قر تۋريزم جانە سپورت ءمينيسترى ەربول مىرزابوسىنوۆ بۋداپەشتە وتكەن 45-ءشى دۇنيەجۇزىلىك شاحمات وليمپياداسىندا تاريحي ناتيجە كورسەتىپ, كۇمىس مەدال جەڭىپ العان شاحماتتان ەلىمىزدىڭ قىزدار قۇراماسىنىڭ جانە ءدۇبىرلى دوداعا قاتىسقان ەرلەر قۇراماسىنىڭ سپورتشىلارىن استانا اۋەجايىنان قارسى الدى, دەپ حابارلايدى Egemen.kz.
ەربول مىرزابوسىنوۆ شاحماتشىلاردى ايتۋلى جەڭىسىمەن قۇتتىقتاپ, ولاردىڭ جەتىستىگىن جوعارى باعالادى. سونداي-اق مينيستر بۇل جەڭىس قازاقستانداعى شاحماتتىڭ قارقىندى دامۋىنىڭ ايقىن كورىنىسى ەكەنىن, مەملەكەت باسشىسى ەلىمىزدە شاحماتتى دامىتۋعا ەرەكشە كوڭىل ءبولىپ وتىرعانىن جەتكىزدى.
«شاحمات وليمپياداسىندا ەكىنشى ورىن يەلەنگەن قىزدار قۇراماسىن تاريحي جەڭىسىمەن شىن جۇرەكتەن قۇتتىقتايمىن! بۇل جەڭىس قازاقستانداعى شاحماتتىڭ قارقىندى دامۋىنىڭ ايقىن كورىنىسى دەپ بىلەمىن. بۇگىنگى تاڭدا ەلىمىزدە 7 مىڭنان استام شاحمات سەكتسياسى جۇمىس ىستەيدى, ال بۇل سپورتپەن اينالىساتىنداردىڭ سانى 200 مىڭنان اسادى. قىزدار قۇراماسى شاحمات وليمپياداسىنا باستى فاۆوريتتەردىڭ ءبىرى رەتىندە قاتىستى. سوعان لايىق ونەر كورسەتتى. ولار قازاقستان شاحماتىنىڭ دەڭگەيى جوعارى, بولاشاعى جارقىن ەكەنىن بار الەمگە پاش ەتتى. وسى ورايدا شاحماتشىلاردى دايىنداعان جاتتىقتىرۋشىلارعا, قولداۋ كورسەتكەن بارشا جانكۇيەرگە, سپورتشىلاردىڭ اتا-انالارىنا العىسىمدى ايتامىن», دەدى مينيستر.
ايتا كەتەيىك, قازاقستان ايەلدەر قۇراماسى سوڭعى تۋردا اقش-پەن تەڭ ءتۇسىپ (2-2), 18 ۇپاي جينادى. ۇلتتىق قۇراما ساپىندا ەل نامىسىن ءبيبىسارا اساۋباەۆا, مەرۋەرت كاماليدەنوۆا, ءامينا قايىربەكوۆا, كسەنيا بالاباەۆا, الۋا نۇرمان قورعادى.
بۇكىلالەمدىك شاحمات وليمپياداسى ەكى جىلدا ءبىر رەت ۇيىمداستىرىلادى. وسىعان دەيىنگى دودانى ءۇندىستاننىڭ چەنناي قالاسى قابىلداپ, قازاقستان ارۋلارى ء(بيبىسارا اساۋباەۆا, جانسايا ابدىمالىك, گ ۇلىسحان ناحباەۆا, كسەنيا بالاباەۆا, نازەركە نۇرعالي) 352 ۇپايمەن ۇزدىك بەستىكتى تۇيىندەگەن ەدى.