مەملەكەتتىك كەڭەسشى ەرلان قاريننىڭ توراعالىعىمەن «قازاقستان تاريحى: ەجەلگى داۋىردەن بۇگىنگە دەيىن» اتتى اكادەميالىق كوپتومدىق باسىلىمنىڭ عىلىمي-رەداكتسيالىق القاسىنىڭ كوشپەلى وتىرىسى ءوتتى, دەپ جازادى Egemen.kz.
القا قۇرامىنا عىلىم جانە جوعارى ءبىلىم مينيسترلىگىنىڭ وكىلدەرى, ەلىمىزدىڭ عىلىمي-زەرتتەۋ ينستيتۋتتارىنىڭ جانە مەملەكەتتىك ءارحيۆتىڭ باسشىلارى مەن قىزمەتكەرلەرى, تاريحشى عالىمدار جانە ساراپشىلار ەندى.
اتاپ ايتقاندا, جيىنعا ءا.مارعۇلان اتىنداعى ارحەولوگيا ينستيتۋتىنىڭ ديرەكتورى اقان وڭعار, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ باس ديرەكتورى زيابەك قابىلدينوۆ, جوشى ۇلىسىن زەرتتەۋ ينستيتۋتىنىڭ ديرەكتورى جاقسىلىق ءسابيتوۆ, ر.ب.سۇلەيمەنوۆ اتىنداعى شىعىستانۋ ينستيتۋتى جانىنداعى تاريحي ماتەريالداردى زەرتتەۋ رەسپۋبليكالىق اقپاراتتىق ورتالىعىنىڭ ديرەكتورى مەرۋەرت ابۋسەيىتوۆا, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ باس عىلىمي قىزمەتكەرى بولات كومەكوۆ, مەملەكەت تاريحى ينستيتۋتى ديرەكتورىنىڭ ورىنباسارى بۇركىتباي اياعان, ش.ءۋاليحانوۆ اتىنداعى تاريح جانە ەتنولوگيا ينستيتۋتى باس ديرەكتورىنىڭ ورىنباسارى ەرجان تورايعىروۆ جانە باسقا دا ماماندار قاتىستى.
كەزدەسۋ بارىسىندا ەرلان قارين رەداكتسيالىق القانى الداعى ەكى اپتادا اۋقىمدى جۇمىس كۇتىپ تۇرعانىن, باستى مىندەت كوپتومدىق قولجازباسىنا عىلىمي ساراپتاما جاساۋ ەكەنىن اتاپ ءوتتى.
مەملەكەتتىك كەڭەسشى زاماناۋي عىلىمي ادىستەردى قولدانا وتىرىپ جازىلعان قازاقستان تاريحىنىڭ كوپتومدىق باسىلىمىن دايىنداۋ تۋرالى باستامانى مەملەكەت باسشىسى قاسىم-جومارت توقاەۆ 2021 جىلعى قاڭتاردا جاريالانعان «تاۋەلسىزدىك بارىنەن قىمبات» اتتى ماقالاسىندا كوتەرگەنىن ەسكە سالدى. وسى اكادەميالىق باسىلىم ەل تاريحى جونىندەگى بارلىق مەكتەپ پەن ۋنيۆەرسيتەت باعدارلامالارىنا جانە وقۋلىقتارىنا نەگىز بولۋعا ءتيىس.
ەرلان قارين وسى جىلدار ىشىندە قازاقستان تاريحى كوپتومدىعىن دايىنداۋ ءۇشىن اۋقىمدى جۇمىس اتقارىلعانىن, وعان ەلىمىزدەگى عىلىمي قاۋىمداستىقتىڭ بارلىق دەرلىك وكىلدەرى قاتىسقانىن اتاپ ءوتتى.
ءار تومعا عىلىمي جەتەكشىلىكتى قازاقستاننىڭ بەس عىلىمي زەرتتەۋ ينستيتۋتى جۇزەگە اسىردى. ولار: ش.ءۋاليحانوۆ اتىنداعى تاريح جانە ەتنولوگيا ينستيتۋتى, ءا.مارعۇلان اتىنداعى ارحەولوگيا ينستيتۋتى, جوشى ۇلىسىن زەرتتەۋ ينستيتۋتى, ر.سۇلەيمەنوۆ اتىنداعى شىعىستانۋ ينستيتۋتى جانە مەملەكەت تاريحى ينستيتۋتى.
جالپى, بىرەگەي جوباعا ەلىمىزدىڭ 250 تاريحشىسى ماقالا جانە ءبولىم اۆتورى رەتىندە ءوز ۇلەسىن قوستى.
كوپتومدىق باسىلىمنىڭ قولجازباسىنا قاتىستى جۇمىس ءالى جالعاسادى. ءتۇرلى ساراپتامالىق تالقىلاۋلار مەن عىلىمي زەرتتەۋلەر جوسپارلانعان. سونىمەن قاتار كوپتومدىققا ساپالى عىلىمي يلليۋستراتسيالىق قۇجاتتاردى, تاريحي كارتالاردى, ارحيۆ قۇجاتتارىنىڭ فوتوكوشىرمەلەرىن جانە رەسپۋبليكالىق, سونداي-اق ولكەلىك مۋزەيلەر مەن ارحيۆتەردەن الىنعان باسقا دا ماتەريالداردى ەنگىزۋ جونىندە اۋقىمدى جۇمىس جۇرگىزىلەدى.