2024-2025 وقۋ جىلىندا ەلىمىزدە 3 ملن-نان استام بالا قوسىمشا ءبىلىم بەرۋمەن قامتىلادى دەپ جوسپارلانعان. بۇل جالپى ءبىلىم الۋشىلاردىڭ 86,3%-ىن قۇرايدى, دەپ حابارلايدى Egemen.kz وقۋ-اعارتۋ مينيسترلىگىنىڭ ءباسپاسوز قىزمەتىنە سىلتەمە جاساپ.
ايتا كەتەيىك, بۇگىندە ەلىمىزدە 1 713 مەكتەپتەن تىس ۇيىم ءار باعىتتار بويىنشا 380 ۇيىرمە ءتۇرىن ۇسىنادى: عىلىمي-تەحنيكالىق, مۋزىكالىق, كوركەم-ەستەتيكالىق, ەكولوگيالىق-بيولوگيالىق, تۋريستىك-ولكەتانۋ, اسكەري-پاتريوتتىق, الەۋمەتتىك پەداگوگيكالىق جانە تاعى باسقالارى.
ۆەدومستۆونىڭ حابارلاۋىنشا, رەسپۋبليكالىق جانە وڭىرلىك دەڭگەيلەردە 15 جوبالىق كەڭسە, دەباتتار مەن ءوزىن-ءوزى باسقارۋ شتابتارى, وقۋشىلار مەن ستۋدەنتتەردىڭ 20 دەباتتىق ليگاسى قۇرىلىپ, بالالاردىڭ سىني ويلاۋ جانە كوشباسشىلىق قابىلەتتەرىن دامىتۋعا ءوز ۇلەستەرىن قوسىپ جاتىر.
«مينيسترلىك قوسىمشا ءبىلىم بەرۋ جۇيەسىن دامىتۋ بويىنشا كەشەندى جۇمىستار جۇرگىزىپ جاتىر. بالالاردى ساۋىقتىرۋ جانە ولاردىڭ شىعارماشىلىق, زياتكەرلىك الەۋەتىن دامىتۋ جونىندەگى 2024-2026 جىلدارعا ارنالعان جول كارتاسى شەڭبەرىندە 2025 جىلعا دەيىن اۋىلدىق مەكتەپتەردە مەكتەپتەن تىس قوسىمشا ءبىلىم بەرۋ ۇيىمدارىنىڭ 1 مىڭ كوميۋنيتي-ورتالىقتارىن اشۋ بويىنشا جۇمىس باستالدى. قازىرگى ۋاقىتتا اۋىل مەكتەپتەرىندە وسىنداي 468 ورتالىق اشىلدى. جالپى 2027 جىلعا دەيىن 100 قوسىمشا ءبىلىم بەرۋ ورتالىعىن اشۋ جوسپارلانىپ وتىر», دەپ اتاپ ءوتتى مينيسترلىككە قاراستى تاربيە جانە قوسىمشا ءبىلىم بەرۋ دەپارتامەنتىنىڭ وكىلدەرى.سونىمەن قاتار قازىرگى ۋاقىتتا بالالار مەن ەرىكتىلەر ۇيىمدارىنىڭ قىزمەتىن جەتىلدىرۋ بويىنشا ءتيىستى جۇمىستار جۇرگىزىلىپ جاتىر. بۇل باعدارلامانىڭ تاعى ءبىر ماڭىزدى تۇسى - مامانداردىڭ بىلىكتىلىگىن ارتتىرۋ. اتاپ ايتساق, 3 500-دەن استام قوسىمشا ءبىلىم بەرۋ پەداگوگى, دەباتتىق كلۋب جەتەكشىلەرى, وقۋشىلار مەن ستۋدەنتتەردىڭ ءوزىن-ءوزى باسقارۋ ۇيىمدارىنىڭ پەداگوگتەرى مەن ۇيلەستىرۋشىلەرى وقۋدان وتكەن.