امەريكالىق جازۋشى ايزەك ازيموۆ «روبوت ادامعا زيان تيگىزبەك تۇگىل, وزىنەن كەلەتىن قاۋىپتەردەن دە قۇتقارۋى كەرەك» دەيدى. بۇل – فانتاست قالامگەردىڭ ءوزى جان بەرەتىن روبوتتارىنا قوياتىن باستى تالابى. ال ەڭ عاجابى, شىنايى ومىردە دە كوپتەگەن روبوت «جاناشىرلىق» قامىتىن كيىپ ءجۇر. سوزىمىزگە دالەل دە كوپ.
وتقا سالساڭ, جانبايدى. 2019 جىلى پاريجدەگى نوتر-دام سوبورىندا ۇلكەن ءورت شىققان كەزدە, فرانتسۋز ءورت سوندىرۋشىلەرى قاۋىپتى ايماقتارعا كىرە الماي قالدى. ولاردىڭ ورنىنا «Colossus» اتتى ارنايى جاسالعان ءورت ءسوندىرۋشى روبوت تەر توكتى. ول 3000 ليتر سۋدى 1 مينۋتتا جەتكىزۋگە قابىلەتتى ەدى. ءارى جىلۋدان قورعاناتىن ماتەريالمەن قاپتالعان, بۇل وعان جوعارى تەمپەراتۋرالى ايماقتاردا ەركىن جۇرۋگە كومەكتەسەدى. وسى روبوتتىڭ ارقاسىندا ءورت سوندىرۋشىلەرگە قاۋىپتى اۋماقتان شىعىپ, سىرتتا جۇمىس ىستەۋگە جاعداي جاسالىپ, ولاردىڭ ومىرىنە قاۋىپ تونگەن جوق.
سۋعا سالساڭ, باتپايدى. گرەكيا جاعالاۋىندا بوسقىندار سۋعا باتقان كەزدە «EMILY» روبوتى بارىن سالدى. روبوت-قايىق 37 كم/ساع جىلدامدىقپەن ءجۇزىپ, جانى مۇرىن ۇشىنا كەلگەن حالىققا جەدەل جاردەم كورسەتتى. 2016 جىلى 10 كۇن ىشىندە 240-تان استام ادامدى قۇتقارىپ, قاۋىپسىز جەرگە جەتكىزدى. ونىڭ ەكى جاقتى بايلانىس جۇيەسى الەۋەتىن ارتتىرا تۇسەدى. قۇتقارۋشىلار مەن سۋداعى ادامداردى وڭاي بايلانىستىرادى.
جەر سىلكىنسە, كومەكتەسەدى. 2017 جىلى مەكسيكادا بولعان جەر سىلكىنىسىنەن كەيىن, ءۇيىندى استىندا قالعانداردى ىزدەۋگە كارنەگي-مەللون ۋنيۆەرسيتەتى ازىرلەگەن «Snakebot» جىلان-روبوت قولدانىلدى. بۇل روبوت جىلان سياقتى قيمىلداپ, تار ءارى قاۋىپتى جەرلەرگە ەنەدى. كامەراسى بار قۇلتەمىر قۇتقارۋشىلارعا جەر استىنىڭ استان-كەستەڭىنىڭ ءبارىن كورسەتەدى. سولاي ۆيزۋالدى مالىمەتتەر ارقىلى, زارداپ شەككەن ادامدار تەز تابىلادى.
كەرەك كەزدە سامعايدى. «Zipline» كومپانياسىنىڭ دروندارى قيىر-قيىر جەرلەرگە مەديتسينالىق كەرەك-جاراقتاردى جەتكىزۋگە ارنالعان. 2014 جىلدان بەرى افريكادا, ونىڭ ىشىندە رۋاندادا كوپ قولدانىلىپ كەلەدى. قان, ۆاكتسينا, ءدارى-دارمەكتەردى دەرەۋ اپارىپ, قانشا ادامنىڭ بەتىن بەرى قاراتتى. مىسالى, 2016 جىلى العاشقى مەديتسينالىق جۇكتەمەلەردى تاسىپ, 150 000-نان استام ەمدەلۋشىگە كومەكتەستى.