ءساۋىر ايىندا الماتى قالالىق ءماسليحاتىنىڭ كەزەكتەن تىس XVI سەسسياسىندا دەپۋتاتتار قاتتى تۇرمىستىق قالدىقتاردى (قتق) جيناۋ, تاسىمالداۋ, سۇرىپتاۋ مەن كومۋ قۇنى قانشا تۇراتىنىن باعامداپ, تاريفتەرىن بەكىتكەن ەدى.
وعان قوسا قىركۇيەك ايىندا الماتى قالالىق ەكولوگيا جانە قورشاعان ورتانى قورعاۋ باسقارماسى پوليتسيا دەپارتامەنتىمەن بىرىگىپ, ەسكى جيھاز, سىنعان تۇرمىستىق تەحنيكا, قۇرىلىس قالدىقتارىن بەي-بەرەكەت تاستاعان تۇرعىندارعا ايىپپۇل سالۋعا شەشىم قابىلداۋعا ءماجبۇر بولدى.
سەبەبى تۇرمىستىق قالدىقتاردى وڭدى-سولدى لاقتىرۋ تەك كونتەينەرلىك الاڭدارداعى ولقىلىق ەمەس, كەلەڭسىز كورىنىستەر قالانىڭ سانيتارلىق, ەكولوگيالىق جاعدايىنا دا كەسىرىن تيگىزەدى. سوندىقتان ۇدايى ۇيىمداستىرىلاتىن سەنبىلىكتەرمەن قاتار, اۋزى-مۇرنىنان شىعىپ جاتاتىن قوقىس جاشىكتەرىن تازالاۋ, رەتتەۋ ماقساتىندا قوسىمشا پاترۋل ەنگىزىلىپ, «تازا قازاقستان» اكتسياسىنان باستاۋ العان «الماتى – ءبىزدىڭ ورتاق ءۇيىمىز» ناۋقانى كەزىندە «قوقىستى دۇرىس سۇرىپتا», ەكولوگيالىق تۋرلارى ءوتتى.
تازالىق ماسەلەسى مۇنىمەن شەكتەلمەيدى. تاياۋ كۇندەرى قالا اكىمى ەربولات دوساەۆ بوستاندىق اۋدانىنىڭ تۇرعىندارىمەن كەزدەسكەندە: «كەلەسى جىلى دا قوقىس الاڭدارىن جاڭعىرتۋ جالعاسادى. بارلىعىن رەتكە كەلتىرەمىز. اپتا اياعى, جۇمادان باستاپ, دەمالىس كۇندەرى كونتەينەرلەر قوقىسقا تولىپ قالاتىنىن بىلەمىن», دەدى.
قىسقاسى, كەلەسى جىلى مەگاپوليستە 800 قوقىس الاڭىن جاڭارتۋ جوسپارلانىپ وتىر. ال قالا اكىمى تۇرعىندارعا كولەمى ۇلكەن قوقىستاردى كەز كەلگەن جەرگە تاستاۋعا بولمايتىنىن ەسكەرتتى. «وسى ماقساتتا قاتاڭ جازا قاراستىرىلعان جاڭا ەرەجەلەردى بەكىتتىك. سونداي-اق قوقىس الاڭدارىنا كامەرالار ورناتامىز. بۇل بىزگە تازالىق ساقتامايتىنداردى جەدەل انىقتاۋعا مۇمكىندىك بەرەدى. كەلەسى جىلى العاشقى 400 كامەرانى ىسكە قوسامىز», دەدى قالا اكىمى.
ەندىگى جەردە كوممۋنالدىق قالدىقتاردى باسقارۋ قاعيدالارىنا سايكەس جىلجىمايتىن نىساندار سالۋ مەن جوندەۋدى جۇزەگە اسىراتىن جەكە جانە زاڭدى تۇلعالار قۇرىلىس قالدىقتارىن, كولەمى ۇلكەن قالدىقتاردى ارنايى ورىندارعا جەتكىزۋگە وسىعان ماماندانعان ۇيىمدارعا اقىلى تۇردە جۇگىنىپ, بولماسا وزدەرى الماتى وبلىسىنىڭ ىلە, قاراساي اۋداندارىندا ورنالاسقان پوليگوندارعا جەتكىزۋلەرى ءتيىس.
الماتى