بۇگىننەن باستاپ ەلىمىزدە نە وزگەرەدى

اەس بويىنشا رەفەرەندۋم

6 قازان كۇنى قازاقستاندا رەسپۋبليكالىق رەفەرەندۋم وتەدى. رەفەرەندۋمدا ەل ازاماتتارى اەس سالۋ ماسەلەسى بويىنشا شەشىم قابىلدايدى. قاي سايلاۋ ۋچاسكەسىندە داۋىس بەرەتىنىڭىزدى referendum.gov.kz سايتىنان بىلە الاسىز.

مەديتسينا قىزمەتكەرلەرىنىڭ جاۋاپكەرشىلىگىن ساقتاندىرۋ

قازان ايىنان باستاپ ەلىمىزدە دارىگەرلەردىڭ كاسىبي جاۋاپكەرشىلىگىن ساقتاندىرۋ باستالادى. دەنساۋلىق ساقتاۋ ءمينيسترى 24 شىلدە كۇنى ءتيىستى بۇيرىققا قول قويدى. جاڭا ەرەجەگە سايكەس, دەنساۋلىق ساقتاۋ سۋبەكتىلەرى مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ شارتىن جاسايدى.

كوللەكتورلاردىڭ جۇمىسى وزگەرەدى

1 قازاننان باستاپ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تولەمدەردى ازايتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ىسكە اسىرۋ شەڭبەرىندە ازىرلەنگەن كوللەكتورلىق اگەنتتىكتەردىڭ جەكە تۇلعالاردىڭ بەرەشەگىن رەتتەۋ قاعيدالارى كۇشىنە ەنەدى.

جەدەل جاردەم قىزمەتىنە قاتىستى بۇيرىق جوباسىن تالقىلاۋ اياقتالادى

قازاقستان ازاماتتارى 8 قازانعا دەيىن دەنساۋلىق ساقتاۋ ءمينيسترىنىڭ جاڭا بۇيرىق جوباسىنا «ماقۇلدايمىن» نەمەسە «قارسىمىن» دەپ داۋىس بەرە الادى. تۇزەتۋلەرگە سايكەس, جەدەلدىكتىڭ 4-ساناتىنداعى قوڭىراۋلار تۇسكەن كەزدە, ياعني ناۋقاستىڭ ءومىرى مەن دەنساۋلىعىنا تىكەلەي قاۋىپ تونبەگەن جاعدايلاردا جەدەل جاردەم بريگاداسى جۇمىس كۇندەرى ساعات 8:00-دەن 18:00-گە دەيىن جانە سەنبى كۇنى تۇسكە دەيىن جۇمىس ىستەيدى. 

پويىز بيلەتتەرى قىمباتتايدى

1 قازاننان باستاپ ەلىمىزدە پويىز بيلەتتەرى قىمباتتايدى. اۋا باپتاعىشى جوق ۆاگونداردىڭ بيلەتتەرىنە ۇلتتىق تاسىمالداۋشى 20%-عا دەيىن جەڭىلدىكتەر ۇسىنادى. تاريفتەردىڭ كوتەرىلۋى قولدانىستاعى 140 باعىتتىڭ 62-سىنە اسەر ەتەدى. كولىك مينيسترلىگى بۇل كولىك پاركىن جاڭارتۋ, كورسەتىلەتىن قىزمەتتى جاقسارتۋ جانە قىزمەتكەرلەردىڭ جالاقىسىن كوتەرۋ ءۇشىن قاجەت ەكەنىن تۇسىندىرگەن ەدى.

جاڭا تاريف:

«تالگو» پويىزدارىنىڭ باعاسى - شامامەن 19 493 تەڭگە; ستاندارت پويىزدارداعى كۋپە قۇنى - 19 653 تەڭگەنى; پلاتسكارت – 12 871 تەڭگەگە; قالا ماڭىنا قاتىنايتىن پويىز بيلەتتەرى - 6314 تەڭگە.

بيزنەستى قولداۋ

4 قازاننان باستاپ بيزنەستى مەملەكەتتىك قولداۋعا قاتىستى جاڭا ەرەجەلەر كۇشىنە ەنەدى. «جەكە كاسىپكەرلىكتى مەملەكەتتىك قولداۋدىڭ كەيبىر شارالارى تۋرالى» ۇكىمەتتىڭ ءتيىستى قاۋلىسى 17 قىركۇيەكتە قابىلداندى. ولاردىڭ ىشىندە: كاسىپكەرلىك سۋبەكتىلەرى شىعارعان وبليگاتسيالار بويىنشا كۋپوندىق مولشەرلەمەنى سۋبسيديالاۋ ەرەجەلەرى, نەسيەلەرگە/قارجىلىق ليزينگكە كەپىلدىك بەرۋ ەرەجەلەرى, شاعىن كاسىپكەرلىك سۋبەكتىلەرىنىڭ باسەكەگە قابىلەتتىلىگىن ارتتىرۋعا باعىتتالعان «باسەكەگە قابىلەتتىلىك» ينۆەستيتسيالىق گرانتتارىن بەرۋ ەرەجەلەرى بار.

وڭىرلەردە جىلىتۋ ماۋسىمى باستالادى

شىعىس قازاقستان, پاۆلودار, اقمولا وبلىستارى مەن استانا قالاسىندا جىلۋ بەرۋ ماۋسىمى باستالىپ كەتتى. ەندى 1 قازاننان باستاپ اباي, اقتوبە جانە قاراعاندى وبلىستارىندا جىلۋ بەرىلەدى. 

جاڭا مەرەكە

2024 جىلدىڭ قازان ايىنان باستاپ ەل ازاماتتارى بىردەن ءۇش جاڭا مەرەكەنى اتاپ وتەدى. 1 قازان – جوعارى ءبىلىم قىزمەتكەرلەرى كۇنى جانە راديو كۇنى, 14 قازان – ستاندارتتاۋ قىزمەتكەرلەرىنىڭ كۇنى.

دەمالىس

ەلەكتروندىق ۇكىمەت سايتىنداعى اقپاراتقا سايكەس, 25 قازاندا قازاقستاندا رەسپۋبليكا كۇنى تويلانادى. بۇل كۇن جۇماعا سايكەس كەلەتىندىكتەن, ەل ازاماتتارى ءۇشىن قوسىمشا ءبىر كۇن دەمالىس بولماق.

بەس كۇندىك جۇمىس اپتاسى بويىنشا جۇمىس ىستەيتىن وتانداستارىمىز ءۇش كۇن قاتارىنان دەمالادى:

25 قازان, جۇما – رەسپۋبليكا كۇنى, رەسمي دەمالىس; 26 قازان, سەنبى – ادەتتەگى دەمالىس; 27 قازان, جەكسەنبى – ادەتتەگى دەمالىس.