ەلىمىزدە شەتەلدىك بانكتەردى اشۋ جونىندەگى تالاپتاردى ىرىقتاندىرۋعا باعىتتالعان تۇزەتۋلەردى ەنگىزۋ جوسپارلانىپ وتىر. ياعني شەتەلدىك بانكتى اشۋعا رۇقسات الۋعا قاجەتتى قۇجاتتار تىزبەسى قىسقارتىلماق. قۇجاتتار سانى شەتەلدىك باس كومپانيانىڭ رەيتينگىنە بايلانىستى بولادى.
مىسالى, شەتەلدىك بانكتىڭ رەيتينگى «BB-»-تەن «ا-»-كە دەيىن بولسا, ەنشىلەس بانكتى اشۋعا ارنالعان قۇجاتتار سانى 24-تەن 17-گە دەيىن, فيليال اشقىسى كەلەتىندەرگە 20 قۇجاتتان 10 قۇجاتقا دەيىن قىسقارتىلادى. رەيتينگى «ا-»-تەن باستاپ جانە ودان جوعارى رەيتينگى بار بانكتەردەن تالاپ ەتۋ تيىسىنشە 10 قۇجاتتان 8 قۇجاتقا دەيىن قىسقارتىلادى.
سونىمەن بىرگە شەتەلدىك ينۆەستورلاردىڭ اۋقىمدى سانىن تارتۋ ماقساتىندا زاڭ جوباسىندا فيليالدار قۇرۋ كەزىندە شەتەلدىك بانكتىڭ اكتيۆتەرىنە قويىلاتىن تالاپتار 20 ملرد دوللاردان 10 ملرد دوللارعا دەيىن تومەندەتىلەدى.
قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆانىڭ ايتۋىنشا, شەتەلدىك بانك فيليالدارىنا رۇقسات ەتىلگەن قىزمەت تۇرلەرى دە كەڭەيتىلمەك. فيليالداردىڭ قىزمەت تۇرلەرى شەتەل ۆاليۋتاسىمەن ايىرباستاۋ وپەراتسيالارىن, كاستودياندىق قىزمەتتى, ترانسفەر-اگەنت قىزمەتىن جۇزەگە اسىرۋ, سينديكاتتالعان قارجىلاندىرۋعا قاتىسۋ, تولەم كارتوچكالارىن شىعارۋ سياقتى وپەراتسيالارمەن تولىقتىرىلادى.
«ەكىنشى كەزەڭدە شەتەلدىك بانكتىڭ بانكتىك ليتسەنزيا الۋعا ارنالعان قۇجاتتار تىزبەسى دە 50 قۇجاتتان 7 قۇجاتقا دەيىن قىسقارتىلادى. كوبىنە بۇل قۇجاتتار ىشكى نورماتيۆتىك قۇجاتتارعا جاتادى. ولاردى بەكىتۋ جونىندەگى تالاپتار ليتسەنزيا العاننان كەيىنگى كەزەڭگە اۋىستىرىلادى», دەپ ءتۇسىندىردى م.ابىلقاسىموۆا.
زاڭ جوباسى شەڭبەرىندە اگەنتتىك بانكتىڭ ديرەكتورلار كەڭەسىنىڭ مۇشەلەرىنە باسشىلىق ءوتىلدىڭ بولۋى جونىندەگى تالاپتى الىپ تاستاۋدى, سونداي-اق باسشى لاۋازىمىنان ۇمىتتىلەرگە ميكروقارجى ۇيىمدارىنداعى جۇمىس تاجىريبەسىن ەسكەرۋدى ۇسىنادى.