ماماندىق مارتەبەسىن كوتەرگەن چەمپيونات

چەمپيوناتقا وڭىرلىك دەڭگەيدە ۇزدىك اتانعان 555 ستۋدەنت قاتىسىپ, 30 قۇزىرەتتىلىك بويىنشا باق سىنادى. بايقاۋدا ستۋدەنتتەر اقپاراتتىق, ينجەنەرلىك, وندىرىستىك تەحنولوگيا­لار, كولىك, الەۋمەتتىك قىزمەتتەر, ديزاين جانە باسقا دا ماڭىزدى سالالار بويىنشا ءوز بىلىمدەرى مەن داعدىلارىن كورسەتتى. بۇل چەمپيوناتتىڭ باستى ماقساتى – جۇمىسشى ماماندىقتارىنىڭ بەدەلىن ارتتىرىپ, ەڭبەك نارىعىنا قاجەتتى جاس مامانداردى جۇمىسقا ورنالاستىرۋعا ىقپال ەتۋ.

چەمپيونات اياسىندا قاتىسۋ­شى­­لارمەن كەزدەسكەن پرەمەر-مينيستر ولجاس بەكتەنوۆ جاس­تار­دىڭ العان بىلىمدەرى مەن داع­دىلارىنىڭ سۇرانىسقا يە ەكەنىن اتاپ ءوتىپ, ولاردىڭ ەلىمىز ءۇشىن ماڭىزدى ەكەنىن ايتتى. «پرەزيدەنت جاريالاعان جۇ­مىس­شى مامان­دىقتار جىلى تەحنيكالىق جانە كاسىپتىك ءبىلىم بەرۋدىڭ بۇكىل ەلىمىز ءۇشىن ەرەكشە ماڭىزىن كورسەتەدى. ۇكىمەت ال­دى­نا ەكونوميكا قۇرىلىمىن جاڭ­عىرتۋ بويىنشا ءورشىل مىن­دەتتەر قويىلدى. ول ءۇشىن بىزگە ەنەرگەتيكا, قۇرىلىسشى, اۋىل شارۋاشىلىعى, كولىك جانە سۋ سالا­سىندا بىلىكتى وتاندىق ماماندار قاجەت. بۇل رەتتە تسيفرلىق ترانسفورماتسيا مەن تەحنولوگيالىق پروگرەستىڭ سىن-قاتەرلەرىنە دايىن بولۋ ماڭىزدى. سوندىقتان ءبىزدىڭ ورتاق مىندەتىمىز – قوعامنىڭ بارلىق رەسۋرسىن بىرىكتىرۋ. بۇل باعىتتا ءبىز جاستارىمىزعا جانە وسىنداي ءىس-شارالارعا جان-جاقتى قولداۋ كورسەتەتىن بولامىز», دەدى پرەمەر-مينيستر. سونداي-اق ۇكىمەت باسشىسى ستۋدەنتتەردىڭ كاسىبي داعدىلارىن كورسەتۋىنە مۇمكىندىك بەرگەن ما­مانداندىرىلعان ايماقتار قۇر­عان كومپانيالارعا العىسىن ءبىلدىردى.

وقۋ-اعارتۋ ءمينيسترى عاني بەيسەمباەۆ «WorldSkills Kazakhstan» چەمپيوناتىن تەك كاسىبي بايقاۋ عانا ەمەس, جۇمىسشى ماماندىقتارىنىڭ بەدەلىن ارتتىرىپ, ەكونوميكانىڭ تۇراقتى دامۋىنا ىقپال ەتەتىن ماڭىزدى الاڭ دەپ باعالادى. «WorldSkills» قوزعالىسىن دامىتۋ ارقىلى ءبىز حالىقارالىق ارەناداعى پوزيتسيا­مىزدى نىعايتتىق. «WorldSkills» تەك بەدەلدى بايقاۋ عانا ەمەس, سونىمەن بىرگە جۇمىسشى مامان­­دىقتارىنىڭ مارتەبەسىن ارت­تىرۋعا جانە كاسىبي ەڭبەكتىڭ ماڭىزىن دارىپتەۋگە باعىتتالعان ماڭىزدى الاڭ. بۇل قوزعالىس ەلىمىزدىڭ تۇراقتى ەكونوميكالىق ءوسۋى مەن تەحنولوگيالىق پروگرەس­كە قول جەتكىزۋى ءۇشىن قاجەتتى كادرلىق الەۋەتتى قالىپتاستىرۋدا اي­رىق­شا ءرول اتقارادى. سالا­لىق مينيسترلىكتەرمەن ىنتى­ماق­تاس­تىق ارقىلى ءبىز ەڭبەك نارى­عىندا سۇرانىسقا يە مامانداردى دايارلاپ, ولاردى جۇمىسپەن قامتۋعا جاعداي جاسايمىز», دەدى وقۋ-اعارتۋ ءمينيسترى.

«تالاپ» كەاق پرەزيدەنتى سانجار تاتىبەكوۆتىڭ ايتۋىنشا, ستۋدەنتتەر وسى الاڭدا ءوز قابىلەتتەرىن كورسەتۋ ارقىلى ەلىمىزدىڭ ادامي كاپيتالىن ارتتىرۋعا ۇلەس قوسادى. ء«بىزدىڭ الاڭ ءوز داعدىلارىمىزدى كورسەتە وتىرىپ, قازاقستاننىڭ ادامي كاپيتالىن ارتتىرۋعا قاتىسۋعا دايىن ەكەنىمىزدى بىلدىرەدى. ءبىز تجكب جۇيەسىنە «WorldSkills International» ستاندارتتارىن ەنگى­زەمىز, ءتيىستى وقىتۋ ارقىلى پەدا­گوگتەردىڭ بىلىكتىلىگىن ارتتىرا­مىز. سونداي-اق ستاندارتتار دەمون­­سترا­تسيالىق ەمتيحان وتكىزۋ ارقىلى ءبىلىمدى قورىتىندى باقىلاۋ كەزىن­دە قولدانىلادى», دەدى ول.

چەمپيونات قورىتىندىسى بو­يىنشا 108 جەڭىمپاز انىقتالدى. جەڭىمپازدار 32 التىن, 37 كۇمىس جانە 39 قولا مەدال يەلەندى. 155 قاتىسۋشى «ۇزدىك مەدالونعا» يە بولدى. كوماندالىق ەسەپتە استانا قالاسى مەن اباي وبلىسىنىڭ قۇراما كومانداسى كوش باستادى, ەكىنشى ورىندى – الماتى قالاسى جانە ءۇشىنشى ورىنعا قاراعاندى وبلىسى يە بولدى.

ايتا كەتەيىك, رەسپۋبليكا­لىق كەزەڭنىڭ جەڭىمپازدارى كەلەسى جىلدىڭ 9-13 قىركۇيەگى ارا­لى­­عىندا دانيادا وتەتىن «EuroSkills-2025» حالىقارالىق چەم­پيو­­ناتىندا ەلىمىزدىڭ نامىسىن قورعايدى.