رەسپۋبليكا كۇنىنە وراي ەلوردادا «سالتانات» مەملەكەتتىك بي ءانسامبلىنىڭ «كۇن ديدارلى قازاقستان» اتتى كونتسەرتى جوعارى دارەجەدە انشلاگپەن ءوتتى. قاليبەك قۋانىشباەۆ اتىنداعى قازاق ۇلتتىق مۋزىكالىق دراما تەاترىندا ۇيىمداستىرىلعان كەشتىڭ شىمىلدىعى تالعات احمەتوۆتىڭ «سامعاۋ» بي قويىلىمىمەن اشىلىپ, پرەمەراسى كورەرمەن نازارىنا ۇسىنىلدى, دەپ حابارلايدى Egemen.kz.
كورەرمەندەر بۇل كونتسەرتتەن رەپەرتۋارعا جاڭادان ەنگەن بيلەردى, قازاقتىڭ ۇلتتىق جانە الەم حالىقتارىنىڭ بي قويىلىمدارىن, سونىڭ ىشىندە ازيا حالىقتارىنىڭ بيلەرىن تاماشالادى. انسامبل «موڭعول ءبيى», «ۆەنزەليا», وزبەك ءبيى «حورەزم تەرمالارى», «كوڭىلدى سەرۋەن», «جاستىق جالىن», تاجىك ءبيى «يدونا», ۇيعىر ءبيى «دولان», كورەي ءبيى «كالچۋم», تاتار ءبيى «جەنيحي», قىتاي ءبيى «Liming», «جارىق», «ەل سالتاناتى», «قىز قۋ» سىندى ەرەكشە بي قويىلىمدارىن ۇسىندى. سونىمەن قاتار كونتسەرتتە حالىقارالىق جانە رەسپۋبليكالىق بايقاۋلاردىڭ لاۋرەاتتارى ءبىرجان ايتاحمەت, اسىلحان شالقاروۆ اننەن شاشۋ شاشتى. تاۋەلسىزدىكتىڭ تال بەسىگىندە تەربەلىپ, قىران قۇسى قالىقتاعان كوك اسپانىمىزدىڭ استىندا «مادەنيەت سالاسىنىڭ ۇزدىگى» راحات سارسەنوۆ دومبىرانىڭ ءۇنىن كوككە اۋەلەتسە, اسپاپتى جانىنا سەرىك ەتكەن ايگەرىم ەلەمەسوۆا ءوز ونەرىن پاش ەتتى.
جاڭا باعدارلامادا الەم حالىقتارىنىڭ بيلەرى جانە قازاقتىڭ ۇلتتىق بيلەرى ۇسىنىلدى. كەشكە رەسپۋبليكالىق جانە حالىقارالىق كونكۋرستىڭ لاۋرەاتتارى ءبىرجان ايتاحمەت, اسىلجان شالقاروۆ جانە كەش جۇرگىزۋشىسى ادىلەت راحىمباي قاتىستى. كوركەمدىك جەتەكشىسى – قۋانىشبەك تولەگەن.
تاريحى تەرەڭ ۇجىمنىڭ رەسپۋبليكا كۇنىنە ارنالعان كونتسەرتىنە كەلگەن استانا قالاسىنىڭ تۇرعىندارى مەن قوناقتارى شەكسىز قوشەمەت كورسەتىپ, جىلى لەبىزدەرىن ءبىلدىردى. ساحنادا تالانتتى ونەر ۇجىمىنا مادەنيەت جانە اقپارات مينيسترلىگىنىڭ جانە «گۇلدەر» ءانسامبلىنىڭ اتىنان ىقىلاس گ ۇلى تابىستالدى.
قازاق ونەرىندە ساف ونەرىمەن تانىلىپ, الەمگە ۇلتتىق ءبيدى ناسيحاتتاپ جۇرگەن «سالتانات» مەملەكەتتىك بي ءانسامبلى كەلەر جىلى 70 جىلدىق مەرەيتويىن اتاپ وتپەك. وسى ۋاقىت ىشىندە قانشاما دارىندى جاس, ونەر تارلاندارى ءانسامبلدىڭ اياعىنان تىك تۇرىپ, قالىپتاسۋىنا ەڭبەك ءسىڭىردى. قازىرگى تاڭدا جاس بۋىن وكىلدەرى دە سول سارا جولدى ءارى قاراي جالعاپ, قازاق ونەرىنىڭ كوكجيەگىن كەڭەيتۋگە اتسالىسىپ ءجۇر.
«ونەرىن ءسۇيىپ, ونەرپازىن باعالاعان بارشا پاتشا كوڭىل كورەرمەندەرگە جانە كونتسەرتىمىزدى ۇيىمداستىرۋعا قولداۋ بىلدىرگەن, قر-نىڭ مادەنيەت جانە اقپارات مينيسترلىگىنە, قاليبەك قۋانىشباەۆ اتىنداعى قازاق ۇلتتىق مۋزىكالىق دراما تەاترىنا العىس بىلدىرەمىز, الداعى ۋاقىتتا دا پاتشا كوڭىلدى, تالعامى بيىك كورەرمەندەرىمىزدى جاڭا شىعارمالارمەن, اسەم بيلەرمەن, اۋەزدى اۋەن, تاڭداۋلى مۋزىكامەن تاڭعالدىرا بەرەمىز», دەيدى «سالتانات» مەملەكەتتىك بي ءانسامبلىنىڭ ديرەكتورى ەلۋباي كەنجاليەۆ.
ەلۋباي مۇحامبەت ۇلىنىڭ ايتۋىنشا, «سالتانات» مەملەكەتتىك بي ءانسامبلى قازاقتىڭ ءتول ونەرى مەن ۇلتتىق مادەنيەتىن ساقتاپ, حالىقتىڭ رۋحاني بايلىعىن دامىتىپ, وسكەلەڭ ۇرپاققا عاجايىپ بي ونەرى ارقىلى ەستەتيكالىق تاربيە بەرىپ, جاستاردىن ۇلتتىق سانا سەزىمىن قالىپتاستىرۋ جولىندا ايانباي ونەر كورسەتىپ كەلەدى. قازاق ءبيىن جاڭا تاقىرىپتارمەن, بەينەلەرمەن بايىتىپ, شەڭبەرىن كەڭەيتتى, ءارى قازىرگى ۇلتتىق ساحنالىق ءبيدىڭ نەگىزدەرىن دامىتتى. بۇگىنگى تاڭدا «سالتانات» مەملەكەتتىك بي ءانسامبلى ۇلتتىق حورەوگرافيا مادەنيەتىنىڭ باي مۇراسىن جانە الەمدىك حورەوگرافيانىڭ الۋان تۇرلىگىن تولىق ناسيحاتتاي الاتىن جالعىز كاسىبي بي ۇجىمى بولىپ وتىر.
اتى اڭىزعا اينالعان ءانسامبلدىڭ 70 جىلعا جۋىق عۇمىرىندا ۇجىم قۇرامىندا سان مىڭداعان كاسىبي بىلىكتى بالەت ارتيستەرىنىڭ ۇلكەن شوعىرى ەڭبەك ەتىپ, كوپتەگەن جاس ارتيستەر ءوز شەبەرلىكتەرىن شىڭدادى. گاسترولدىك ساپارمەن تۇركيا, رەسەي, بەلگيا, وڭتۇستىك كورەيا, اقش, فرانتسيا ەلدەرىنە بارىپ, قازاق حالقىنىڭ ۇلتتىق ونەرىن, ءداستۇرىن, حالىق ءبيى مەن الەم حالىقتارىنىڭ بيلەرىن پاش ەتتى. ۇستىمىزدەگى جىل انسامبل ءۇشىن جەمىستى بولدى. 23 قىركۇيەك كۇنى رەسەي ەلىنىڭ مادەني استاناسى سانكت-پەتەربۋرگ قالاسىندا «بالتيسكي دوم» تەاتر-فەستيۆالىنىڭ ساحناسىندا ءتۇرلى ۇلت اراسىنداعى دوستىق, بىرلىك پەن تاتۋلىقتى ناسيحاتتايتىن كونتسەرتىمىز جوعارى دەڭگەيدە ءوتتى. الپىسقا جۋىق ونەر شەبەرلەرى مەن بالەت ارتيستەرى قاتىستى.
گۇلشات ساپارقىزى