سترەستىك اكتيۆتەر ەلەكتروندى الاڭدا ساتىلادى

قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسى­موۆانىڭ ايتۋىنشا, بۇل – پروبلەمالىق اكتيۆتەردى ەكونوميكاعا قايتارۋعا ىقپال ەتەتىن, ينۆەستورلار اراسىندا سەنىمنىڭ ءوسۋىن ىنتالاندىراتىن ماڭىزدى قادام.

«مەملەكەت باسشىسىنىڭ تاپسىرماسىن ىسكە اسىرۋ ءۇشىن بيىل ماۋسىمدا اككرەديتتەلگەن تسيفرلىق پلاتفورمالار ارقىلى عانا سترەستىك اكتيۆتەردى ساتۋدى كوزدەيتىن زاڭ قابىلداندى. زاڭدى ىسكە اسىرۋ ءۇشىن اگەنتتىك تسيفرلىق پلاتفورمالاردىڭ قىزمەتىنە رۇقسات بەرۋ ءتارتىبىن, وسى پلاتفورمالاردا ساۋدا-ساتتىق وتكىزۋ قاعيدالارىن, سونداي-اق اقپاراتتىق جانە كيبەرقاۋىپسىزدىك ستاندارتتارىن رەگلامەنتتەيتىن نورماتيۆتىك-قۇقىقتىق اكتىلەردى قابىلدادى», دەدى ءمادينا ابىلقاسىموۆا.

ونىڭ سوزىنشە, سترەستىك اكتيۆتەر ساۋداسىن تسيفرلاندىرۋ نارىقتىڭ اشىقتىعىن قامتاماسىز ەتەتىن, ينۆەستورلاردى كوبىرەك تارتاتىن, بانك سەكتورىن سترەستىك اكتيۆتەردەن تازارتۋدى ىنتالاندىراتىن ماڭىزدى نارىقتىق تەتىككە اينالادى. DMAS – سترەستىك اكتيۆتەرمەن ساۋدا جاساۋ ۇدەرىسىن جەڭىلدەتەتىن جانە جەدەلدەتەتىن زاماناۋي تسيفرلىق پلاتفورما. جۇيە كرەديتتەر مەن وندىرىلگەن م ۇلىكتى قوسا العاندا, اكتيۆتەر­دىڭ كەڭ اۋقىمىنا قول جەتكىزۋدى قامتاماسىز ەتەدى.

ساۋدا-ساتتىقتى اۆتوماتتاندىرۋ ۇدەرىستى اشىق ءارى ءادىل ەتەدى, ال اگەنتتىك بەكىتكەن قاعيدالار بارلىق قاتىسۋشىنىڭ مۇددەسىن قورعاۋدى قامتاماسىز ەتپەك. مامىلەلەر ونلاين رەجىمدە رەسىمدەلەدى, بۇل وپەراتسيالاردىڭ ىڭعايلىلىعى مەن بولجامدىلىعىن ارتتىرادى.

ايتا كەتەيىك, 2017 جىلدان باستاپ قابىلدانعان شارالار ناتيجەسىندە بانك سەكتورىنداعى سترەستىك اكتيۆتەر 2024 جىلعى شىلدەگە قاراي 7,7 ترلن تەڭگەدەن 3,2 ترلن تەڭگەگە دەيىن تومەندەدى. بۇل رەتتە تولەم مەرزىمى 90 كۇننەن اسا كەشىكتىرىلگەن كرەديتتەر دەڭگەيى ەڭ تومەنگى مانگە جەتىپ, شامامەن 1 ترلن تەڭگەنى قۇرادى.

اگەنتتىك توراعاسى قارجى رەتتەۋشىسى بانكتەردى پروبلەمالىق كرەديتتەردەن ارىلۋعا ىنتالاندىرۋ بويىنشا جوسپارلى جۇمىس جۇرگىزگەنىن اتاپ ءوتتى.