ەلىمىزدە قوقىستى قايتا وڭدەۋ ماسەلەسىنە ءجىتى نازار اۋدارىلماق. الداعى ۋاقىتتا جىلىنا 1 ملن 200 مىڭ توننا قاتتى تۇرمىستىق قالدىقتى قايتا وڭدەيتىن 37 زاۋىت سالۋ جوسپارلانىپ وتىر. سونداي-اق جۇمىس ىستەپ تۇرعان 8 زاۋىت جاڭارتۋدان وتەدى.
ينفراقۇرىلىمدى جاقسارتۋ ماقساتىندا وڭىرلەردەگى كاسىپورىنداردى جەڭىلدىكپەن قارجىلاندىرۋ تەتىگى بەكىتىلمەك. وسى قارجىعا قالدىقتاردى سۇرىپتاۋعا ءارى قايتا وڭدەۋگە ارنالعان زاماناۋي قوقىس تاسيتىن ماشينالار مەن جابدىقتار ساتىپ الىنباق. قارىزدىڭ سىياقى مولشەرلەمەسى – 3%. 3 جىلدان 15 جىلعا دەيىن بەرىلەتىن قارجىعا 185 ملرد تەڭگە ءبولىندى. تۇرمىستىق قالدىقتى وڭدەۋ كولەمى 1,5 ملن تونناعا دەيىن ارتادى.
«ناتيجەسىندە, 232,2 ملرد تەڭگە سوماعا 94 جوبا ىرىكتەلدى. جوبالاردى جۇزەگە اسىرۋ ناتيجەسىندە برۋسچاتكا, ليۋك, قوقىس باك, سترەيچ پلەنكاسى, كولىك بامپەرى سياقتى تۇتىنۋ تاۋارلارى شىعارىلادى», دەيدى ەكولوگيا جانە تابيعي رەسۋرستار ءمينيسترى ەرلان نىسانباەۆ.
وسى جوبالار اياسىندا 4,7 ملن توننا تۇرمىستىق قالدىق سۇرىپتالادى. ال قالدىقتاردى سۇرىپتاۋ جەلىلەرىن سالۋ, جاڭعىرتۋ ماقساتىندا وڭىرلەردە 21 جوبا قولعا الىنباق. بۇل كاسىپورىنداردا جىلىنا 3 ملن تونناعا دەيىن قوقىس سۇرىپتالسا, شىعىننىڭ جالپى قۇنى 49 ملرد تەڭگەدەن اسادى. مۇنىڭ ىشىندە جەكە ينۆەستيتسيانىڭ ۇلەسى – 10 ملرد تەڭگە.