جۇمىس تابۋعا سەپتەسەتىن پلاتفورما

ۇلتتىق ستاتيستيكا بيۋروسى بيىل ءساۋىر ايىنداعى ەسەبىندە ەڭبەك جانە حالىقتى الەۋمەتتىك قورعاۋ مي­نيستر­لىگىنىڭ جۇمىسپەن قامتۋ ورگان­دارىنا 315,6 مىڭ وتانداسىمىز جۇمىسسىز رەتىندە رەسمي تىركەلگەنىن مالىمدەدى. ال جالپى ەڭبەك ەتۋگە ق ۇلىقسىز ازاماتتار قاتارى 450 مىڭعا جەتكەنىن جازدى. كورسەتكىشتى ايماقتارعا جىكتەسەك, كوش باسىندا الماتى, تۇركىستان, ماڭعىستاۋ وبلىسى مەن استانا قالاسى تۇر. تۇيتكىلدى ماسە­لەنىڭ ۋشىعۋىنا اسەر ەتۋشى نەگىزگى فاك­تور قاتارىندا ونەركاسىپتىڭ اركەلكى دامۋى, اۋىلدىق جەرلەر­دەگى جۇمىس ورىن­­دارىنىڭ تاپشى­لىعى, ۋربانيزاتسيا بار.

ايتسە دە, مەملەكەت ەل ەكونو­مي­كاسىنىڭ اياعىنا تۇساۋ بولىپ وتىر­عان وتكىر ماسەلەنى جۇيەلى شەشۋگە كىرىسكەن. ونىڭ ءبىرى – «Joltap» الەۋمەتتىك جوباسى. استانادا بۇل باستاما جاڭا ماماندىقتاردى تەگىن يگەرىپ, ءوز ءىسىن اشۋعا, تۇراقتى جۇمىس تابۋعا, ­52 مەملەكەتتىك قولداۋ شارالارى بو­يىنشا كەڭەس الۋعا مۇمكىندىك بەرەدى.

يگى جوبا اياسىندا ەڭبەككە ارا­لاسقان ايبات مۇتالوۆ العا­شىندا مامانداردان «بارشاعا مۇمكىندىك» مودۋلدىك پۋنكتىندە كەڭەس العانىن ايتتى. كەيىن ءوزىنىڭ «دانەكەرلەۋ» ماماندىعىن جەتىلدىرىپ, جىل باسىندا جەكە كاسىبىن باستاعان.

– كەڭسەدە ماعان گازبەن دانە­كەرلەۋشى كۋرسىنىڭ وقۋ ۇدەرىسى ءتۇسىن­دىرىلدى. وقىتۋ وفلاين فور­ماتتا ەكى اپتاعا سوزىلدى. جۇمىس كۇندەرى ەكى ساعاتتان تەك تەوريانى عانا ەمەس, سونىمەن قاتار تاجىريبە دە ۇيرەندىك. ءىس جۇزىندە بىزگە ءاردايىم كەڭەس سۇراي الاتىن تالىمگەر بەرىلدى. ولار ساباقتا قوسىلىستىڭ قالاي دانەكەرلەنەتىنىن, وتتىقتى قانداي بۇرىش­پەن, قانداي جىلدام­دىقپەن جۇرگىزۋ كەرەك­تىگىن كورسەتتى. ناتيجەسىندە, ما­مان­­دان­دىرىلعان وقۋدان ءوتىپ, جەكە كاسىپتى دامىتۋعا كۇش سالدىم. بيزنەستى اشپاس بۇرىن ىشتەي قاتتى ۋايىمدادىم. باستاپقىدا كاسىپورىننان ءورت ءسوندىرۋ گيدرانتتارى مەن بولات تىستەرگە ستەندتەر جاساۋ قىزمەتتەرىن الدىق. ءوز ءىسىڭدى جۇرگىزۋدە تاجىريبەڭ بولماسا قيىن ەكەن. ماسەلەن, كەي قىزمەتكەر كۇتپەگەن جەردەن جۇمىستان كەتىپ, ولاردى الماستىراتىن مامان تاپپاي توسىلدىم. بىراق ماسەلە وڭتايلى شەشىلدى. بولاشاقتا جوبا اياسىندا SMM, ەسەپشى كۋرستارىن دا مەڭگەرۋدى جوسپارلاپ وتىرمىن, – دەدى جاس كاسىپكەر.

قازىر استانا قالاسىندا جۇ­مىس­سىزدىق دەڭگەيى 4,5%-دى قۇراپ وتىر. سوندىقتان بۇل جوباعا 18-50 جاس ارالىعىنداعى كەز كەلگەن ەلوردالىق تۇر­عىن قاتىسا الادى. بۇگىندە 21 مىڭ ازا­مات مەملەكەتتىك قولداۋ شاراسى مەن قالانىڭ وزەكتى جۇمىس ورىندارى تۋرا­لى كەڭەس الىپ, 16 جۇمىسشى جانە تسيفر­لىق داعدى جونىنەن قىسقامەرزىمدى وقۋدان وتكەن.

جاۋاپتىلار الەۋمەتتىك باستامانى ودان ءارى جەتىلدىرىپ, ارنايى «Jumystap.kz» پلاتفورماسىن جاساقتادى. باستاما العاش تامىز ايىندا استانا قالاسىنىڭ اكىمى جەڭىس قاسىمبەكتىڭ «Joltap» تۇلەك­تەرىمەن كەزدەسۋىندە ىسكە قوسىلدى.

– سايتقا تەك استانا قالاسىنىڭ ازاماتتارى مەن بيزنەس وكىلدەرى عانا ەمەس, ءتىپتى الماتى, تەمىر­تاۋ, سەمەي سياقتى ايماقتاردان جۇمىس بەرۋشىلەر دە قوسىلىپ جاتىر. پلاتفورماعا تەلەفون ءنومىرىن جازۋ ارقىلى عانا تىر­كەلۋگە بولادى. قازىرگى ۋاقىتتا سايتتا 7 مىڭ ادام تىركەلگەن. ياعني ءاربىر ءتورتىنشى ادام تىركەلۋدەن وتەدى دەگەن ءسوز. بۇل – وتاندىق ستارتاپ ءۇشىن وتە جاقسى ناتيجە. وسىنشا قولدانۋشىنىڭ ىشىندە 1 مىڭى كاسىپورىن بولسا, 6 مىڭى – جۇمىس ىزدەۋشى. جۇمىس بەرۋ­شىلەردىڭ ىشىندە ءىرى ءارى جەلىلىك كاسىپورىندار دا بار. سايتتا جۇمىس بويىنشا 1 100 حابارلاما جاريالاندى. الايدا بۇل – وسىنشاما جۇمىس ورنى بار دەگەن ءسوز ەمەس. كەي كەزدە ءبىر حابارلامانىڭ ارتىندا 20, ءتىپتى 200 ادامعا تاپشىلىق تۇرادى. ياعني بوس جۇمىس ورنى سانى – وسى 1 100 حابارلامادان كوپ دەگەن ءسوز. قوعامدىق تاماقتانۋ, قىزمەت كورسەتۋ, ساۋ­دا سالا­لارىندا قىزمەتكەر تاپشىلىعى بار. وندا جۇمىس بەرۋشىلەر كەمىندە 200-دەن اسا حابارلاما قالدىرعان, – دەدى «Joltap» جوباسىنىڭ ساراپتاما ءبولىمىنىڭ مەنەدجەرى ەراسىل ءدىلدايم.

ونىڭ ايتۋىنشا, كوبىنە قول­دانۋ­شىلار كەڭسەدەگى جۇمىسقا, تسيفر­لىق تاپسىرمالار مەن ساۋ­دا سالا­لارىنا قىزىعۋشىلىق بىل­دىرەدى ەكەن.

– وتانداستارىمىز ساتۋشى-كاسسير, باريستا, گرافيكالىق ديزاين, ساتۋ مەنەدجەرى, تارگەتولوگ, تىگىنشى, سمم, ەسەپشى, جۇرگىزۋشى, مەرچەندايزەر, كۇزەت­شى, جۇك تاسىمالداۋشى سياقتى ماماندىقتارعا ۇندەۋ قال­دى­رىپ ءجۇر. سايتتىڭ نەگىزگى ماق­ساتى – جۇمىس بەرۋشىلەر مەن ۇمىت­كەرلەردى ءبىر-بىرىمەن تەز ارادا بايلانىستىرۋ. وسىنىڭ ءبارى ادامداردىڭ ىڭعايلىعى ءۇشىن Whatsapp مەسسەندجەرى ارقىلى جۇزەگە اسىرىلادى, – دەدى ول.

سەرۆيستىك پلاتفورما ەلىمىز­دىڭ بارلىق ازاماتىنا تەگىن تۇردە قولجەتىمدى. نەگىزگى قول­دانۋ­شىلار قاتارىندا تۇراقتى جۇمىس ىزدەۋشى مەن ۇيدەن جۇمىس ىستەۋدى قالايتىن ازاماتتار بار. بۇعان قوسا ۋاقىتشا تاپسىرىس ورىنداۋشىنى ىزدەيتىن كاسىپكەرلەر دە كەزدەسەتىن كورىنەدى.

– بۇل پلاتفورمانىڭ باسقا دا جۇمىس ىزدەۋگە مۇمكىندىك بەرەتىن سايت­تاردان ايىرماشىلىعى بار. بىرىنشىدەن, 6 مىڭ جۇمىس ىزدەۋشىنىڭ جارتىسى – «Joltap» جوباسىنىڭ تۇلەكتەرى. ياعني جۇمىسقا دايىن 3 مىڭ ۇمىتكەر بار دەگەن ءسوز. ەكىنشىدەن, تەك تۇراقتى جۇمىستان بولەك, كىشىگىرىم تاپسىرىستى ورىندايتىن مامان يەلەرىن تابۋعا بولادى. ايتپاقشى, تاپسىرىس اۋماعى شەكتەلمەگەن. باسقا ەلدەن تاپسىرىستار دا قابىلدانادى. ۇشىنشىدەن, ءسىز جۇمىستى نەمەسە قىزمەتكەردى دەلدالسىز جانە تولەمسىز تابا الاسىز. مەملەكەت باسشىسى قاسىم-جومارت توقاەۆ قازاقستان حالقىنا ارناعان جولداۋىندا 2025 جىلدى «جۇمىس­شى ماماندىقتارى جىلى» دەپ جاريالادى. وسىعان بايلانىستى «Jumystap.kz» سايتى حالىق اراسىندا جۇمىسشى ماماندىقتارىن ىلگەرىلەتۋگە, ەڭبەك قۇندىلىقتارىن كەڭىنەن ناسيحاتتاۋعا, جۇمىسسىزدىق دەڭ­گەيىن ازايتۋعا ءوز ۇلەسىن قوسادى ­دەگەن سەنىمدەمىز, – دەدى ە.ءدىلدايم.

جاڭادان قۇرىلعان سايتتا كۇن سايىن­ قولدانۋشىلار پىكىرى ەسكەرىلىپ, ونىڭ جۇمىسى تسيفر­لىق تەحنولوگيالار ەسەبىنەن جەتىلدىرىلىپ كەلەدى. ەگەر كەيبىر جۇمىس ىزدەۋگە مۇمكىندىك بەرەتىن پلاتفورمالاردا الاياقتار كەزىگە­تىن بولسا, بۇل سايتتا مۇنداي حابار­لا­مالارعا جول بەرىلمەيدى. مۇنى جاۋاپ­تىلار ءجىتى قاداعالاپ وتىرادى.