ماڭعىستاۋ وبلىسىندا قۇراستىرىلعان «شاپشاڭ» اسكەري دەسانتتىق كاتەرى كاسپي تەڭىزىنە ءتۇسىرىلدى. سالتاناتتى ءىس-شاراعا ماڭعىستاۋ وبلىسىنىڭ اكىمى نۇرداۋلەت قيلىباي, قورعانىس ءمينيسترىنىڭ ورىنباسارى, گەنەرال-لەيتەنانت سۇلتان قامالەتدينوۆ, قارۋلى كۇشتەردىڭ كونتر-ادميرالى راتمير كامراتوۆ, اسكەري قىزمەتشىلەر مەن قالا تۇرعىندارى قاتىستى.
جاڭا كاتەر تەڭىزدەگى مەملەكەت شەكاراسىن, ەلدىڭ بىرتۇتاستىعىن قورعاۋعا قىزمەت ەتەدى. قورعانىس ءمينيسترىنىڭ ورىنباسارى جاۋىنگەرلەر كاتەرى ءوڭىردىڭ تەڭىز الەۋەتىنىڭ قارقىندى دامىپ جاتقانىن اڭعارتاتىنىن ءمالىم ەتتى.
– پرەزيدەنت جولداۋىندا ايتىلعانداي, جاھاندىق اسكەري تەحنيكا ءوندىرىسى دامىعان مەملەكەتتەردىڭ ۇلتتىق قورعانىس جۇيەسىندە شەشۋشى ءرول وينايدى. قازىرگى زامان – جاڭا تەحنولوگيا زامانى. بۇل كاتەر – وتانىمىزدىڭ ينجەنەريا سالاسىنىڭ جوعارى دەڭگەيىنىڭ ايقىن دالەلى, – دەدى س.قامالەتدينوۆ.
ءوڭىر باسشىسى نۇرداۋلەت قيلىباي تاريحي وقيعانىڭ عالىمداردىڭ توككەن تەرى مەن ەڭبەگىنىڭ ناتيجەسى ەكەنىن ايتتى.
– مەملەكەت باسشىسى قاسىم-جومارت توقاەۆ قازاق قۇرىلىس يندۋسترياسىن دامىتۋ, تەرەڭدەتۋ قاجەت دەپ باعىت-باعدار بەرگەن ەدى. مىنە, ناتيجەسىن, جەمىسىن كورىپ وتىرمىز. وڭىرىمىزدە جاسالعان وتاندىق ءونىم ەل تىنىشتىعىن كۇزەتىپ, تەڭىز اسكەرلەرىنىڭ ناتيجەلى قىزمەت ەتۋىنە كومەكتەسەدى. وسى جوبانى جۇزەگە اسىرعان ازاماتتارعا, ماماندارعا, قۇرىلىسشىلارعا كوپ راحمەت ايتامىن. ازاماتتار وزدەرىنىڭ شەبەرلىكتەرىن دالەلدەدى, – دەدى وبلىس اكىمى.
جاڭا كاتەردى قۇراستىرعان «كەمە جابدىقتارى جانە سەرۆيس» جشس-نىڭ ديرەكتورى دميتري دونسكويدىڭ ايتۋىنشا, سەرىكتەستىكتىڭ تەك قورعانىس سالاسىندا ەمەس, ازاماتتارعا ارنالعان, تۋريزم, ترانسپورت باعىتىندا, توتەنشە جاعدايلار كەزىندە قولدانىلاتىن تەحنيكالاردى دا جاساۋعا مۇمكىندىكتەرى بار.
ماڭعىستاۋ وبلىسى