ادال ەڭبەك ەتىپ, ماڭداي تەرمەن تاپقان مالدان اسقان قايىر مەن بەرەكە جوق. ون ەكى مۇشەسى ساۋ بولا تۇرا, وزگەدەن ءبىر نارسە دامەتىپ سۇراۋدى ادەتكە اينالدىرۋ نە پايدانى كوزدەپ, تىلەنشى بولۋ ادامدى كەدەيلىكتەن قۇتقارمايدى, كەرىسىنشە, ماسىلدىق ءومىر سالتىنا ۇرىندىرادى. دەمەك تۇرمىسى تومەن, بىراق اياق-قولى ءبۇتىن ادامدارعا تەگىن دۇنيە بەرگەننەن گورى, ونىڭ ەڭبەك ەتۋىنە جاعداي جاساۋ, قولعابىس قىلۋ, بالىق ورنىنا قارماق بەرۋ – ەڭ دۇرىس شەشىم.
وسى ورايدا قازاقستان مۇسىلماندارى ءدىني باسقارماسى جانىنان قۇرىلعان «زەكەت جانە قايىرىمدىلىق» قورى تاراپىنان قولعا الىنىپ جاتقان اۋقىمدى جوبالار جونىندە اڭگىمەلەۋدىڭ رەتى كەلىپ تۇر. سونىڭ ءبىرى – «Zeket hub» قايىرىمدىلىق ورتالىعى. بۇل ورتالىق مۇقتاج وتباسىلاردىڭ اياققا تۇرۋىنا جاعداي جاساۋ, سونداي-اق ولاردى كاسىپكە باۋلۋ باعىتىندا جۇمىس جۇرگىزىپ كەلەدى.
استانا, الماتى قالالارى مەن قىزىلوردا, الماتى جانە اقمولا وبلىستارىندا قىزمەت ەتەتىن ورتالىقتا تۇرمىس جاعدايى تومەن وتباسىلاردان شىققان جاندارعا نارىقتاعى سۇرانىسقا يە ماماندىقتار بويىنشا قىسقامەرزىمدى وقىتۋ كۋرستارى ۇيىمداستىرىلعان. اتاپ ايتقاندا, كاسىپ مەكتەبى (دانەكەرلەۋشى, جيhاز قۇراستىرۋشى, سمم, موبيلوگرافيا, كىلت جاساۋ, ەمدىك دەنەشىنىقتىرۋ جاتتىقتىرۋشىسى, ت.ب.), بيزنەس مەكتەبى (جوبالاۋ مەنەدجەرى, ءونىم مەنەدجەرى), ەتنوكاسىپ (استاۋ جاساۋ, ۇلتتىق كيىم تىگۋ, كورپە تىگۋ), اعىلشىن ءتىلى كۋرستارى بار. سونداي-اق «Zeket hub» ورتالىعىندا تىگىن شەبەرحاناسى, جيھاز شىعارۋ, مەتالل دانەكەرلەۋ, كىلت جاساۋ وقۋ-جاتتىعۋ تسەحتارى جۇمىس ىستەيدى.
جاڭا ماماندىقتاردى يگەرىپ, ومىردەن ءوز ورنىن تابۋعا نيەتتى مۇقتاج جاندار بۇل قىسقامەرزىمدى وقىتۋ كۋرستارىن تامامداعان سوڭ, ولارعا سەرتيفيكات تابىستالىپ, جۇمىس ورىندارىنا باعىت-باعدار بەرىلەدى. قور ماماندارىنىڭ ايتۋىنشا, نارىقتا سۇرانىسقا يە ماماندىقتاردى مەڭگەرۋ ارقىلى تىرشىلىگىن دوڭگەلەتىپ, باسقا مۇقتاجدارعا دا كومەك بەرە الاتىنداي دارەجەگە جەتىپ, قوعامعا پايدالى ءارى ساۋاپتى ىستەرىمەن ەڭبەكقورلىقتىڭ ۇلگىسىن كورسەتەتىن داۋلەتتى مۇسىلماندار قاتارىن تولتىرۋدىڭ ماڭىزى زور. وسى ورايدا تەڭىزگە تامعان تامشىداي بولسا دا, ءوز ورنىن تابا الماي جۇرگەن نەمەسە ماماندىقتى وقىپ ۇيرەنۋگە مۇمكىنشىلىگى شەكتەۋلى مۇقتاج جانداردىڭ اياققا تۇرىپ كەتۋىنە اتسالىسىپ, قوعامنىڭ بەلگىلى ءبىر سالاسىنىڭ مامانىن قالىپتاستىرۋ – قوردىڭ العا قويعان نەگىزگى ماقساتتارىنىڭ ءبىرى.
ەڭبەككە تولىق قابىلەتتى جاندارمەن قاتار, مۇمكىندىگى شەكتەۋلى ازاماتتاردىڭ دا وزگەلەرمەن تەڭ دارەجەدە ەركىن ءومىر ءسۇرۋى ءۇشىن قابىلەتىنە قاراي كاسىپكە باۋلۋ دا نازاردان تىس قالعان ەمەس. وسى رەتتە «Zeket hub» قايىرىمدىلىق ورتالىعىندا ەستۋ جانە سويلەۋ قابىلەتى ناشار جاندارعا ارنالعان «ەرەكشە كاسىپ» جوباسى بويىنشا كىلت جاساۋ كۋرستارى وتكىزىلەدى. الداعى ۋاقىتتا مىلقاۋ جاندارعا كىلت جاساۋ بويىنشا ساباقتار جۇيەلى تۇردە جۇرگىزىلمەك. سونىمەن قاتار وسى جىلى الماتى وبلىسىندا زاعيپ جاندارعا ارنالعان وقۋ ورتالىعىن اشۋ جوسپارلانىپ وتىر.
قازىرگى جاhاندانۋ زامانىندا حالىقارالىق دەڭگەيدە اعىلشىن ءتىلىن مەڭگەرگەن ماماندارعا سۇرانىس وتە جوعارى. وسىعان وراي «زەكەت جانە قايىرىمدىلىق» قورى تاراپىنان ءتىل ۇيرەنۋگە ىنتاسى بار, بىراق جاعدايى تومەن بالالارعا ارناپ اعىلشىن ءتىلى كۋرستارى ۇيىمداستىرىلعان. قازىرگى ۋاقىتتا ەلىمىزدىڭ شالعاي ەلدى مەكەندەرىندە تۇراتىن تۇرمىسى تومەن وتباسىلاردان شىققان 10-نان اسا بالاعا اعىلشىن ءتىلى پانىنەن ونلاين ساباق جۇرگىزىلىپ جاتىر.
جوعارىدا ايتقانداي, قور تاراپىنان قولعا الىنعان تاعى ءبىر جەمىستى جەتىستىك – «ومىرگە ءۇمىت سىيلا» جوباسى اياسىندا ەمدىك دەنەشىنىقتىرۋ نۇسقاۋشىلارىن دايارلاۋ كۋرسىن قۇرۋ ماقساتىندا ارنايى باستاما قولعا الىنعان. ناتيجەسىندە, وڭىرلەردەگى 10-عا جۋىق نۇسقاۋشى اتالعان كۋرستا وقىپ, بىلىكتىلىگىن ارتتىردى.
«زەكەت جانە قايىرىمدىلىق» قورى حالىق يگىلىگى ءۇشىن ۇزاق مەرزىمگە پايداسىن بەرەتىن جوبالاردى دا قوسىمشا قولعا الدى. سونىڭ ءبىرى – قوعامداعى الەۋمەتتىك از قامتىلعان مۇقتاج وتباسىلاردى نەمەسە ءالسىز توپتاردى قامقورلىققا الۋ ماقساتىندا «Qaz-qatar» قۇراستىرىلمالى تاۋىق فەرمالارى جوباسىن ىسكە قوستى. جالپى, قۇس فەرمالارىن دامىتۋ – حالىقتى ەت جانە جۇمىرتقامەن قامتاماسىز ەتۋ ارقىلى الەۋمەتتىك جاعدايدى جاقسارتۋعا مۇمكىندىك بەرەدى. سونداي-اق فەرمالار سانىن كوبەيتۋ ارقىلى جۇمىسسىز جۇرگەن ازاماتتاردى كاسىپكە باۋلىپ, جۇمىسپەن قامتۋ اۋقىمىنىڭ كەڭەيەتىنىنە ءۇمىت بار. قازىرگى ۋاقىتتا تۇركىستان وبلىسىندا قۇراستىرىلمالى تاۋىق فەرمالارى جۇمىس جۇرگىزىپ كەلەدى. وندا 4 مىڭ شاماسىندا تاۋىق بار.
بۇگىنگى زامان تالابى – ءبىلىم الۋ مەن كəسىپ قىلۋ. وكىنىشكە قاراي, قوعامدا اياققا تۇرىپ كەتۋ ءۇشىن باستاپقى كاسىپتىك ءبىلىمدى الۋعا جاعدايى جەتپەيتىن مۇقتاجدار دا بارشىلىق. «كوپ تۇكىرسە – كول» دەمەكشى, مۇمكىندىگى بار ادامدار سولارعا قولۇشىن سوزىپ, دەمەپ جىبەرسە – ساۋاپتى ءىس. قوردىڭ العا قويىپ وتىرعان ماقساتى دا – وسى. جوعارىدا اتالعان جوبالار – الەۋمەتتىك از قامتىلعان توپتاردىڭ كۇن كورىسىن مەيلىنشە جاقسارتىپ, جارقىن بولاشاققا سەنىمىن ارتتىراتىن, تىرشىلىك كوزىن تابا الماي, ەڭسەسى تۇسكەن جانداردىڭ قوعامنىڭ تولىققاندى مۇشەسى رەتىندە قالىپتاسۋىنا ىقپال ەتەتىن مۇمكىندىك بولارىنا سەنىم مول.
ايتا كەتسەك, وسىنداي يگى ماقساتتى باسشىلىققا العان «زەكەت جانە قايىرىمدىلىق» قورى 2012 جىلى قۇرىلعان. ونىڭ وسى جىلدارى جۇزەگە اسىرعان ەڭ ءىرى جوباسى دەپ «ەل ۇلەسى – پاتەرگە» قايىرىمدىلىق اكتسياسىن ايتۋعا بولادى. تۇراقتى تۇردە ءوتىپ كەلە جاتقان بۇل اكتسيا اياسىندا وسى كۇنگە دەيىن 788 مۇقتاج وتباسىعا پاتەر كىلتى تابىستالدى. ال «تايقازان», «قولدان-قولعا», «كيىم-كەشەكپەن كومەك», ت.ب. جوبالارى اياسىندا بارلىق وڭىردە از قامتىلعان وتباسىلارعا قارجىلاي كومەك, ازىق-ت ۇلىك جانە كيىم-كەشەك ۇلەستىرىلىپ كەلەدى.