الماتىدا العاش رەت «ۇماي» ايەلدەر فورۋمى ءوتتى

ء«بىز بۇل فورۋمدا ايەلدەردى الاڭداتاتىن ماسەلەلەردى تالقىلاعىمىز كەلدى, سەبەبى قوعامدا گەندەرلىك تەڭدىك ماسەلەسى ءالى كۇنگە دەيىن وزەكتى بولىپ وتىر. پاتەردىڭ ەسىگى جابىلعاندا ونىڭ ار جاعىندا نە بولىپ جاتقانىن بىلمەيمىز. قوعامدا بۇل ماسەلەلەر بۇكپەسىز ايتىلا باستادى. ايەلدەردىڭ تۇرمىس قۇرعانعا دەيىن ءوز ءۇيى بولعانى ءجون دەپ ءاردايىم ايتىپ جۇرەمىن. وتباسى بولعان سوڭ الدا نە بولارىن بىلمەيمىز. بارلىق ادام تاتۋ-ءتاتتى ءومىر سۇرسەم دەيدى. وكىنىشكە قاراي, كەيدە ايەلدەر وتباسىندا ءزابىر كورىپ, بارار جەر تاپپايدى. سوندايدا ولارعا ەرتەرەك العان پاتەرى پانا بولادى», دەدى  «وتباسى بانك» اق باسقارما توراعاسىنىڭ ورىنباسارى نۇرلان اقشانوۆ ءىس-شارانىڭ اشىلۋىندا.

وتباسى بانك – قازاق ايەلدەرىن قولداۋعا ەرەكشە كوڭىل بولەتىن بانك. ونىڭ ايقىن دالەلى – 2021 جىلى ىسكە قوسىلعان ايەلدەرگە ارنالعان «ۇماي» يپوتەكاسى.

«بۇگىنگى فورۋم ارقايسىمىزدى الاڭداتاتىن وزەكتى ماسەلەلەردى عانا ەمەس, سونداي-اق ءبىر-ءبىرىمىزدى قولداۋعا, تاجىريبە الماسىپ, كوزقاراستارىمىزدى بولىسۋگە مۇمكىندىك بەرىپ وتىر. وتباسى بانك 21 جىل بويى ءجۇز مىڭداعان ازاماتتىڭ اقشا جيناپ, باسپانالى بولۋىنا كومەكتەستى. ەڭ قىزىعى, دەپوزيت اشىپ, اقشا جيناۋعا كوبىنەسە ايەلدەر باستاما كوتەرەدى. بۇگىندە وتباسى بانكتە ايەلدەر 1,6 ميلليون دەپوزيت اشىپ, جالپى 1,2 تريلليون تەڭگە جيناعان. سونىڭ ىشىندە ەڭ كوپ جينالعان دەپوزيتتەگى سوما 52 ميلليون تەڭگەنى قۇرايدى. بۇل ايەلدەردىڭ قارجىسىن باسقارىپ, بولاشاعىن جوسپارلاي الاتىنىنا دالەل بولىپ وتىر», دەدى «وتباسى بانك» اق باسقارما توراعاسىنىڭ ورىنباسارى ەلميرا رىسپەكوۆا.

ونىڭ ايتۋىنشا, يپوتەكالىق نەسيە الۋشىلار اراسىندا دا ايەلدەر (58,7%) العا شىققان. ءۇي ساتىپ الۋعا نەسيە الاتىن ايەلدەردىڭ ورتاشا جاسى 36-45 جاستى قۇرايدى. ال قارىزدىڭ ورتاشا سوماسى – 13,2 ميلليون تەڭگە. نەسيەنى 10-14 جىلعا الادى. 

وتباسى بانك پەن ازيا دامۋ بانكى بىرلەسكەن «ۇماي» باعدارلاماسى ايەلدەردىڭ باسپانا ماسەلەسىن شەشۋدە ماڭىزدى ءرول اتقاردى. وسى باعدارلاما ارقىلى 2021 جىلدان بەرى 3 660 ايەل ءۇيلى بولدى.

«قازاقستانداعى ءاربىر ايەلدىڭ جىلۋعا تولى ءوز ءۇيى بولسا ەكەن دەيمىز. وتباسىنىڭ ۇيىتقىسى بولىپ وتىرعان ايەلدەردىڭ ەركىندىگى, ەكونوميكالىق بەلسەندىلىگى مەن تەڭدىك ءۇشىن ولاردى قولداۋ وتە ماڭىزدى. 1 قاراشادا وتباسى بانك ازيا دامۋ بانكىمەن سەرىكتەستىك تۋرالى مەموراندۋمعا قول قويدى. كەلەر جىلى «ۇماي» باعدارلاماسى مەن «جاسىل يپوتەكا» قايتا ىسكە قوسىلادى دەگەن ۇمىتتەمىز», دەدى ەلميرا رىسپەكوۆا.

گەندەرلىك تەڭدىككە قوسقان ۇلەسى ءۇشىن وتباسى بانك ورتالىق ازيا وڭىرلىك ەكونوميكالىق ىنتىماقتاستىق باعدارلاماسىنىڭ ماراپاتىنا يە بولعان قازاقستانداعى العاشقى بانك اتاندى.

وتباسى بانكتىڭ الماتى قالالىق فيليالىنىڭ ديرەكتورى داناگۇل ءتۇسىپوۆا «ۇماي» يپوتەكاسىنىڭ شارتتارى تۋرالى ايتا كەتتى. باعدارلاماعا قازاقستاننىڭ بارلىق وڭىرىندەگى ايەلدەر قاتىسادى جانە تۇرعىلىقتى جەرىنە قاراماستان كەز كەلگەن ايماقتان ءۇي الا الادى. بولجالدى ەڭ جوعارى نەسيە سوماسى – 50 ميلليون تەڭگە, ال قارىز الۋشىنىڭ جاسى 18-دەن 65 جاسقا دەيىن. باستاپقى جارنا سوماسى – 20% بولادى دەپ كۇتىلەدى.

«بۇگىنگى ءىس-شارا ايەلدەرگە وسى جانە وزگە دە باعدارلامالار تۋرالى اقپارات بەرۋ ماقساتىندا وتكىزىلىپ وتىر. «ۇماي» باعدارلاماسىنا قاتىساتىن ايەلدەردىڭ اتىندا ءۇيىنىڭ بار-جوعى تەكسەرىلمەيدى. ءۇيى بولسا دا وسى باعدارلاما ارقىلى ەكىنشى ءۇيىن ساتىپ الا الادى. بۇل باعدارلامانىڭ ماقساتى – ايەلدەردىڭ تۇرمىستىق جاعدايىن جاقسارتۋ, كۇندەلىكتى ءومىرىن جەڭىلدەتۋ, ياعني, جۇمىسى, بالاباقشا نە مەكتەپتىڭ قاسىنان ءۇي الۋىنا كومەكتەسۋ. «ۇماي» يپوتەكاسىنىڭ پايىزدىق مولشەرلەمەسىن جاقىندا ايتامىز», دەدى داناگۇل ءتۇسىپوۆا.

باعدارلاما بويىنشا ءۇيدى باستاپقى نارىقتان دا, ەكىنشى نارىقتان دا تاڭداۋ مۇمكىندىگى بەرىلمەك. دەگەنمەن ەكىنشى نارىقتان 2016 جىلدان بەرى سالىنعان ۇيلەردى عانا ساتىپ الۋعا بولادى. تابىس بويىنشا شەكتەۋ بار: وتباسىنىڭ ەڭ جوعارى تازا ايلىق تابىسى 950 مىڭ تەڭگەدەن اسپاۋعا ءتيىس. ءوزىنىڭ تابىسى جەتپەي قالسا ەكى قارىز الۋشىنى تارتۋعا بولادى. بۇل تالاپتار ءالى دە تالقىلانىپ جاتىر.

جالپى «ۇماي» باعدارلاماسى اياسىندا پاتەردى ساتىپ الىپ قانا قويماي, پاتەرگە جوندەۋ جۇمىستارىن جۇرگىزۋگە بولادى.

«ۇماي» ايەلدەر فورۋمىندا وسى باعدارلاما ارقىلى باسپانالى بولعان ەۆگەنيا گۋنينامەن تىلدەستىك. ءۇش جىل بۇرىن وسكەمەننەن الماتىعا قونىس اۋدارعان ەۆگەنيا وتباسى بانك ارقىلى قالاي ءۇيلى بولعانىنىن ايتىپ بەردى.

«بۇل باعدارلاما تۋرالى ءوزىم ەكى جىل بۇرىن ءبىلدىم. يپوتەكالىق باعدارلامالاردىڭ قايسى ءتيىمدى ەكەنىن زەرتتەپ ءجۇردىم دە, «ۇمايعا» توقتادىم. باعدارلامانىڭ شارتتارى ۇنادى. باستاپقى جارنا سوماسى كوپ بولمادى. باسقا بانكتەرگە قاراعاندا پايىزدىق مولشەرلەمە دە از. الماتىنىڭ ورتالىعىنان 14 ميلليون تەڭگەگە ءۇي تاۋىپ, ون جىلعا يپوتەكا الدىم. دەپوزيتكە اقشا جيناپ, وعان قوسا زەينەتاقى جيناعىمدى جۇمساپ, ەكى جىلدا قارىزدى تولىق تولەپ تاستادىم. بۇگىندە «ۇماي» يپوتەكاسى ايەلدەرگە ارنالعان ەڭ جاقسى باعدارلاما دەپ ەسەپتەيمىن. باسقا باعدارلامالاردى دا كوردىم. ءۇش جىل دەپوزيتكە اقشا جيناپ, ءۇي اقىسىنىڭ قالعان ەلۋ پايىزىن تولەۋگە بولادى. دەگەنمەن دەپوزيتىم اشىلعانىنا ءۇش جىل بولماعان سوڭ «ۇماي» باعدارلاماسىنىڭ شارتتارىنا ساي كەلدىم. وسىلايشا الماتىنىڭ قاق ورتاسىنان 33 جاسىمدا ءۇي الىپ, ەكى جىلدا قارىزدى تولىق وتەپ تاستادىم. سوندىقتان ايەلدەرگە قورىقپاي وتباسى بانكتە دەپوزيت اشىپ, اقشا جيناڭىزدار دەگىم كەلەدى», دەدى IT كومپانيادا جۇمىس ىستەيتىن ەۆگەنيا گۋنينا.

فورۋم بارىسىندا وتباسى بانك قىزمەتكەرلەرى قاتىسۋشىلارعا دەپوزيتتە اقشا جيناۋ, يپوتەكالىق باعدارلامالارعا قاتىسۋ شارتتارىن ايتىپ بەردى. وتباسى بانك 2024 جىلى «وتاۋ» جانە «ناۋرىز» اتتى ەكى تۇرعىن ءۇي باعدارلاماسىن ىسكە قوستى. سونىڭ ارقاسىندا 10 مىڭ ازامات ءۇيلى بولدى.

بۇدان بولەك, وتباسى بانك ءبىلىم بەرۋ باستامالارىنا دا قولداۋ كورسەتەدى. بيىلدان باستاپ بانكتە «اقىل» ءبىلىم بەرۋ دەپوزيتىن اشۋعا بولادى. قازىردىڭ وزىندە 63 مىڭ شوت اشىلعان. ونىڭ تەڭ جارتىسى قىزدارعا ارنالعان. وسىلايشا قامقور اتا-انالار قازىردەن بالاسىنىڭ بولاشاقتا ساپالى ءبىلىم الىپ, ءوز ءىسىنىڭ مامانى بولۋى ءۇشىن ۇلەس قوسىپ وتىر.