جاقىندا ەلورداداعى قازاقتىڭ اقيىق اقىنى تولەگەن ايبەرگەنوۆ اتىنداعى مەكتەپ 45 جىلدىعىن سالتاناتتى تۇردە اتاپ ءوتتى. «مەكتەبىم – شامشىراعىم» دەپ اتالعان ءىس-شاراعا ۇستازدار, زيالى قاۋىم وكىلدەرى, وقۋشىلار جانە اقىننىڭ قىزدارى ماحاببات پەن اينار ايبەرگەنوۆالار قاتىستى.
2681 بالا وقيتىن ارالاس تىلدە ءبىلىم بەرەتىن ورتا مەكتەپ 1979 جىلى 31 تامىزدا اشىلعان. مەكتەپتىڭ اشىلۋىنا سول كەزدەگى رەسپۋبليكا باسشىسى, اسا كورنەكتى مەملەكەت جانە قوعام قايراتكەرى دىنمۇحامەد قوناەۆ قاتىسقان. پەداگوگيكالىق ۇجىمنىڭ ءوتىنىشى نەگىزىندە استانا قالاسى اكىمدىگىنىڭ قاۋلىسىمەن 2001 جىلى №16 ورتا مەكتەپكە تولەگەن ايبەرگەنوۆتىڭ اتى بەرىلىپ, اقىننىڭ مەموريالدىق مۋزەيى اشىلدى. وقۋشىلارعا ساپالى ءبىلىم بەرىپ جۇرگەن مۇعالىمدەردىڭ كوپشىلىگى – تاجىريبەلى ماماندار, اتتەستاتتاۋدان وتكەن پەداگوگتەر. مەكتەپ ديرەكتورى – ساۋلە ءازىمحانوۆا. بىلىكتى باسشىنىڭ ىسكەرلىگى ارقاسىندا ءبىلىم مەكەمەسى جاڭارىپ, جاڭعىرۋ ۇستىندە ەكەنىن بايقادىق.
اقىن مۋزەيى 2007 جىلدان باستاپ جۇمىس ىستەيدى. ونى اشۋعا مەكتەپتىڭ تاربيە ءىسى جونىندەگى ورىنباسارى اقبوتا ەساماتوۆا كوپ ەڭبەك ءسىڭىردى. سونداي-اق پوەزيا جاناشىرى, مادەنيەت قايراتكەرى وسپان سۇلەيمەن ۇلى دا زور ۇلەس قوستى. 2018 جىلى ەلوردادا وتكەن مەكتەپ مۋزەيلەرى اراسىنداعى بايقاۋدا ت.ايبەرگەنوۆكە ارنالعان مەكتەپ مۋزەيى باس جۇلدەنى جەڭىپ العان.
«اقىن شىعارماشىلىعىن ناسيحاتتاۋ بارىسىندا كوپتەگەن ءىس-شارا وتكىزدىك. ماسەلەن, اقىننىڭ مەرەيتويى كەزىندە كونفەرەنتسيا ۇيىمداستىرىپ, ول جايىندا جازىلعان ەسسەلەر بايقاۋىنىڭ جيناعىن شىعاردىق. سونداي-اق ت.ايبەرگەنوۆكە ارنالعان جىر كەشى مەن تاربيە ساعاتىن تۇراقتى وتكىزىپ وتىرامىز», دەدى مۋزەي جەتەكشىسى گاۋحار ءجۇسىپوۆا.
مۋزەيدە اقىننىڭ وتباسى بەرگەن قۇندى جادىگەرلەر – قول ساعاتى مەن قولدانعان ىدىس-اياقتارى جانە ءوزى تۇتىنعان قۇرالدارى قويىلعان. ەكسپوناتتار وتە تالعاممەن جاساقتالعان. ءبىرىنشى قاتاردا ءوزى ومىردە ايرىقشا قۇرمەتتەگەن, ەرەكشە تاعدىر يەسى جىبەك انا مەن اقتوبەگە ارنالعان ستەند ورنالاسقان. ودان كەيىن تۋىپ-وسكەن جەرى قاراقالپاق ەلىنىڭ قوڭىرات اۋدانى مەن اپالارىنىڭ فوتولارى, ولارعا ارنالعان «اپالارىم» ولەڭى تۇر.
تولەگەننىڭ پوەزياسى تۋرالى جازۋشى ءابىش كەكىلباەۆ: «تولەگەن ايبەرگەنوۆ شىعارماشىلىعى – ءولىمدى جەڭىپ شىققان ءومىر شاتتىعىنىڭ جىرى», دەپ باعا بەرگەن. جيىرمادان ەندى عانا اسقان شاعىندا قازاق پوەزياسىنىڭ تورىندە جارق ەتە قالعان اقىندى ادەبي ورتا بىردەن مويىندادى. ءابدىلدا تاجىباەۆ اقىننىڭ ولەڭدەرىنە العاش العىسوز جازىپ, ءباسپاسوز بەتىنە جاريالايدى. قازىر تولەگەن ايبەرگەنوۆ اتىنداعى ادەبي سىيلىق بار. اقىننىڭ «ساعىنباي بارساڭ تاۋلار دا سەنىڭ, الدىڭنان شىقپاس اسقاقتاپ» دەگەن ولەڭ جولدارى ومىرگە وزگەشە قىرىنان قاراۋعا ۇيرەتەدى.
سالتاناتتى ءىس-شارا كەزىندە كەش قوناقتارى تولەگەن ايبەرگەنوۆتىڭ مۋزەيىنە ساياحات جاساپ, مەكتەپ دالىزىندە قويىلعان «STEM – بارلىعى ءۇشىن» يننوۆاتسيالىق جوبالار كورمەسىمەن تانىستى. شىعارماشىل بالالاردىڭ جەل ديىرمەنى, سۋقويماسىنا ارنالعان جوبالارى وتە قىزعىلىقتى, اسەرلى بولدى. بولاشاقتا عىلىمعا جاڭالىق اكەلەتىن عالىمدار شىعارىنا شىن كوڭىلىمىزبەن سەندىك, سەندىك تە, وقۋشىلاردىڭ قىزىقتى جوبالارىمەن ەتەنە تانىستىق. قاتىسۋشىلار قىزدارعا ارنالعان زاماناۋي جابدىقتالعان تەحنولوگيا كابينەتىنىڭ اشىلۋ راسىمىندە بولىپ, مەكتەپتەگى ءانشى, مەگاجۇلدىز ديماش قۇدايبەرگەننىڭ ەسىمى بەرىلگەن مۋزىكا كابينەتىنىڭ اشىلۋ سالتاناتىنا قاتىستى. ديماشتىڭ اجەسى ميۋا نيزامۋتدينوۆا, اناسى سۆەتلانا ايتباەۆا, استاناداعى مۋزىكالىق جاس كورەرمەندەر تەاترىنىڭ ديرەكتورى اسحات ماەميروۆ, تاعى باسقا ونەر مايتالماندارى قاتىسىپ, ۇلكەندەر شاشۋ شاشىپ, ونەر قايراتكەرلەرى ىزگى تىلەكتەرىن ءبىلدىردى. اقىننىڭ قىزدارى ماحاببات پەن اينار ايبەرگەنوۆالار تولعانا تىلەك ايتىپ, اينار تولەگەنقىزى اقىن ولەڭىن تەبىرەنە وقىپ بەردى. ەلوردالىق مۋزىكالىق جاس كورەرمەن تەاترىنىڭ اكتەرلەرى اقىن ولەڭدەرىن مانەرلەپ وقىپ, ءانىن شىرقادى.
گۇلشات ساپارقىزى,
جۋرناليست