«چيكي-چيكي»

دەپ سويلەيتىن شيكى شەنەۋنىكتىڭ ماسەلەسى شەشىلدى بۇدان ءبىراز بۇرىن الەۋمەتتىك جەلىلەردە «چيكي-چيكي» سوزىمەن ەلگە تا­نىل­عان شالقارلىق شەنەۋنىككە ءتارتىپ­تىك كەڭەستىڭ الدىندا جاۋاپ بەرۋگە تۋرا كەلدى. ينتەرنەت «جۇلدىزىنا» اينال­عان شالقار اۋداندىق تۇرعىن ءۇي-كوم­مۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبو­لى­مىنىڭ باسشىسى ايان قورقىت ۇلىنىڭ اتى اتالۋى مۇڭ ەكەن جينالعاندار ءتۇ­گىل, تارتىپتىك كەڭەس مۇشەلەرىنىڭ ءوز­دەرى ەزۋ تارتتى. سوعان قاراماستان, كەڭەس مۇشەلەرى اۋداننىڭ كوممۋنالدىق شارۋا­شى­لىعىنا جاۋاپتى بىلدەي باسشىنى  باسىنان سيپاي قويمادى. ءبىر اۋىزدان «مەملەكەتتىك قىزمەتكەردىڭ ار-نامىس كودەكسىن بۇزدى» دەپ تانىدى. – مامىر ايىندا باق-تا «شالقار­لىق شەنەۋنىك الەۋمەتتىك جەلىدە كۇلكىگە اينالدى» دەگەن اتپەن بىرنەشە ماقالا جارىق كوردى. Youtube جەلىسىندە بەينەروليك جاريالاندى. ايان قورقىت ۇلى شالقارداعى جولداردىڭ جايىنا شا­عىم­دانعان تۇرعىنداردىڭ سوزىنە جاۋ­اپ الۋعا بارعان جۋرناليسكە دورەكى جاۋاپ قايتارعان. ياعني, مەملەكەتتىك قىزمەتكەردىڭ ار-نامىس كودەكسىن بۇزعان. ال, كودەكستە «كوپشىلىك الدىندا ءسوز سويلەگەن كەزدە مەملەكەتتىك قىزمەتكەر مادەنيەتتى بولۋى ءتيىس» دەپ كورسەتىلگەن, – دەيدى تارتىپتىك كەڭەستىڭ باس مامانى باعدات كەنجەعاليەۆ. «ساسقان ۇيرەك ارتىمەن جۇزەدى» دەگەندەي, مىنبەگە شىققان ايان قورقىت ۇلى شالقارداعى جولداردىڭ جوندەلۋ جايىن ايتا جونەلگەندە ءتار­تىپ­تىك كەڭەس مۇشەلەرى «وبلىستى ۇياتقا قال­دىر­عانىن» ايتىپ, ورتا جولدان توقتا­تىپ, جۋرناليسكە دورەكى سويلەۋىنىڭ سەبەبىن سۇرادى. جان بەرۋ وڭاي ما, ايان قورقىت ۇلى كامەرانىڭ قوسۋلى تۇرعانىن اڭعار­ماعانىن ايتىپ اقتالدى. بىراق,«چيكي-چيكي» سوزىمەن ينتەرنەت «جۇلدىزىنا» اينالعان شەنەۋنىكتىڭ ءسوزى ەشكىمدى سەندىرمەدى. تارتىپتىك كەڭەس ايان قور­قىت­ ۇلىن قىزمەتىنە تولىقتاي سايكەس ەمەس دەپ شەشتى. ينتەرنەتتەگى ول «قىزىقتى» ءبىز دە كورىپ, ءوز كوزىمىزگە سەنەر-سەنبەسىمىزدى بىلمەگەنبىز. ول ارادا جالعىز «چيكي-چيكي» ءسوزى عانا ەمەس, شەنەۋنىكتىڭ باسقا دا تەرىس قىلىقتارى كۇلكىمىزدى كەلتىرگەن. ءتىپتى, استامسىپ سويلەۋىنەن «مىناۋ قاي­تەدى» دەپ ءىش جيىپ قالعانبىز. مۇنىڭ ءوزى ءبىزدى ءالى دە بالالىعى قالماعان ادام بيىك مانساپقا قالاي جەتكەن, سونداي-اق, ارتىندا جەبەۋشىسى بار-اۋ دەگەن ويعا قالدىرعانىن جاسىرۋدىڭ رەتى جوق. مىنە, ءبىزدىڭ حالىققا قىزمەت ەتەدى دەگەن شەنەۋنىكتەرىمىزدىڭ ءتۇرى وسىنداي بول­سا, تۇڭىلمەسكە شارا قايسى؟ مۇنى شەنە­ۋ­نىكتىڭ شيكىلىگى دەيسىز بە, الدە استامسۋدىڭ اقىرى دەيسىز بە, ءوزىڭىز ءبىلىڭىز. ساتىبالدى ءساۋىرباي, «ەگەمەن قازاقستان». اقتوبە وبلىسى.