بەكەت اتاعا زيارات ەتىپ بارۋشىلارعا كولىك قاتىناسى قيىندىق تۋدىرىپ جۇرگەن ەدى. قىمبات باعاعا كولىك جالداپ بارماسا, باسقا مۇمكىندىك جوق بولاتىن. ەندى ماڭعىستاۋ وبلىسىندا «اقتاۋ – بەكەت اتا – اقتاۋ» باعىتىندا جاڭا مارشرۋتتىق اۆتوبۋستار قاتىنايتىن بولدى. مارشرۋتتىڭ تۇساۋىن كەسىپ, العاشقى جولاۋشىلاردى شىعارىپ سالۋ شاراسى سالتاناتتى جاعدايدا ءوتتى.
«بۇگىن قاسيەتتى مەكەنگە اپاراتىن جاڭا تۋريستىك مارشرۋتتى ىسكە قوسىپ وتىرمىز. بەكەت اتا مەشىتى – رۋحاني قۇندىلىقتارىمىزدىڭ التىن قازىعى. بۇل جوبا ماڭعىستاۋ وڭىرىندە تاريحي-مادەني ءتۋريزمدى دامىتۋعا جانە قاسيەتتى مەكەندەرگە قولجەتىمدىلىكتى ارتتىرۋعا باعىتتالعان. بارشاڭىزعا ءساتتى ساپار تىلەيمىن!» دەدى ماڭعىستاۋ وبلىسىنىڭ اكىمى نۇرداۋلەت قيلىباي.
جولاۋشىلاردى تاسىمالداۋ ءۇشىن سىيىمدىلىعى 51 ورىندىق, جايلى جانە زاماناۋي Yutong ماركىلى اۆتوبۋستار پايدالانىلادى. اۆتوبۋستاردا ساپاردىڭ ۇزاقتىعىن ەسكەرە وتىرىپ, سانيتارلىق توراپ (دارەتحانا) قاراستىرىلعان. جاڭا باعىت اياسىندا قوعامدىق كولىكتەر اپتاسىنا جەتى كۇن بويى ۇزدىكسىز قىزمەت كورسەتەدى جانە بيلەت باعاسى دا قولايلى, ياعني بيلەت قۇنى ەرەسەكتەر ءۇشىن ءبىر باعىتقا – 1500 تەڭگە, ال 7–18 جاس ارالىعىنداعى بالالارعا – 750 تەڭگە. بۇل جەكە كولىك جالداعاننان الدەقايدا جەڭىل باعا ەكەنى قۋانتادى. جولاۋشىلار تاسىمالىن ۇيىمداستىرۋشى – «Caspian Trans Corporation» جشس-نا تۇرعىندار رازىلىعى زور.
ماڭعىستاۋ وبلىسى