اقتاۋداعى تەڭىز جاياۋ اسكەرلەرى بريگاداسى جاقىندا مەرزىمدى اسكەري قىزمەتىن وتەۋشىلەر قاتارىنا قابىلدانعان جاس ساربازدارمەن تولىققان ەدى. العاشقى اسكەري دايىندىقتان ءوتىپ, جاۋىنگەرلىك ءومىردىڭ قيىندىقتارىنا توسەلە باستاعان جاس ساربازدار ماڭعىستاۋ وبلىسىنداعى «ويماشا» پوليگونىندا تانك جۇرگىزىپ, سىناقتان ءوتتى.
اقتاۋ گارنيزونى ءباسپاسوز قىزمەتىنىڭ حابارلاۋىنشا, «باتىس» وڭىرلىك قولباسشىلىعى تەڭىز جاياۋ اسكەرلەرى بريگاداسىنىڭ جانە ماتەريالدىق-تەحنيكالىق قامتاماسىز ەتۋ بازاسىنىڭ 576 جاس ساربازى ناقتى ۇرىس قيمىلدارىنا بارىنشا جاقىن جاعدايدا وقۋدان ءوتىپ جاتىر.
– تانك جۇرگىزىپ, سىناقتان ءوتۋ جاۋىنگەرلەردى جاقىن قاشىقتىقتاعى ۇرىس جاعدايىندا جاۋدىڭ ساۋىتتى تەحنيكاسىمەن كۇرەسۋ ادىستەرىن ۇيرەتۋگە مۇمكىندىك بەرەدى. جاتتىعۋدىڭ پسيحولوگيالىق تۇرعىدان قيىندىعىنا قاراماستان, جاۋىنگەرلەردىڭ ءبارى كەدەرگىلەردى ەڭسەرە ءبىلدى, – دەپ اتاپ ءوتتى باتالون كومانديرىنىڭ ورىنباسارى كاپيتان راتبەك قۋاتبەكوۆ.
قيىن تاپسىرمانى باستاماس بۇرىن ساربازدار شارتتى قارسىلاستىڭ تانكتەرىمەن كۇرەسۋدىڭ نەگىزدەرىن يگەردى. سونداي-اق ولارعا ءارتۇرلى ۇرىس جاعدايىندا تانككە قارسى گراناتالاردى جانە قارۋ-جاراقتى ساۋىتتى ماشينالارعا قارسى قولدانۋ ەرەجەلەرى مەن تاسىلدەرى ءتۇسىندىرىلدى.
– تاڭەرتەڭنەن باستاپ كەدەرگىلەر جولاعىنا شىقتىق. الدىمەن كالاشنيكوۆ اۆتوماتىن بولشەكتەپ, جينادىق. سودان كەيىن لاستانعان ايماق پەن تىكەندى سىمدى ەڭسەرىپ, 20 كيلولىق جۇكپەن ءجۇرىپ وتتىك. ساباق تانكتەردى جۇرگىزۋمەن اياقتالدى. العان اسەرىمدى سوزبەن ايتىپ جەتكىزۋ قيىن. مۇنى ءوزىڭىز سەزىنۋىڭىز كەرەك, – دەيدى اقمولا وبلىسىنان شاقىرىلعان داۆيد ماسسەروۆ.
جاس جاۋىنگەرلەر كۋرستى 23 قاراشادا اياقتاپ, سوسىن اسكەري انت بەرىپ, تەڭىز جاياۋ اسكەرلەرىنىڭ شابۋىل باتالوندارىنا جىبەرىلەدى.
ماڭعىستاۋ وبلىسى