قر پارلامەنتى سەناتىنىڭ دەپۋتاتتارى نۇرلان بەكەنوۆ پەن تالعات ءجۇنىسوۆ «اقمولا ەلەكتر جەلىلەرىن تاراتۋ كومپانياسى» اق ەسىل بولىمشەسىندە بولدى جانە «قتج» اق وبلىستىق باسقارماسىنىڭ تەمىرجولشىلارىمەن كەزدەستى. كەزدەسۋلەر بارىسىندا ەلىمىزدىڭ بولاشاعىنا اسا قاجەتتى ماسەلەنى شەشۋدە ءار داۋىستىڭ ماڭىزدىلىعى اتاپ ءوتىلدى جانە ازاماتتاردى الداعى رەفەرەندۋمعا قاتىسۋعا ۇندەدى, دەپ حابارلايدى Egemen.kz.
دەپۋتاتتار ەنەرگەتيكا تاقىرىبىنا ەرەكشە نازار اۋداردى. ولار 2030 جىلعا قاراي ەلەكتر قۋاتىنىڭ تاپشىلىعى 13 ميلليارد كيلوۆاتت-ساعاتتان اساتىنى بولجانىپ وتىرعانى جانە ونىڭ الدىن الۋدىڭ نەگىزگى شەشىمى – اتوم ەلەكتر ستانتسياسىن سالۋ ەكەنىن اتاپ ءوتتى. ولاردىڭ پىكىرىنشە, اتوم ەلەكتر ستانتسياسى ەنەرگەتيكالىق ماسەلەلەردى شەشۋمەن قاتار, ەكولوگيالىق جاعدايدى جاقسارتۋداعى ماڭىزدى قادام بولماق.
گاستەللو اۋىلى ورتا مەكتەبىنىڭ ۇستازدارى مەن اۋداندىق اۋرۋحانا قىزمەتكەرلەرىمەن كەزدەسۋدە اتوم ەلەكتر ستانساسىن سالۋدىڭ ماڭىزدىلىعى تالقىلاندى. ونىڭ قاۋىپسىزدىگى مەن قورشاعان ورتا جانە ادام دەنساۋلىعىنا تيگىزەتىن اسەرى از ەكەنى ايتىلدى. كەزدەسۋلەرگە «يادرولىق فيزيكا ينستيتۋتى» اق استانا فيليالى ديرەكتورىنىڭ ورىنباسارى دارىن بوربەكوۆ قاتىسىپ, اتوم ەنەرگياسىن پايدالانۋدىڭ تەحنيكالىق وزگەشەلىگى مەن ارتىقشىلىعىنا توقتالدى.
دەپۋتاتتار بارلىق ازاماتتى سايلاۋ ۋچاسكەلەرىنە كەلۋگە جانە ەلىمىزدىڭ بولاشاعىنا وڭ ىقپال ەتەتىن شەشىم قابىلداۋعا شاقىردى.