پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا تەمىرجول سالاسىن جانە ترانزيتتىك الەۋەتتى دامىتۋ ماسەلەسى قارالدى. كولىك ءمينيسترى مارات قاراباەۆ تاسىمالداۋ ديناميكاسى مەن ينفراقۇرىلىمدىق جوبالار تۋرالى باياندادى, دەپ حابارلايدى Egemen.kz.
پرەزيدەنتتىڭ قازاقستاندى تولىققاندى كولىك-لوگيستيكالىق حابقا اينالدىرۋ جونىندەگى العا قويعان مىندەتتەرىن ىسكە اسىرۋ شەڭبەرىندە ەلىمىزدە اۋقىمدى ينفراقۇرىلىمدىق جوبالار ىسكە اسىرىلىپ جاتىر:
2023 جىلدان باستاپ 2,8 مىڭ شاقىرىمنان استام تەمىرجول جوندەلدى; جىلجىمالى قۇرامدى جاڭارتۋ ءۇشىن 2024 جىلى 185 لوكوموتيۆ ساتىپ الىندى, 800 اشىق ۆاگون, 143 جولاۋشىلار ۆاگونى پايدالانۋعا بەرىلدى; قىزىلوردا, شىمكەنت, پاۆلودار جانە تۇركىستان قالالارىندا ۆوكزالدارعا كۇردەلى جوندەۋ جۇرگىزىلدى.ولجاس بەكتەنوۆ قابىلدانعان شارالار ناتيجەسىندە 2029 جىلعا قاراي ترانزيتتىك تاسىمالداۋ كولەمى 28 ملن-نان 45 ملن تونناعا دەيىن ۇلعاياتىنىن, ونىڭ ىشىندە ترانزيت 2 ملن جيىرما فۋتتىق كونتەينەرگە دەيىن وسەتىنىن اتاپ ءوتتى. سونداي-اق ول حالىقارالىق كولىك دالىزدەرىندەگى قازاقستاندىق مارشرۋتتاردىڭ باسەكەگە قابىلەتتىلىگىن ارتتىرۋ جانە سالانى جاڭعىرتۋ بويىنشا كۇش-جىگەردى ارتتىرۋ قاجەتتىگىنە توقتالدى.
تەمىرجول سالاسىن دامىتۋدىڭ 2029 جىلعا دەيىنگى تۇجىرىمداماسىن ىسكە اسىرۋ شەڭبەرىندە كەلەسىدەي جۇمىستار جوسپارلانعان:
11 مىڭ شاقىرىم تەمىرجول ۋچاسكەلەرىن جوندەۋ, 5 مىڭ شاقىرىمعا جۋىق جاڭا جانە ەكىنشى جولدار سالۋ, 2,6 مىڭ شاقىرىمعا اۆتوبۇعاتتاۋ جاساۋ, 184 ستانسانى جاڭعىرتۋ; تحكب باعىتى بويىنشا كونتەينەرلىك پوەزدار سانىن جىلىنا 400-دەن 3 مىڭ بىرلىككە دەيىن ۇلعايتۋ; 1,2 مىڭعا جۋىق جولاۋشىلار ۆاگونىن ساتىپ الۋ; داربازا–ماقتاارال جانە باقتى–اياگوز ت/ج جەلىلەرىن سالۋ, دوستىق–مويىنتى ت/ج ۋچاسكەسىنىڭ ەكىنشى جولدارىن جانە الماتى اينالما جەلىسىن سالۋ; جالپى ۇزىندىعى 1,3 مىڭ كم بولاتىن 4 تەمىرجول جوباسىن ىسكە اسىرۋ; 2025 جىلى 187 لوكوموتيۆ ساتىپ الۋ, كەلەسى 3 جىلدا – تاعى 257 بىرلىك جەتكىزۋ.