سەنات توراعاسى ماۋلەن اشىمباەۆ باستاعان اەس سالۋدى قولداۋ جونىندەگى حالىقتىق شتابتىڭ مۇشەلەرى بۇگىن الماتى قالاسىندا عالىمدارمەن, جوو وقىتۋشىلارىمەن جانە قازاقستان حالقى اسسامبلەياسىنىڭ وكىلدەرىمەن كەزدەستى. شتاب قۇرامىندا دەپۋتاتتار, ساراپشىلار جانە قوعام قايراتكەرلەرى بار. كەزدەسۋلەردە اەس سالۋعا قاتىستى رەفەرەندۋم اياسىنداعى ماسەلەلەر تالقىلاندى, دەپ جازادى Egemen.kz.
ع.داۋكەەۆ اتىنداعى الماتى ەنەرگەتيكا جانە بايلانىس ۋنيۆەرسيتەتىنىڭ جاس عالىمدارىمەن جانە پروفەسسور-وقىتۋشىلار قۇرامىمەن كەزدەسۋدە ساراپشىلار مەن شتاب مۇشەلەرى عىلىمنىڭ مۇمكىندىكتەرىن ارتتىرۋ جانە وندىرىسكە يننوۆاتسيالاردى كەڭىنەن ەنگىزۋ ءۇشىن ءتيىمدى جاعداي جاساۋ نەگىزگى مانىنە نازار اۋداردى. سونداي-اق قازاقستاندا كومىرتەگى قالدىقتارىن ازايتۋ باعىتىنداعى جۇمىستى ودان ءارى جانداندىرۋدىڭ ماڭىزدى ەكەنى ءسوز بولدى.
«مەملەكەت باسشىسى قاسىم-جومارت كەمەل ۇلى توقاەۆتىڭ باستاماسىمەن 6 قازاندا قازاقستاندا اەس سالۋ ماسەلەسىنە قاتىستى رەسپۋبليكالىق رەفەرەندۋم وتەدى. وسىعان بايلانىستى حالىقتىق شتاب رەفەرەندۋمنىڭ مىندەتتەرىن جانە وسى سالادا تۋىندايتىن باسقا دا ماسەلەلەردىڭ ماڭىزىن ءتۇسىندىرۋ جۇمىستارىن جۇرگىزىپ جاتىر. بۇگىندە ەلىمىز كومىرقىشقىل گازىنىڭ جان باسىنا شاققانداعى شىعارىندىلارى بويىنشا الەمدە الدىنعى ورىنداردىڭ ءبىرىن يەلەنەدى. ەۋروپالىق وداق ەلدەرىندە 2026 جىلدان باستاپ كومىرتەگى سالىعى ەنگىزىلەدى. باسقا ەلدەردەن تاۋارلار يمپورتتاعان كەزدە كومىرقىشقىل گازىنىڭ شىعارىندىلارى ءۇشىن قوسىمشا ەلەۋلى الىمدار الىنادى. بۇل ءبىزدىڭ ەكسپورتتاۋشىلار ءۇشىن قيىندىق تۋعىزاتىنى انىق. سوندىقتان ەكونوميكامىزدا كومىرتەگى قالدىعىن ازايتىپ, 2060 جىلعا قاراي كومىرتەگى بەيتاراپتىعىنا قول جەتكىزۋىمىز كەرەك», دەدى ماۋلەن اشىمباەۆ.
سونداي-اق شتاب مۇشەلەرى قازاقستان حالقى اسسامبلەياسىنىڭ وكىلدەرىمەن كەزدەستى. سەنات توراعاسى 6 قازاندا وتەتىن جالپىۇلتتىق رەفەرەندۋم ەلدىڭ دامۋى جولىندا ايرىقشا ماڭىزعا يە ەكەنىنە باسا ءمان بەردى.