الەمدىك رەيتينگىدە 31-ورىنعا كوتەرىلگەن ەدى. بىراق كەيىننەن ءجيى-ءجيى جاراقات الىپ, بابىن جوعالتتى. بۇرىنعى دەڭگەيىنە جەتە المايتىنىن تۇسىنگەن زارينا 32 جاسىندا كورتپەن قوش ايتىسۋدى قۇپ كوردى.
وسىعان دەيىن ىستانبۇل مەن ريمدە وتكەن پرەمەر-ليگادا قارسىلاس شاق كەلتىرمەگەن كاراتەشى سوفيا بەرۋلتسەۆا (+68 كگ) كۇنى كەشە قىتايدىڭ لەشان قالاسىندا الدىنا جان سالماي, التىن مەدال سانىن ۇشكە جەتكىزدى. بۇل جولى ول بەس جەكپە-جەكتە جەڭىسكە جەتتى. نۇرقانات اجىقانوۆ (75 كگ) پەن اسەل قاناي (61 كگ) كۇمىس السا, ولجاس التىنبەك (67 كگ) قولانى قاناعات تۇتتى. جالپى كوماندالىق ەسەپتە جەرلەستەرىمىز ءتورتىنشى ساتىعا تابان تىرەدى. العاشقى ءۇش ورىندى تۇركيا (2+0+1), قىتاي (2+0+0), جاپونيا (1+4+6) ولجالادى.
تاەكۆوندودان ەلىمىزدىڭ جاستار قۇراماسى تاشكەنتتە ءوتىپ جاتقان الەم بىرىنشىلىگىنىڭ العاشقى كۇنى ەكى جۇلدەگە قول جەتكىزدى. 48 كگ سالماقتا سىنعا تۇسكەن ەراسىل ەرزات پەن 55 كگ سالماقتاعى يسلام مەدەتباي جارتىلاي فينالدا جەڭىلىس تاۋىپ, قولا مەدالدى قاناعات تۇتتى.
فۋتزالدان قازاقستان مەن ازەربايجان قۇرامالارى اقتاۋ قالاسىندا جولداستىق كەزدەسۋ وتكىزدى. ءبىزدىڭ ەلگە قايتا ورالعان كاكاۋ ءۇشىن بۇل العاشقى حالىقارالىق ماتچ ەدى. باسەكە 9:2 ەسەبىمەن الاڭ يەلەرىنىڭ پايداسىنا شەشىلدى. قوس قۇراما اراسىنداعى كەلەسى ويىن 15 ساۋىردە وتەدى.
جاپونيانىڭ فۋكۋوكا قالاسىندا ارالاس جەكپە-جەكتەن ۇيىمداستىرىلعان «Rizin Landmark 13» تۋرنيرىندە نۇرحان جۇماعازى (10-1) جەرگىلىكتى فايتەر تەنە يوسيمۋرامەن (5-2) ايقاسىپ, ۇپاي سانىمەن ۇتتى.