سىرتقى ىستەر ءمينيسترى ەرلان ىدىرىسوۆ قازاقستان حالقى اسسامبلەياسى قۇرىلۋىنىڭ 20 جىلدىعىنا وراي ۇيىمداستىرىلعان كونفەرەنتسياعا قاتىسۋ ءۇشىن استاناعا كەلگەن ەقىۇ-نىڭ ۇلتتىق ازشىلىقتار ىستەرى جونىندەگى جوعارعى كوميسسارى استريد تۋرسپەن كەزدەستى.
كەزدەسۋ بارىسىندا تاراپتار قازاقستان مەن ەقىۇ جوعارعى كوميسسارى كەڭسەسى اراسىنداعى ىنتىماقتاستىقتىڭ قازىرگى احۋالى مەن بولاشاعىن تالقىلادى.
ە. ىدىرىسوۆ ا.تۋرس ساپارىنىڭ تاعاتتى ءارى كوپۇلتتى قوعام قالىپتاستىرۋ ىسىندەگى ەلىمىزدىڭ جەتىستىكتەرى تۋرالى اقپاراتتى «تۋرا دەرەكتەمەدەن» الۋداعى جانە قازاقستانداعى ەقىۇ باعدارلامالارى كەڭسەسىنىڭ جوبالىق قىزمەتىن بەلسەندىلەندىرۋدە جاڭا مۇمكىندىكتەر اشۋداعى ماڭىزدىلىعىن اتاپ ءوتتى.
سىرتقى ساياسات ۆەدومستۆوسىنىڭ باسشىسى قازاقستان قارجى داعدارىسىنا ءساتتى قارسى تۇرىپ, باسەكەگە قابىلەتتى 50 ەلدىڭ ەكونوميكالارى قاتارىنا ەنگەنىن جانە الەۋمەتتىك-ەكونوميكالىق دامۋدىڭ ەرەكشە ۇلگىسىن قالىپتاستىرعانىن ايرىقشا اتاپ ءوتتى. «كۇش-جىگەردىڭ ناتيجەسىندە قازاقستاننىڭ 2050 جىلعا دەيىنگى دامۋ ستراتەگياسىندا ايقىندالعان الەمنىڭ 30 دامىعان ەلدەرى قاتارىنا ەنۋدى ماقسات ەتكەن «نۇرلى جول» ەكونوميكالىق باعدارلاماسىن ىسكە قوسۋ جۇزەگە استى», – دەپ كورسەتتى مينيستر.
ە.ىدىرىسوۆ قازاقستانداعى تاعاتتىلىق پەن سەنىم احۋالى ەلىمىزدىڭ باستى برەندىنە اينالعانىن, الەۋمەتتىك-ەكونوميكالىق دامۋداعى تابىس ەڭ الدىمەن قازاقستانداعى ۇلتارالىق تۇسىنىستىك پەن كونفەسسياارالىق كەلىسىمنىڭ ارقاسىندا ىسكە اسىپ وتىرعانىن جانە بۇل كەلىسىمگە قولداۋ كورسەتۋ قازاقستان پرەزيدەنتى ن.ءا.نازارباەۆتىڭ سىرتقى ساياساتىنىڭ ماڭىزدى باسىمدىعى بولىپ تابىلاتىنىن اتاپ ءوتتى.
ءمينيستردىڭ ايتۋىنشا, قازاقستان ساياساتىنىڭ ەرەكشەلىگى ونىڭ «تاعاتتىلىق» ۇعىمىن «وزگەلەرگە توزىمدىلىك تانىتۋ» رەتىندە عانا ەمەس, وزگەلەردى قۇرمەتتەۋ, ءوزارا تاتۋ ءومىر ءسۇرۋ بارىسىندا ءبىر-ءبىرىنەن ۇيرەنۋ, رۋحاني-مادەني بايۋدى قامتيتىن «تاعاتتىلىقتىڭ تارتىمدى ۇلگىسى» رەتىندە ۇسىنۋىندا بولىپ وتىر.
ا.تۋرس ەلدەگى الەۋمەتتىك-ەكونوميكالىق دامۋدى ودان ءارى جالعاستىرۋ مەن جاڭارتۋ شارالارىن, اتاپ ايتقاندا, بەس ينستيتۋتتىق رەفورما مەن 100 ناقتى قادامنىڭ «ۇلت جوسپارىن» جۇزەگە اسىرۋ اياسىنداعى ءىس-قيمىلىن جوعارى باعالاپ, «ۇلتارالىق قاتىناستار تۇراقتىلىعى مەن دوستىق بۇگىنگى تاڭدا ەقىۇ ءۇشىن اسا وزەكتى ماسەلەگە اينالعالى تۇرعانىن» اتاپ كورسەتتى. ول, سونىمەن قاتار, ءوزارا ۇنقاتىسۋدى حالىقارالىق دەڭگەيدە نىعايتۋ ءۇشىن تاياۋدا وتكەن الەمدىك جانە ءداستۇرلى دىندەر كوشباسشىلارىنىڭ V سەزىنىڭ ماڭىزدىلىعىن اتاپ ءوتتى.
سۇحباتتاستار ءوزىن جاقسى جاعىنان تانىتقان قازاقستانداعى ۇلتارالىق كەلىسىم ساياساتىن ودان ءارى قولداۋدىڭ جانە وسىنداي شەتىن ماسەلەدە ەقىۇ-مەن تاجىريبە الماسۋدى نىعايتۋدىڭ ماڭىزدىلىعىن كولدەنەڭ تارتتى.
«ەگەمەن-اقپارات».