بيىل «قازمۇنايگاز» ەنشىلەس كاسىپورىندارىمەن بىرگە «تازا قازاقستان» جالپىۇلتتىق ەكواكتسياعا بەلسەندى قاتىسىپ, 97 218 اعاش ەكتى. وسىلايشا, مەملەكەت باسشىسىنىڭ باستاماسىمەن قولعا الىنعان ايتۋلى ءىس-شاراعا كومپانيا دا ەلەۋلى ۇلەس قوسىپ وتىر.
اعاش وتىرعىزۋ اكتسياسى «قازمۇنايگاز»-دىڭ كاسىپورىندارى ورنالاسقان بارلىق ءوڭىردى – اقتاۋ, اتىراۋ, اقتوبە, شىمكەنت, قىزىلوردا جانە استانانى قامتىدى. قالالار مەن اۋىلداردا جاڭا جاسىل-جەلەكتى ايماقتار قۇرۋعا, كومپانيانىڭ وندىرىستىك نىساندارىنىڭ اۋماعىن كوگالداندىرۋعا ەرەكشە نازار اۋدارىلدى. جەرگىلىكتى كليماتقا ءتوزىمدى اعاشتار, سونىڭ ىشىندە قايىڭ, قاراعاي جانە ءسامبىتال ەگىلدى.
2020-2023 جىلدار ارالىعىندا قمگ-نىڭ ەنشىلەس جانە تاۋەلدى ۇيىمدارى 100 مىڭعا جۋىق اعاش ەكتى. سونىمەن بىرگە 2024 جىلى ءساۋىر ايىنىڭ باسىندا «قازمۇنايگاز»-دىڭ ۇيىمداستىرۋىمەن ارال تەڭىزىنىڭ قۇرعاعان ۇلتانىندا 15 مىڭ گەكتار القاپقا 4,5 ملن سەكسەۋىل كوشەتى وتىرعىزىلدى.
«قازمۇنايگاز» كوگالداندىرۋ جانە قورشاعان ورتانى قورعاۋ جونىندەگى جۇمىستى ءالى دە جالعاستىرادى.