زاڭسىز سحەما ارقىلى پايدا تاپقان قۇرىلىس كومپانيالارى انىقتالدى

پروكۋراتۋرا ورگاندارى تۇرعىن ءۇي قۇرىلىس سالاسىندا ۇلەسكەرلەردىڭ اقشاسىن زاڭسىز تارتۋ فاكتىلەرىن انىقتاۋ ماقساتىندا تۇراقتى نەگىزدە مونيتورينگ جۇرگىزەدى.

ەسكە سالا كەتەيىك, سالىنىپ جاتقان تۇرعىن ءۇي كەشەندەرىندەگى پاتەرلەردى ساتىپ الۋ ءتارتىبى تۇرعىن ءۇي قۇرىلىسىنا ۇلەستىك قاتىسۋ تۋرالى شارتتار جاساسۋ «تۇرعىن ءۇي قۇرىلىسىنا ۇلەستىك قاتىسۋ تۋرالى زاڭىمەن (بۇدان ءارى - زاڭ) رەتتەلەدى.

الايدا, كەيبىر قۇرىلىس كومپانيالارى زاڭ تالاپتارىن اينالىپ وتەتىن مامىلەلەر جاساقتاۋ (الدىن الا ساتىپ الۋ-ساتۋ شارتتارى, الدىن-الا برونداۋ كەلىسىمدەرى جانە ت.ب.) ارقىلى جىلجىمايتىن م ۇلىكتى ساتىپ جاتىر. مۇنداي ارەكەتتەر ءۇشىن اكىمشىلىك قۇقىق بۇزۋشىلىق تۋرالى كودەكستىڭ 320-بابى بويىنشا جاۋاپتىلىق قاراستىرىلعان.

«سوڭعى ەكى جىلدا وبلىس پروكۋراتۋراسىنىڭ اكتىلەرى بويىنشا 60 قۇرىلىس سالۋشى اكىمشىلىك جاۋاپتىلىققا تارتىلىپ, 46 ملن تەڭگەدەن استام ايىپپۇل ءوندىرىلدى. قازىرگى ۋاقىتتا اقتاۋ قالاسىندا سالىنىپ جاتقان 5 تۇرعىن ءۇي كەشەنىنە («Manhattan» – 41 ش.ا., №1/1 ۋچاسكە, «دوستىق» – 20 ش.ا., 21 ءۇي, «پرەمەر» – 14 ش.ا., 84 ءۇي, «Adal Town» – 29 ش.ا., 171 ءۇي, «Aktau Riviera» – جىلى جاعاجاي ايماعى, 120 عيمارات) ۇلەسكەرلەردەن قاراجات تارتۋعا رۇقسات بەرىلدى», دەلىنگەن وبلىستىق پروكۋراتۋرا حابارلاماسىندا.

بۇل رەتتە, جاڭا عيماراتتاردا پاتەرلەردى تاڭداۋ كەزىندە بىرنەشە تارماققا نازار اۋدارۋ كەرەك. اتاپ ايتقاندا, قۇرىلىس كومپانياسىندا كەلەسى قۇجاتتار بولۋى كەرەك:

قۇرىلىس كومپانياسىندا جەرگىلىكتى اتقارۋشى ورگانداردان الىنعان جەرگە ءتيىستى قۇقىق بەرۋ تۋرالى شەشىم; ينجەنەرلىك قامتاماسىز ەتۋ جانە كوممۋنالدىق قىزمەتتەر كوزدەرىنە قوسىلۋعا تەحنيكالىق شارتتار; سالىمشىلاردىڭ قاراجاتىن تارتۋعا رۇقسات(بىرىڭعاي وپەراتوردىڭ كەپىلدىگىن الۋ, ەكىنشى دەڭگەيدەگى بانكتىڭ جوباعا قاتىسۋى جانە كوپپاتەرلى تۇرعىن ءۇيدىڭ قاڭقاسى تۇرعىزىلعاننان كەيىن).

سونىمەن قاتار جەرگىلىكتى اتقارۋشى ورگاننان ساۋلەت-جوسپارلاۋ تاپسىرماسى الىنىپ, باس ساۋلەتشىمەن كەلىسىلگەن نوبايلىق جوبا, جۇمىس جوباسى ساراپتاماسىنىڭ وڭ قورىتىندىسى جانە قۇرىلىس-مونتاجداۋ جۇمىستارىنىڭ باستالعانى تۋرالى حابارلامانىڭ بولۋى ماڭىزدى.

«ەگەر بۇل قۇجاتتار ۇسىنىلماعان جاعدايدا, قۇرىلىس وبەكتىسى زاڭسىز, ياعني ءتيىستى رۇقسات قۇجاتتارمەن رەسىمدەلمەگەن بولىپ ەسەپتەلەدى»,  دەلىنگەن حابارلامادا.