قازاقستان پرەزيدەنتى قاسىم-جومارت توقاەۆتىڭ يران حالقىنا گۋمانيتارلىق قولداۋ كورسەتۋ جونىندە بەرگەن تاپسىرماسىنا سايكەس KazAID حالىقارالىق دامۋ اگەنتتىگى سىرتقى ىستەر, توتەنشە جاعداي جانە دەنساۋلىق ساقتاۋ مينيسترلىكتەرىمەن بىرلەسە وتىرىپ يران يسلام رەسپۋبليكاسىنا ارنالعان گۋمانيتارلىق كومەكتى جەتكىزدى, دەپ حابارلايدى Egemen.kz.
«سەراحس» تەمىرجول بەكەتىندە گۋمانيتارلىق جۇكتى يراننىڭ قىزىل جارتى اي قوعامىنا تاپسىرۋ ءراسىمى ءوتتى.
ءىس-شاراعا قازاقستان رەسپۋبليكاسىنىڭ يران يسلام رەسپۋبليكاسىنداعى توتەنشە جانە وكىلەتتى ەلشىسى وڭتالاپ وڭالباەۆ, يران قىزىل جارتى اي قوعامىنىڭ وكىلدەرى, سونداي-اق يران يسلام رەسپۋبليكاسى سىرتقى ىستەر مينيسترلىگىنىڭ حوراسان-ە رازاۆي پروۆينتسياسىنداعى (مەشحەد ق.) وكىلدىگىنىڭ باسشىسى عولامابباس ارباب حالەس قاتىستى.
گۋمانيتارلىق جۇك قۇرامىنا ەت كونسەرۆىلەرى, قانت, ءبىرىنشى سورتتى ۇن, مەديتسينالىق بۇيىمدار مەن دارىلىك زاتتار كىردى. قازاقستان تاراپىنان جىبەرىلگەن گۋمانيتارلىق كومەك يران حالقىنا قولداۋ كورسەتۋگە جانە الەۋمەتتىك ماڭىزى بار قاجەتتىلىكتەردى قامتاماسىز ەتۋگە باعىتتالعان.
قازاقستان ەلشىسى وڭتالاپ وڭالباەۆ يران قازاقستاننىڭ تاياۋ شىعىس پەن يسلام الەمىندەگى ماڭىزدى ساياسي, ساۋدا-ەكونوميكالىق جانە گۋمانيتارلىق سەرىكتەستەرىنىڭ ءبىرى ەكەنىن اتاپ ءوتتى.
«دوستار قيىن قىستاۋ كەزەڭدە سىنالادى. قازاقستان ءتۇرلى كەزەڭدەردە يران حالقىنا قولداۋ كورسەتىپ كەلەدى», دەپ اتاپ ءوتتى ەلشى.
ءوز كەزەگىندە يران قىزىل جارتى اي قوعامىنىڭ وكىلى قازاقستان تاراپىنا كورسەتىلگەن گۋمانيتارلىق كومەك ءۇشىن ريزاشىلىعىن ءبىلدىرىپ, بۇل قادام ەكى ەل اراسىنداعى ەكىجاقتى قاتىناستاردى جانە ءوزارا قولداۋدى ودان ءارى نىعايتۋعا ىقپال ەتەتىنىن جەتكىزدى.
30 ۆاگون گۋمانيتارلىق جۇك تەگەران قالاسىنا جەتكىزىلىپ, ءتيىستى مەكەمەلەر اراسىندا ءبولىندى.
بۇعان دەيىن ازەربايجاننىڭ يرانعا گۋمانيتارلىق كومەك جىبەرگەنىن جازعان ەدىك.